Bibele Yi Hundzula Vutomi Bya Vanhu

Xana wanuna loyi a sunguleke ku dzaha mbangi ni fole a ha ri ntsongo u swi kotise ku yini ku tshika mukhuva wakwe? I yini lexi pfuneke wanuna loyi a a ri eka ntlawa wa tinsula-voya leswaku a lawula vukarhi byakwe a tlhela a papalata moya wa xihlawu-hlawu? Titwele hi ta wena loko vavanuna lavambirhi va hlamusela leswi nga va pfuna.

MATIMU YAKWE HI KU KOMISA

VITO: HEINRICH MAAR

MALEMBE: 38

TIKO LERI A VELEKIWEKE EKA RONA: KAZAKHSTAN

LESWI N’WI HUMELELEKE: A A GODZOMBERIWE HI MBANGI NI FOLE

VUTOMI BYA MINA: Ndzi velekeriwe edzongeni wa Kazakhstan, kwalomu ka tikhilomitara ta 120 ku suka edorobeni ra Tashkent. Ndhawu ya kona yi omile naswona hi ximumu ya hisa swinene, ku hisa ka kona ku fika kwalomu ka va-45 wa tidigri naswona hi xixika ku titimela ngopfu lerova tidigri ta kona ti va ehansi ka 10, maxelo lawa ma endla leswaku madiriva ni mbangi swi kula kahle.

Vatswari va mina va huma eJarimani. Havumbirhi bya vona a va tivula Vakreste kambe vutomi bya vona a byi nga fambisani ni vutomi bya Vakreste. Hambiswiritano, va ndzi dyondzise Xikhongelo xa Hosi lerova ndzi xi tiva hi nhloko. Loko ndzi ri ni malembe ya 14, manana swin’we ni sesi wa mina lonkulu a va heta nkarhi va ri karhi va dyondza Bibele ni Timbhoni ta Yehovha. Siku rin’wana ndzi twe loko Timbhoni timbirhi leti a ti dyondza na manana Bibele ti n’wi byela vito ra Xikwembu leri nge Yehovha, ti tlhela ti n’wi komba rona eBibeleni yakwe. Sweswo swi ndzi tsakisile. Hi ku famba ka nkarhi manana u tshike ku dyondza Bibele naswona leswi swi endle leswaku ndzi nga ha yi emahlweni ndzi dyondza swo tala hi Xikwembu. Loko ndzi ri exikolweni, mudyondzisi wa hina a a tshamela ku hi byela mavunwa hi Timbhoni ta Yehovha. Leswi ndzi tshameke ndzi ya eka yin’wana ya minhlangano ya Timbhoni ta Yehovha ni sesi wa mina, ndzi byele mudyondzisi wa mina leswaku leswi a a tshamela ku swi vula a hi ntiyiso.

Loko ndzi ri ni malembe ya 15 ndzi ye eLeningrad laha sweswi ku vitaniwaka St. Petersburg le Rhaxiya leswaku ndzi ya dyondzela ntirho. Hambileswi a ndzi nga tivi swo tala hi Yehovha, ndzi swi kotile ku chumayela lava a ndzi tshama na vona endlwini. Kambe swi nga siya ekule, ndzi sungule ku dzaha. Loko ndzi endzela ekaya le Kazakhstan, a ndzi nga ha chavi ku xava mbangi, hambileswi a ndzi swi tiva leswaku sweswo a swi le nawini. Ndzi sungule ku kukutlela byala lebyi vuriwaka vodka swin’we ni vhinyo leyi endliwaka emakaya.

Loko ndzi hete xikolo xo dyondzela ntirho, ndzi joyine vuthu ra masocha ya le Rhaxiya ku ringana malembe mambirhi. Nilokoswiritano, swilo leswi ndzi nga swi dyondza eBibeleni loko ndza ha ri  ntsongo a ndza ha swi tsundzuka. Loko ndzi pfulekeriwa hi nkarhi a ndzi byela masocha-kulorhi hi ta Yehovha naswona loko ndzo tshuka ndzi twa ma vula mavunwa hi Timbhoni ta Yehovha, a ndzi ti yimelela.

Loko ndzi heta ku leteriwa tanihi socha, ndzi ye eJarimani. Loko ndzi ri ekampeni ya vahlapfa, ndzi nyikiwe buku leyi sekeriweke eBibeleni leyi kandziyisiweke hi Timbhoni. Ndzi yi hlaye hi ku hiseka naswona a ndzi swi vona leswaku leswi yi swi vulaka i ntiyiso. Kambe a ndzi nga swi koti ku tshika fole ni mbangi leswi se a swi ndzi godzomberile. Endzhakunyana ka nkarhi, ndzi rhurhele ekusuhi ni doroba ra Karlsruhe. Loko ndzi ri kwalaho ndzi hlangane ni Mbhoni ya Yehovha naswona yi sungule ku dyondza Bibele na mina.

