Xana Xikwembu Xi Ni Vito?

Tinhlamulo leti tolovelekeke:

▪ “Vito ra xona i Hosi.”

▪ “Xi hava vito.”

I yini leswi Yesu a swi vuleke?

▪ “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe.’” (Matewu 6:9) Yesu a a pfumela leswaku Xikwembu xi na rona vito.

▪ “Ndzi va tivise vito ra wena naswona ndzi ta ri tivisa, leswaku rirhandzu leri u ndzi rhandzeke ha rona ri va eka vona kutani mina ndzi va ni vun’we na vona.” (Yohane 17:26) Yesu u endle leswaku vito ra Xikwembu ri tiviwa.

▪ “A mi nge he ndzi voni kukondza mi ku, ‘U katekile loyi a taka hi vito ra Yehovha!’” (Luka 13:35; Pisalema 118:26) Yesu u ri tirhisile vito ra Xikwembu.

XIKWEMBU hi xoxe xi hi byela vito ra xona. Xi te: “Hi mina Yehovha. Rero i vito ra mina.” * (Esaya 42:8) Vito ra Xiheveru leri nge Yehovha, leri Xikwembu xi tinyikeke rona ri tiveka ngopfu hi Xitsonga. Swi nga ha ku hlamarisa ku tiva leswaku vito leri leri hlawulekeke ra Xiheveru ri humelela minkarhi ya magidi eka matsalwa ya khale ya Bibele. Entiyisweni, ri humelela minkarhi yo tala swinene ku tlula vito rihi na rihi leri nga kona eBibeleni.

Van’wana va nga ha hlamula xivutiso lexi nge, “Vito ra Xikwembu i mani?” hi ku vula va ku, “i Hosi.” Kambe sweswo swi nga fana ni loko u hlamula xivutiso lexi nge, “I mani loyi a wineke eka nhlawulo?” hi ku vula u ku, “hi loyi a a nghenele nhlawulo.” Tinhlamulo toleto a ti hlamuli hi ku kongoma, tanihi leswi rito leri nge “Hosi” ni leri nge “loyi a ngheneleke nhlawulo” ku nga riki mavito ya vanhu.

Ha yini Xikwembu xi hi byele vito ra xona? Xi hi byele vito ra xona leswaku hi ta xi tiva kahle. Hi xikombiso, munhu a nga ha vitaniwa Nkulukumba, Muthori, Tatana kumbe Kokwana, swi ya hi swiyimo swakwe. Swithopo leswi swi hlamusela swo karhi hi munhu yoloye. Kambe vito ra munhu ri hi tsundzuxa swilo hinkwaswo leswi hi swi tivaka ha yena. Hilaha ku fanaka, swithopo swo fana na Hosi, Lowa Matimba Hinkwawo, Tatana ni Muvumbi swi hi endla hi ehleketa hi swilo swo hambana-hambana leswi Xikwembu xi swi endleke. Kambe vito ra xona, leri nge Yehovha, hi rona ntsena leri hi tsundzuxaka swilo hinkwaswo leswi hi swi tivaka ha xona. Xana u nga xi tiva njhani Xikwembu handle ko tiva vito ra xona?

I swa nkoka ku tiva vito rolero kambe xa nkoka swinene i ku ri tirhisa. Ha yini? Hikuva Bibele yi hi byela leswi: “Un’wana ni un’wana loyi a vitanaka vito ra Yehovha u ta ponisiwa.”—Varhoma 10:13; Yuwele 2:32.

[Nhlamuselo ya le hansi]

[Marito lama tshahiweke exihlokweni lama nga eka tluka 6]

Munhu a nga ha vitaniwa Nkulukumba, Muthori, Tatana kumbe Kokwana, swi ya hi swiyimo swakwe. Kambe vito ra xona, hi rona ntsena leri hi tsundzuxaka swilo hinkwaswo leswi hi swi tivaka ha xona