Xi Hi Nyike Ntshunxeko Wo Tihlawulela
Tshinela Eka Xikwembu
Xi Hi Nyike Ntshunxeko Wo Tihlawulela
VATSWARI va fanele va vekela vana va vona xikombiso lexinene. Ndlela leyinene leyi va va kurisaka ha yona yi nga endla leswaku va va ni timfanelo letinene naswona va endla swiboho swa vutlhari evuton’wini. Lexi twisaka ku vava hileswaku vatswari vo tala a va va vekeli xikombiso lexinene vana va vona. Xana sweswo swi vula leswaku vana volavo a va nge humeleli evuton’wini? A swi tano hikuva Yehovha Xikwembu u nyike un’wana ni un’wana wa hina ntshunxeko wo tihlawulela. Xiya mhaka ya Hezekiya leyi nga eka 2 Tihosi 18:1-7.
Hezekiya a a ri “n’wana wa Akazi hosi ya Yuda.” (Ndzimana 1) Akazi u hambukise vanhu evugandzerini bya Yehovha lebyi tengeke. Hosi leyi yo homboloka yi simeke vugandzeri bya Bali swin’we ni mikhuva ya byona yo endla switlhavelo hi vanhu. Leswi swi endle leswaku van’wana va vamakwavo va Hezekiya va dlayiwa. Akazi u tlhele a pfala tinyangwa ta tempele ni ku “tiendlela tialitari eyinhleni yin’wana ni yin’wana eYerusalema.” Hi ku endla tano, u ‘hlundzukise Yehovha.’ (2 Tikronika 28:3, 24, 25) Swi le rivaleni leswaku tata wa Hezekiya a a hombolokile swinene. Kambe xana Hezekiya a a ta swi kota ku papalata swihoxo leswi endliweke hi tata wakwe?
Endzhaku ko n’wi tlhandlama, Hezekiya u swi kombisile leswaku a nge xi landzeli xikombiso xo biha xa tata wakwe. U “[hambete] a endla leswi lulameke ematihlweni ya Yehovha.” (Ndzimana 3) A a tshemba Yehovha naswona “a ku vanga na munhu la faneke na yena exikarhi ka tihosi hinkwato ta Yuda.” (Ndzimana 5) Hi lembe leri a sunguleke ha rona ku fuma, u kondletele vugandzeri bya ntiyiso, leswi endleke leswaku a susa tindhawu leti tlakukeke leti eka tona a ku gandzeriwa swikwembu swa vuhedeni. U pfule tinyangwa ta tempele ni ku vuyetela vugandzeri bya ntiyiso. (Ndzimana 4; 2 Tikronika 29:1-3, 27-31) Hezekiya u “hambete a namarhela Yehovha . . . , [hiloko] Yehovha a va na yena.”—Tindzimana 6, 7.
I yini lexi pfuneke Hezekiya leswaku a nga xi tekeleli xikombiso xo homboloka xa tata wakwe? Xana swi nga ha endleka leswaku mana wakwe Abiya loyi hi nga tiveki swo tala hi yena, ku ri yena la n’wi vekeleke xikombiso lexinene? Xana swi nga ha endleka leswaku Hezekiya u tekelele xikombiso lexinene xa Esaya la sunguleke ku profeta yena a nga si velekiwa? * Bibele a yi vuli nchumu hi mhaka leyi. Ku nga khathariseki swivangelo swa kona, leswi hi swi tivaka hileswi: Hezekiya u hlawule ndlela leyi hambaneke ni ya tata wakwe.
Xikombiso xa Hezekiya xi khutaza un’wana ni un’wana la kurisiweke hi vatswari lava nga n’wi vekelangiki xikombiso lexinene. Leswi nga hundza a hi nge swi cinci; naswona a hi nge swi rivali. Kambe sweswo a swi vuli leswaku a hi nge humeleli evuton’wini. Hi nga tiendlela swiboho leswi nga ta endla leswaku hi tiphina hi vutomi. Ku fana na Hezekiya, hi nga hlawula ku gandzela Xikwembu xa ntiyiso, ku nga Yehovha. Sweswo swi nga endla leswaku hi hanya vutomi lebyi enerisaka sweswi hi tlhela hi kuma vutomi lebyi nga heriki emisaveni leyintshwa ya Xikwembu. (2 Petro 3:13; Nhlavutelo 21:3, 4) Kutani hi fanele hi xi tlangela swinene Xikwembu xa rirhandzu lexi nyikeke un’wana ni un’wana wa hina ntshunxeko wo tihlawulela!
[Nhlamuselo ya le hansi]
^ par. 7 Esaya u sungule ku profeta kwalomu ka 778 B.C.E. ku ya kwalomu ka 732 B.C.E. Hezekiya u sungule ku fuma hi 745 B.C.E., loko a ri ni malembe ya 25.