NDLELA LEYI BIBELE YI HUNDZULEKE VUTOMI BYA MINA HA YONA: Ku hundze malembe yo tala ndzi ri karhi ndzi swi vona leswaku Bibele i Rito ra Xikwembu. Loko ndzi heta ku hlaya buku leyi leyi sekeriweke eBibeleni leyi ndzi nyikiweke yona loko ndzi ri ekampeni ya vahlapfa, a ndzi tiyiseka leswaku Bibele yi hlamula swivutiso hinkwaswo swa nkoka evuton’wini. Hambiswiritano, swi ndzi tekele nkarhi ku tshika mikhuva ya mina. Endzhaku ka loko ndzayo leyi nga ebukwini ya 2 Vakorinto 7:1 yi ndzi khumbe mbilu, ndzi endle leswi nga ematimbeni ya mina leswaku ndzi ‘tibasisa eka swilo hinkwaswo leswi nyamisaka nyama ni moya’ hi ku tshika ku dzaha mbangi ni fole.

Ndzi swi kotile ku namba ndzi tshika ku dzaha mbangi. Kambe swi ndzi tekele tin’hweti ta tsevu leswaku ndzi tshika mukhuva wa mina wo dzaha fole. Siku rin’wana Mbhoni leyi a yi ndzi dyondzela Bibele yi ndzi vutisile yi ku, “Hi xihi xikongomelo xa wena hi vutomi?” Xivutiso xexo a xi ndzi dyisanga byi rhelela hikwalaho ka leswi a ndzi godzomberiwe hi fole. Ndzi ringete ku tshika ku dzaha fole ku ringana minkarhi yo hlayanyana. Kutani ndzi vone swi antswa leswaku ndzi khongela emahlweni ko va ndzi dzaha, ematshan’weni yo kombela leswaku Xikwembu xi ndzi rivalela loko ndzi heta ku dzaha. Hi 1993, ndzi tivekele siku leri a ndzi ta tshika ha rona ku dzaha fole. Hi ku seketeriwa hi Yehovha, ku ta fikela ninamuntlha, a ndza ha tlhelanga ndzi dzaha.

NDLELA LEYI NDZI VUYERIWEKE HA YONA: Leswi sweswi ndzi nga tshika ku dzaha mbangi ni fole leswi a swi durha naswona a swi ndzi godzomberile, rihanyo ra mina ra antswa swinene. Namuntlha, ndzi kume ni lunghelo ro ya tirha hi ku tirhandzela erhavini ra Timbhoni ta Yehovha leri nga eJarimani. Ndzi tsakile hileswi ndzi tirhiseke ndzayo ya Bibele evuton’wini bya mina! Ku tiva leswi Bibele yi swi dyondzisaka swi ndzi pfune leswaku vutomi bya mina byi va ni xikongomelo.

MATIMU YAKWE HI KU KOMISA

VITO: TITUS SHANGADI

MALEMBE: 43

TIKO LERI A VELEKIWEKE EKA RONA: NAMIBIA

LESWI A A SWI ENDLA: XIRHO XA NTLAWA WA TINSULA-VOYA

VUTOMI BYA MINA: Ndzi kulele ematiko-xikaya ya le Ohangwena exifundzheni xa n’walungu wa Namibia. Emugangeni lowu a ndzi tshama eka wona vanhu va bukuteriwile ni ku dlayiwa hi nkarhi wa nyimpi leyi nga va kona hi va-1980. Laha ndzi nga kulela kona jaha a ri tekeriwa enhlokweni loko ntsena ri kota ku lwa naswona ri hlula majaha-kuloni. Na mina ndzi dyondze ku lwa.

Loko ndzi heta xikolo, ndzi ye ndzi ya tshama ni malume wa mina edorobeni leri nga eribuweni ra Swakopmund. Loko ndzi fika ndzi joyine ntlawa wa vaxandzuki wa tinsula-voya. A hi tala ku ya etihotela  ni le tibarheni leti a ti ri edorobeni etindhawini leti vantima a va nga pfumeleriwi ku nghena eka tona, xikongomelo xa hina a ku ri ku ya vanga hasahasa ntsena. Minkarhi yo tala a hi lwisana ni varindzi ni maphorisa. Madyambu man’wana ni man’wana a ndzi tshama ndzi hlome hi mukwana wo leha lowu karihaka kumbe banga leswaku ndzi lunghekela ku lwa ni munhu un’wana ni un’wana loyi a a ringeta ku ndzi pfuka.

