Xana A Wu Swi Tiva?

Xana van’wana va vaapostola va Yesu va 12 a va ri maxaka yakwe?

▪ Bibele a yi xi hlamuli hi ku kongoma xivutiso lexi. Kambe hi ku ya hi ndhavuko ni rungula rin’wana, swi tikomba onge van’wana va vona a va ri maxaka yakwe.

Vatsari va Tievhangheli va hi byela mavito ya vavasati lava a va langute Yesu loko a ri karhi a fa emhandzini ya nxaniso. Yohane 19:25 yi boxa van’wana va mune, yi ri: “Mana wakwe [Mariya] ni makwavo wa xisati wa mana wakwe; Mariya nsati wa Klopasi, na Mariya Magadala.” Loko ndzimana leyi yi hlanganisiwa ni leswi Matewu na Marka va nga swi vula eka xiendlakalo xexo, ku nga ha va ku ri ntiyiso ku gimeta hileswaku makwavo wa xisati wa mana wa Yesu a ku ri Salome. Swi nga ha endleka leswaku Salome a a ri mana wa vana va Zebediya. (Matewu 27:55, 56; Marka 15:40) Kutani vana vakwe, lava ku nga Yakobo na Yohane, swi nga ha endleka leswaku a ku ri vamuzala wa Yesu. Yesu u byele Yakobo na Yohane lava a va ri vaphasi va tinhlampfi leswaku va va vadyondzisiwa vakwe.—Matewu 4:21, 22.

Rungula rin’wana leri fambisanaka ni ndhavuko naswona ri nga riki kona eBibeleni ri kombisa leswaku Klopasi kumbe Alfiya, ku nga nuna wa nsati la boxiweke eka Yohane 19:25, a a ri makwavo wa xinuna wa Yosefa, tata wa Yesu wa muwundli. Loko ku ri leswaku mhaka leyi i ntiyiso, sweswo swi vula leswaku Yakobo n’wana wa Alfiya, loyi na yena a a ri un’wana wa vaapostola va 12, a ku ri muzala wa Yesu.—Matewu 10:3.

Xana Yesu na Yohane lowo Khuvula a va ri maxaka?

▪ Vanhu van’wana va vula leswaku vavanuna lava a va ri maxaka. Leswi swi vangiwe hi ndlela leyi Luka 1:36 yi hundzuluxeriweke ha yona eka King James Version. Hi xikombiso, ndzimana yoleyo yi vula leswaku Elizabeta, mana wa Yohane i xaka ra Mariya mana wa Yesu.

Nilokoswiritano, rito ro sungula ra Xigriki leri tirhisiweke eka tsalwa leri a ri twisiseki kahle. Ri kombisa leswaku vavasati lava a va ri maxaka, kambe a ri vuli leswaku a va ri vamuzala. The Interpreter’s Dictionary of the Bible yi vula leswaku “rito leri ri aname ngopfu lerova a swi olovi ku va ri hi byela hi vuxaka lebyi a va ri na byona.” Kutani, xana mhaka ya leswaku Yesu na Yohane a va ri maxaka yi huma kwihi? Loko The Catholic Encyclopedia yi hlamula yi ri: “Rungula ra hina hinkwaro leri . . . vulavulaka hi Mariya . . . ri huma etibukwini ta mintsheketo.”

Xisweswo, Yesu na Yohane a va ri maxaka ya le kule, kambe a va nga ri vamuzala.