2 I Mani Loyi Hi Faneleke Hi Khongela Eka Yena?
Xikhongelo
2 I Mani Loyi Hi Faneleke Hi Khongela Eka Yena?
XANA swikhongelo hinkwaswo swi ya endhawini yin’we, ku nga khathariseki leswaku swi kongomisiwe eka mani? Vanhu vo tala namuntlha va ehleketa tano. Va seketela mhaka ya ku hlangana ka vukhongeri naswona va lava leswaku vukhongeri hinkwabyo byi va nchumu wun’we hambileswi byi nga faniki. Kambe, xana swi nga ha endleka leswaku mhaka leyi va yi ehleketaka yi ri mavunwa?
Bibele yi kombisa leswaku minkarhi yo tala vanhu a va swi kongomisi eka Xikwembu swikhongelo swa vona. Hi nkarhi wa ku tsariwa ka Bibele, a swi tolovelekile ku va vanhu va kongomisa swikhongelo swa vona eka swifaniso leswi kovotliweke. Kambe Xikwembu xi wu sole hi ku phindha-phindha mukhuva wolowo. Hi xikombiso, loko Pisalema 115:4-6 yi vulavula hi swifaniso yi ri: “Swi ni tindleve, kambe a swi twi.” Mhaka leyi yi le rivaleni, a swi pfuni nchumu ku khongela eka xikwembu lexi nga twiki.
Ku ni rungula rin’wana ra le Bibeleni leri tsakisaka naswona ri yi kandziyisaka kahle mhaka leyi. Muprofeta Eliya u tlhontlhe vaprofeta va Bali hi ku va byela leswaku va khongela eka xikwembu xa vona, na yena u ta khongela eka Xikwembu xakwe. Eliya u vule leswaku Xikwembu xa ntiyiso xi ta n’wi hlamula kambe lexi xa mavunwa a xi nga ta va hlamula. Vaprofeta va Bali va hete nkarhi wo leha va ri eku khongeleni, va kala va ba ni nkalanga, kambe a va hlamuriwanga. Rungula ra kona ri ri: “A ku nga ri na munhu la hlamulaka, a ku nga ri na loyi a yingisaka.” (1 Tihosi 18:29) Kambe ku endleke yini loko Eliya a khongela?
Xikwembu xakwe xi n’wi hlamule hi nkarhi wolowo, xi rhumela ndzilo ku suka etilweni leswaku wu hisa gandzelo rakwe. Hi kwihi ku hambana loku a ku ri kona? Ku ni nchumu wun’we ntsena lowu kombisaka ku hambana koloko, wu kumeka eka 1 Tihosi 18:36, 37. I xikhongelo xo koma swinene, xo va ni marito ya kwalomu ka 30 ntsena eka Xiheveru xo sungula. Hambileswi xi nga koma, eka xona Eliya u boxe vito ra Xikwembu kanharhu, leri nge Yehovha.
Bali leswi vulaka “n’wini,” a ku ri xikwembu xa Vakanana naswona a ku ri ni swikwembu swin’wana leswi na swona a swi ri ni vito rero. Kambe vito leri nge Yehovha ri hlawulekile naswona hi yena ntsena la nga na rona evuakweni hinkwabyo. Loko a vulavula ni vanhu vakwe u te: “Hi mina Yehovha. Rero i vito ra mina; naswona ku vangama ka mina a ndzi ku nyiki un’wana.”—Esaya 42:8.
Xana xikhongelo xa Eliya ni xa vaprofeta va Bali swi ye endhawini yin’we? Vugandzeri bya Bali byi tsongahate vanhu hi ku seketela vunghwavava ni ku endla magandzelo hi vanhu. Ku hambana na vona, Yehovha u dyondzise Vaisrayele ndlela yo va va n’wi gandzela hi ndlela leyi amukelekaka. Kutani anakanya hi mhaka leyi: Loko wo tsalela munghana wa wena la xiximekaka papila, xana a wu ta langutela leswaku ri ya eka munhu un’wana, la nga ni mahanyelo yo hambana ni ya munghana wa wena? Nikatsongo!
Loko u khongela eka Yehovha, u kongomisa xikhongelo xa wena eka Muvumbi, la nga Tata wa vanhu hinkwavo. * Loko muprofeta Esaya a khongela u te: “Wena Yehovha, u Tata wa hina.” (Esaya 63:16) Lexi hi xona Xikwembu lexi Yesu Kreste a a vulavula ha xona loko a byela valandzeri vakwe a ku: “Ndzi tlhandlukela eka Tatana ni Tata wa n’wina ni le ka Xikwembu xa mina ni Xikwembu xa n’wina.” (Yohane 20:17) Yehovha i Tata wa Yesu. I Xikwembu lexi Yesu a a khongela xona naswona hi xona lexi a dyondziseke valandzeri vakwe leswaku va xi khongela.—Matewu 6:9.
Xana Bibele yi hi khutaza leswaku hi kongomisa swikhongelo swa hina eka Yesu, Mariya, vakwetsimi kumbe tintsumi? Doo, yi ri hi fanele hi swi kongomisa eka Yehovha ntsena. Xiya swivangelo swimbirhi. Xo sungula, xikhongelo i xiphemu xa vugandzeri naswona Bibele yi vula leswaku ku fanele ku gandzeriwa Yehovha ntsena. (Eksoda 20:5) Xa vumbirhi, Bibele yi vula leswaku Yehovha i “Mutwi wa xikhongelo.” (Pisalema 65:2) Hambileswi a nyikeke vanhu malunghelo yo tala, lunghelo ro yingisa swikhongelo a nga ri nyikanga munhu. U hi tshembisa leswaku hi yena ntsena la yingisaka swikhongelo swa hina.
Kutani loko u lava leswaku Xikwembu xi yingisa swikhongelo swa wena, tsundzuka xikhutazo lexi xa le Bibeleni: “Un’wana ni un’wana la vitanaka vito ra Yehovha u ta ponisiwa.” (Mintirho 2:21) Xana Yehovha u yingisa swikhongelo hinkwaswo? Xana ku na leswi hi faneleke hi swi tiva loko hi lava leswaku a yingisa swikhongelo swa hina?
[Nhlamuselo ya le hansi]
^ par. 9 Vukhongeri byin’wana byi vula leswaku swi hoxile ku vula vito ra Xikwembu, hambiloko hi khongela. Kambe vito rero ri humelela minkarhi ya kwalomu ka 7 000 eka tindzimi to sungula leti Bibele yi tsariweke ha tona, naswona ri humelela ngopfu eswikhongelweni ni le ka tipisalema leti tsariweke hi malandza yo tshembeka ya Yehovha.
[Xifaniso lexi nga eka tluka 5]
Ku va Eliya a tlhontlhe vaprofeta va Bali swi kombisa leswaku swikhongelo a swi yi endhawini yin’we