Tshinela Eka Xikwembu

‘Mfumo Wa Wena Wu Ta Tserhama’

2 SAMUWELE 7:1-16

EMATIN’WINI ya vanhu, vafumi vo tala va susiwile eswikhundlheni swa vona. Van’wana va suke loko vanhu va nga va vhoteli kasi van’wana va lo sindzisiwa. Xana ku vuriwa yini hi Yesu Kreste, Hosi ya Mfumo wa Xikwembu wa le tilweni? Xana wu kona nchumu lowu nga n’wi sivelaka ku fuma tanihi Hosi leyi vekiweke hi Xikwembu? Nhlamulo yi kumeka eka marito lawa Yehovha a ma byeleke Hosi Davhida wa le Israyele wa khale, lama nga ebukwini ya Samuwele wa vumbirhi ndzima 7.

Loko ndzima yoleyo yi sungula, hi kuma leswaku Davhida a a khomiwe hi tingana hileswi a a tshama exigodlhweni xo saseka hambileswi a a ri hosi leyi nga munhu ntsena, kasi areka ya Xikwembu a yi tshama ematendeni lama nga nyawuriki. * Davhida u kombise leswaku wa swi navela swinene ku akela Yehovha yindlu leyi xiximekaka kumbe tempele. (Ndzimana 2) Kambe a hi yena loyi a a ta aka yindlu yoleyo. Yehovha u tirhise muprofeta Natani leswaku a byela Davhida leswaku n’wana wa yena hi yena loyi a nga ta aka tempele.—Tindzimana 4, 5, 12, 13.

Yehovha u khumbiwe hi ku navela ka Davhida loku humaka embilwini. Loko Xikwembu xi hetisisa ku navela ka Davhida ni ku endla swilo hi ku pfumelelana ni vuprofeta, xi endle ntwanano na Davhida wa leswaku xi ta pfuxa un’wana erixakeni ra tihosi ta Davhida loyi a nga ta fuma hilaha ku nga heriki. Natani u byele Davhida xitshembiso xa Xikwembu a ku: “Yindlu ya wena ni mfumo wa wena swi ta tserhama hilaha ku nga riki na makumu emahlweni ka wena; xiluvelo xa wena xi ta simekiwa xi tiya hilaha ku nga riki na makumu.” (Ndzimana 16) Xana i mani Mudyandzhaka wa hilaha ku nga heriki wa ntwanano lowu—Loyi a nga ta fuma hilaha ku nga heriki?—Pisalema 89:20, 29, 34-36.

Yesu wa le Nazareta a a ri ntukulu wa Davhida. Loko ntsumi yi tivisa hi ku velekiwa ka Yesu yi te: “Yehovha Xikwembu u ta n’wi nyika xiluvelo xa Davhida tata wakwe, naswona u ta va hosi ehenhla ka yindlu ya Yakobe hi masiku, mfumo wakwe a wu nge vi na makumu.” (Luka 1:32, 33) Kutani ntwanano lowu endliweke na Davhida wu hetiseke eka Yesu Kreste. Hikwalaho ka sweswo, a nga fumi hikwalaho ka leswi vanhu va nga n’wi hlawula, u fuma hikwalaho ka xitshembiso xa Xikwembu lexi n’wi nyikaka mfanelo yo fuma hilaha ku nga heriki. Hi fanele hi tsundzuka leswaku minkarhi hinkwayo switshembiso swa Xikwembu swa hetiseka.—Esaya 55:10, 11.

Ku ni tidyondzo timbirhi leti hi ti dyondzaka eka Samuwele wa vumbirhi ndzima 7. Yo sungula, hi nga tiyiseka leswaku a ku na nchumu hambi ku ri munhu loyi a nga sivelaka Yesu Kreste leswaku a fuma. Xisweswo hi nga tiyiseka leswaku u ta xi hetisisa xikongomelo xa ku fuma ka yena, ku nga ku endla leswaku ku rhandza ka Xikwembu ku endleka emisaveni hilaha ku endlekaka hakona etilweni.—Matewu 6:9, 10.

Ya vumbirhi, rungula leri ri hi dyondzisa dyondzo ya nkoka swinene hi Yehovha. Tsundzuka leswaku Yehovha u vone a tlhela a ma tlangela makungu ya mbilu ya Davhida. Swa khutaza ku tiva leswaku Yehovha u tlangela ku tinyiketela ka hina evugandzerini byakwe. Minkarhi yin’wana swiyimo leswi nga ehenhla ka matimba ya hina, swo tanihi ku vabya kumbe ku kula, swi nga hi sivela ku endla leswi timbilu ta hina a ti navela ku swi endla entirhweni wa Xikwembu. Loko swi ri tano, hi nga chaveleleka hi ku tiva leswaku Yehovha wa yi vona mbilu leyi tinyiketeleke evugandzerini byakwe hi ku tirhandzela.

[Nhlamuselo ya le hansi]