Tshinela Eka Xikwembu

“Mutwi Wa Xikhongelo”

1 TIKRONIKA 4:9, 10

XANA hakunene Yehovha Xikwembu wa swi hlamula swikhongelo leswi humaka embilwini swa vagandzeri vakwe lava tinyiketeleke? Rungula ra le Bibeleni ra wanuna loyi ku nga tiviwiki swo tala ha yena, ku nga Yabese, ri kombisa leswaku hakunene Yehovha i “Mutwi wa xikhongelo.” (Pisalema 65:2) Rungula leri ro koma ri kumeka endhawini leyi tikombaka yi nga tolovelekanga hikuva ri le xikarhi ka tindzimana to sungula ta buku ya Tikronika to Sungula. A hi kambisiseni 1 Tikronika 4:9, 10.

Rungula leri vulavulaka hi Yabese ri kumeka eka tindzimana letimbirhi ntsena. Hi ku ya hi ndzimana 9, mana wakwe u “n’wi [thye] vito ra Yabese, a ku: ‘Ndzi n’wi veleke hi ku vaviseka.’” * Ha yini a hlawule vito rero? Xana switlhavi leswi a veke na swona loko a veleka Yabese a swi hundza leswi a veke na swona loko a veleka vana lavan’wana? Xana swi nga ha endleka leswaku a ri noni, kutani a rilela leswaku nuna wakwe a a nga ri kona leswaku a ta amukela n’wana wa vona emisaveni? Bibele a yi boxi. Kambe siku rin’wana a a ta tinyungubyisa hi n’wana wakwe. Swi nga ha endleka leswaku vana vakwe lavan’wana se a va kurile, kambe “Yabese a a xiximeka ngopfu ku tlula vamakwavo.”

Yabese a a khongela swi huma embilwini minkarhi hinkwayo. U sungule xikhongelo xakwe hi ku kombela leswaku Xikwembu xi n’wi katekisa. Hiloko a endla swikombelo swinharhu leswi kombisaka leswaku a a ri ni ripfumelo leri tiyeke.

Xo sungula, Yabese u kombele Xikwembu a ku: “Kurisa ndhawu ya mina.” (Ndzimana 10) A a ri wanuna wo xiximeka naswona a a nga ri na makwanga yo teka ni tindhawu ta van’wana. Swi nga ha endleka leswaku xikombelo xakwe a xi khumba vanhu, ku nga ri ku va ni ndhawu leyikulu. Swi nga ha endleka leswaku a a lava ndhawu leyikulu leswaku vagandzeri va ntiyiso va Xikwembu va enela eka yona. *

Xa vumbirhi, Yabese u kombele leswaku “voko” ra Xikwembu ri va na yena. Voko ra Xikwembu ro fanekisela i matimba ya xona lawa xi ma tirhisaka ku pfuna vagandzeri va xona. (1 Tikronika 29:12) Leswaku a kuma leswi a swi kombeleke hi mbilu hinkwayo, Yabese u langutele eka Xikwembu lexi voko ra xona ri nga komangiki eka lava kombisaka ripfumelo eka xona.—Esaya 59:1.

Xa vunharhu, Yabese u khongele a ku: “U ndzi sirhelela ekhombyeni, leswaku ri nga ndzi vavisi.” Xiga lexi nge “ri nga ndzi vavisi” xi nga ha va xi vula leswaku u khongelele leswaku a nga sirheleleki eka khombo ntsena kambe nileswaku a nga vi ni gome kumbe ku hluriwa hi swiendlo swo biha.

Xikhongelo xa Yabese xi kombisa leswaku a a karhateka ngopfu hi vugandzeri bya ntiyiso ni hi ripfumelo leri a a ri na rona eka Mutwi wa xikhongelo. Xana Yehovha u angule njhani? Rungula leri ro koma ri gimeta hi marito lama nge: “Kutani Xikwembu xi n’wi nyika leswi a swi kombeleke.”

Mutwi wa xikhongelo a nga cincanga. Wa swi tlangela swikhongelo swa vagandzeri vakwe. Lava nga ni ripfumelo eka yena naswona va vekeke ntshembo wa vona eka yena va nga tiyiseka hi marito lawa: “Ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.”—1 Yohane 5:14.

[Tinhlamuselo ta le hansi]