Vusiku byin’wana ndzi pone ri ahlamile loko hi ri karhi hi lwa ni tinsula-voya tin’wana. Un’wana wa valala va hina u fike a yima endzhaku ka mina naswona a ri ekusuhi no ndzi tsema nhloko hiloko un’wana wa ntlawa wa hina a n’wi hima a titivala. Hambileswi ndzi poneke ku fa, a ndzi tshikanga ku va ni tihanyi. Loko ndzo tshuka ndzi holovanyana ni munhu, ku nga khathariseki leswaku i wanuna kumbe i wansati, a ndzi namba ndzi n’wi teka hi xibakele.

NDLELA LEYI BIBELE YI HUNDZULEKE VUTOMI BYA MINA HA YONA: Loko ndzi hlangana ni Timbhoni ta Yehovha ro sungula, wansati un’wana u ndzi hlayele tindzimana to karhi eka Pisalema 37 kutani a ndzi byela leswaku buku ya Nhlavutelo yi ni switshembiso swin’wana leswi tsakisaka malunghana ni vumundzuku. Leswi a nga ndzi byelangiki leswaku switshembiso swa kona swi kumeka kwihi ebukwini ya Nhlavutelo, ndzi teke Bibele ya mina kutani ndzi hlaya buku hinkwayo ya Nhlavutelo vusiku byebyo. Ndzi xi rhandzile xitshembiso lexi ndzi nga xi hlaya eka Nhlavutelo 21:3, 4 xa leswaku “rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” Loko Timbhoni ti tlhela ti vuya, ndzi amukele dyondzo ya Bibele.

A swi ndzi tikela ku cinca ndlela leyi a ndzi anakanya ha yona ni leyi a ndzi endla swilo ha yona. Kambe eka Mintirho 10:34, 35 ndzi dyondze leswaku “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” Ndzi tlhele ndzi tikarhatela ku tirhisa leswi Varhoma 12:18 yi swi vulaka loko yi ku: “Loko swi koteka, swi titshege hi n’wina, vanani ni ku rhula ni vanhu hinkwavo.”

Loko ndzi ri karhi ndzi dyondza ku lawula ku hlundzuka ka mina, a ndzi fanele ndzi tlhela ndzi tshika ku dzaha fole leri a ri ndzi godzomberile. Minkarhi yo tala a ndzi xiririka mihloti ndzi kombela Yehovha leswaku a ndzi pfuna. Kambe eku sunguleni a ndzi endla swilo hi ndlela leyi nga fanelangiki hi ku tibyela leswaku ndzi dzaha fole ro hetelela kutani ndzi khongela endzhaku ka sweswo. Mbhoni leyi a ndzi dyondza na yona Bibele yi ndzi pfunile leswaku ndzi vona nkoka wa ku khongela emahlweni ko va ndzi dzaha. Nakambe a ndzi fanele ndzi fambela ekule ni vanhu lava dzahaka. Naswona ndzi tlhele ndzi hlamusela vatirhi-kulorhi ndlela leyi ku dzaha swi nga ni khombo ha yona. Leswi swi ndzi pfunile hakunene hikuva swi endle leswaku vanhu lava a ndzi tirha na vona va nga ha ndzi nyiki fole.

Eku heteleleni ndzi swi kotile ku tshika fole ni mahanyelo ya mina ya khale. Endzhaku ka tin’hweti ta tsevu ndzi ri karhi ndzi dyondza ni ku hanya hi milawu ya le Bibeleni, ndzi fanelekele ku khuvuriwa ndzi va Mbhoni ya Yehovha.

NDLELA LEYI NDZI VUYERIWEKE HA YONA: Ndzi sungule ku swi xiya leswaku vukhongeri bya Timbhoni ta Yehovha i bya ntiyiso loko ndzi vona ndlela leyi ti rhandzanaka ha yona ku nga khathariseki rixaka kumbe muvala wa tona. Hambileswi a ndzi nga si khuvuriwa ndzi va Mbhoni ya Yehovha, makwerhu un’wana wa mulungu u ndzi rhambe ekaya rakwe leswaku ndzi ta dya swin’we na yena. A ndzi twa onge ndzo lorha. A swi nga si tshama swi endleka leswaku ndzi tshama swin’we ni mulungu hi ku rhula, ndzi nga ha vuli ku dya swin’we na yena ekaya rakwe. Hakunene se a ndzi ri xirho xa nhlengeletano ya vamakwerhu emisaveni hinkwayo.

Enkarhini lowu nga hundza, varindzi ni maphorisa va ringetile ku ndzi sindzisa leswaku ndzi cinca mahanyelo ya mina kambe va tsandzekile. I Bibele ntsena leyi nga ndzi pfuna leswaku ndzi cinca ndlela leyi a ndzi hanya ha yona kutani ndzi va munhu la tsakeke.

[Marito lama tshahiweke exihlokweni lama nga eka tluka 29]

“Minkarhi yo tala a ndzi xiririka mihloti ndzi kombela Yehovha leswaku a ndzi pfuna”