Xana A Wu Swi Tiva?

Hi yihi mintirho leyi Yesu a a ta va a yi endlile tanihi leswi a a ri muvatli?

Yosefa, tata wa Yesu wa muwundli, a a ri muvatli. Yesu na yena u dyondzele ntirho wolowo. Hi nkarhi lowu a sunguleke ntirho wakwe wa ku chumayela loko a ri ni malembe ya “kwalomu ka 30,” a a nga tekiwi a ri “n’wana wa muvatli” ntsena kambe a a tekiwa a ri muvatli la leteriweke kahle.—Luka 3:23; Matewu 13:55; Marka 6:3.

Swi nga ha endleka leswaku endhawini leyi Yesu a a tshama eka yona, vanhu a va swi lava swinene switirho swo rima ha swona swo fana ni mapuluhu ni majoko, leswi hakanyingi a swi endliwa hi ntsandza. Swilo swin’wana leswi muvatli a a swi endla nkarhi na nkarhi a ku ri fanichara—matafula, switulu ni mabokisi yo hoxa swilo—swin’we ni swilo swo fana ni tinyangwa, mafasitere, maloko lama endliweke hi ntsandza ni mapulanga lama tirhisiwaka ku khomelela lwangu. Entiyisweni, ntirho wun’wana wa muvatli a wu katsa ku endla swilo hi ntsandza.

Eka xifaniso xin’wana, Yohane lowo Khuvula u vulavule hi xihloka, ku nga xitirho lexi Yesu ni vavatli van’wana swi nga ha endlekaka leswaku a va xi tirhisa ku tsema mirhi ha xona. Endzhaku ka sweswo, kumbexana mirhi yoleyo a va endla mapulanga ha yona kona kwale nhoveni kumbe va yi rhwala va yi yisa laha va tirhelaka kona. A swi kanakanisi leswaku ku tsema mirhi ni ku yi rhwala a ku ri ntirho lowu a wu lava matimba swinene. (Matewu 3:10) Esaya u vulavule hi switirho swin’wana leswi a swi tirhisiwa hi vavatli va le nkarhini wakwe: “Loko ku ri loyi a vatlaka ntsandza, u tshambulute ngoti ya ku pima; a wu dirowa hi choko yo tshwuka; a wu tirha hi nchumu wo hala mhandzi; a hambeta a wu hala hi nchumu wo endla minkhwati.” (Esaya 44:13) Swilo leswi kumiweke hi vayimburi swi tiyisekisa leswaku eminkarhini ya ku tsariwa ka Bibele a ku tirhisiwa tisaha, tihamula ta maribye ni swipikiri swa koporo. (Eksoda 21:6; Esaya 10:15; Yeremiya 10:4) Swa twisiseka ku pfumela leswaku Yesu a nga ha va a tirhise switirho swoleswo.

A ku ri vamani “vabindzurisi” lava Yesu a vulavuleke ha vona eka xin’wana xa swifaniso swakwe naswona a va tirha njhani?

Yesu u vulavule hi n’wini un’wana loyi a tshinyeke hlonga leri nga endlangiki ntswalo, a ku: “A wu fanele u vekise mali ya mina ya silivhere eka vabindzurisi, kutani loko ndzi fika a ndzi ta va ndzi kume leswi nga swa mina swi ri ni ntswalo.”—Matewu 25:27.

Eminkarhini ya Yesu a ku ri hava tibanki letikulu to fana ni leti nga kona namuntlha. Hambiswiritano, emahlweni ko va Yesu a ta emisaveni, se a swi tolovekile eka valombisi va mali ku hakela ntswalo eka mali leyi a va nyikiwa yona leswaku va yi hlayisa ku ringana nkarhi wo karhi naswona a va lombisa vanhu van’wana mali leyi loko va yi tlherisa a yi va yi ri ni ntswalo lowu tlakukeke. Hi ku ya hi xihlamusela-marito xin’wana, a swi tolovelekile le Grikiya hi lembe-xidzana ra vumune B.C.E leswaku loko vanhu va lomba mali va yi tlherisa yi ri ni ntswalo. (The Anchor Bible Dictionary) Naswona hi nguva ya ku rhula leyi simekiweke hi Varhoma, ntswalo wa lembe ni lembe eka Mfumo hinkwawo wa Rhoma a wu cinca-cinca exikarhi ka 4 na 6 wa tiphesente.

Nawu wa Muxe a wu nga pfumeli leswaku loko Vaisrayele lava nga swisiwana va lomba mali va yi tlherisa yi ri ni ntswalo. (Eksoda 22:25) Swi vonaka onge nawu lowu a wu tirha ngopfu-ngopfu eka mali leyi lombiwaka swisiwana. Hambiswiritano, hilaha xifaniso xa Yesu xi swi kombiseke hakona, a swi tolovelekile ku kuma ntswalo eka mali leyi nyikiweke valombisi va mali kumbe “vabindzurisi.” Xisweswo, ni le ka xifaniso lexi, Yesu u vulavule hi mhaka leyi vayingiseri vakwe a va yi tiva kahle.