Leswi Hi Nga Swi Dyondzaka Eka Yesu

Malunghana Ni Vumundzuku Bya Vanhu

Xana Yesu u tshembise vanhu ku ya hanya etilweni?

Ina, u va tshembisile! Yesu hi byakwe u pfuxiwe eku feni kutani a tlhandlukela etilweni leswaku a ya va ni Tata wakwe. Loko a nga si fa ni ku pfuxiwa, u byele vaapostola vakwe vo tshembeka va 11 a ku: “Endlwini ya Tatana ku ni vutshamo byo tala. . . . Ndzi ya mi lunghiselela ndhawu.” (Yohane 14:2) Hambiswiritano, a va tati ni xandla lava nga ta kuma lunghelo rero. Yesu u veke mhaka leyi erivaleni loko a byela vadyondzisiwa vakwe a ku: “Mi nga chavi, ntlhambinyana, hikuva Tata wa n’wina u tsakele ku mi nyika mfumo.”—Luka 12:32.

Xana lava “ntlhambinyana” va ta endla yini etilweni?

Tatana u lava leswaku ntlawa lowu lowutsongo wu va swirho swa mfumo wa le tilweni swin’we na Yesu. Hi swi tivisa ku yini sweswo? Endzhaku ka loko Yesu a pfuxiwile, u byele muapostola Yohane leswaku vanhu van’wana vo tshembeka a “va ta va tihosi emisaveni.” (Nhlavutelo 1:1; 5:9, 10) Lawa i mahungu lamanene. Nchumu lowu vanhu va wu lavaka ngopfu i mfumo lowunene. I yini leswi swi nga ta hetisisiwa hi mfumo lowu Yesu a nga ta fuma eka wona? Yesu u te: “Eku tumbuluxeni hi vuntshwa, loko N’wana wa munhu a tshama ehansi exiluvelweni xakwe lexi vangamaka, na n’wina lava mi ndzi landzeleke mi ta tshama eswiluvelweni swa 12.” (Matewu 19:28) Ku fuma ka Yesu ni valandzeri vakwe swi ta endla leswaku ku tlhela ku ‘tumbuluxiwa hi vuntshwa’ kumbe ku tlheriseriwa swilo eka swiyimo leswi hetisekeke leswi mpatswa wo sungula wu tiphineke ha swona loko wu nga si endla xidyoho.

 Xana Yesu u va tshembise yini vanhu lavan’wana hinkwavo?

Ku hambana na Yesu loyi a vumberiweke ku hanya etilweni, vanhu a va vumberiwe ku hanya emisaveni. (Pisalema 115:16) Xisweswo Yesu u te: “N’wina mi huma etindhawini ta le hansi; mina ndzi huma etindhawini ta le henhla.” (Yohane 8:23) Yesu u vulavule hi vumundzuku lebyi tsakisaka bya vanhu laha misaveni. U tshame a ku: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5) A a tshaha marito lama huhuteriweke ya mupisalema lama nge: “Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu. Lavo lulama va ta dya ndzhaka ya misava, va ta tshama eka yona hi masiku.”—Pisalema 37:11, 29.

Kutani lava “ntlhambinyana” lava yaka etilweni a hi vona ntsena lava nga ta kuma vutomi lebyi nga heriki. Yesu u tlhele a vulavula hi ntshembo lowu nga ta kumiwa hi vanhu va timiliyoni emisaveni hinkwayo. U te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16.

Xana Xikwembu xi ta ku herisa njhani ku xaniseka loku vanhu va langutanaka na kona?

Yesu u vulavule hi ku ntshunxiwa eka swilo swimbirhi leswi hi tiselaka ku xaniseka loko a ku: “Sweswi ku ni ku avanyisiwa ka misava leyi; kutani mufumi wa misava leyi u ta cukumeteriwa ehandle.” (Yohane 12:31) Xo sungula, vanhu lava nga xi chaviki Xikwembu lava hi vangelaka ku xaniseka va ta avanyisiwa va tlhela va herisiwa. Xa vumbirhi, Sathana u ta cukumeteriwa ehandle kutani a nge he hambukisi vanhu.

Ku vuriwa yini hi vanhu lava feke va nga kalanga va kuma nkarhi wo dyondza hi Xikwembu na Kreste ni ku va ni ripfumelo eka vona? Yesu u byele mudyohi loyi a a beleriwe etlhelo ka Yena a ku: “U ta va na mina eParadeyisini.” (Luka 23:43) Munhu yoloye swin’we ni vanhu van’wana va timiliyoni, va ta kuma nkarhi wo dyondza hi Xikwembu loko Yesu a n’wi pfuxela emisaveni leyi nga paradeyisi. U ta va ni lunghelo ro va exikarhi ka vanhu vo rhula ni vo lulama lava kumeke vutomi lebyi nga heriki emisaveni.—Mintirho 24:15.

Leswaku u kuma rungula leri engetelekeke vona tindzimana 3 na 7 eka buku leyi nge Xana Bibele Yi Dyondzisa Yini Hakunene? *

[Nhlamuselo ya le hansi]

[Xifaniso lexi nga eka tluka 23]

“Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29