Swivutiso Swa Vahlayi . . .

Xana Timbhoni Ta Yehovha Ta Va Hanyisa Vanhu Hi Singita?

▪ Timbhoni ta Yehovha a ti si tshama ti hanyisa vanhu. Ku fana na Yesu, ti tshemba leswaku ntirho wa tona lowukulu i ku chumayela mahungu lamanene ya Mfumo wa Xikwembu. Hi hala tlhelo, ti tshemba leswaku Vakreste va ntiyiso a va vonaki hi ku hanyisa vanhu, kambe ku ni nchumu wun’wana wa nkoka lowu va voniwaka ha wona.

Ku hanyisa loku endliweke hi Yesu Kreste hi lembe-xidzana ro sungula C.E. i ka nkoka eka hina hinkwerhu. A ku kombisa leswaku loko se a ta va Hosi ya Mfumo wa Xikwembu “ku hava munhu la tshamaka kona la nga ta ku: ‘Ndza vabya.’”—Esaya 33:24.

Ku vuriwa yini hi namuntlha? Vafundhisi va Vujagana ni vanhu van’wana lava nga eka vukhongeri lebyi nga riki bya Vukreste va vula leswaku va hanyisa vanhu hi singita. Kambe Yesu u lemukise hi vanhu lava a va ta vula leswaku va “[endla] masingita yo tala” hi vito rakwe. U vule leswaku u ta va byela a ku: “A ndzi kalanga ndzi mi tiva! Sukani eka mina, n’wina vaendli va leswo kala nawu.” (Matewu 7:22, 23) Xana ku hanyisa hi singita loku endliwaka hi vafundhisi namuntlha, ku kombisa ku amukeriwa hi Xikwembu kumbe ku katekisiwa hi xona?

Xiya leswi Bibele yi swi vulaka hi masingita yo hanyisa lawa Yesu a ma endleke. Loko hi ringanisa rungula ra le Matsalweni leri vulavulaka hi ku hanyisiwa ka vanhu ni loku endliwaka hi vafundhisi namuntlha, hi nga swi xiya loko hakunene ku hanyisa loku endliwaka namuntlha ku huma eka Xikwembu.

Yesu a a nga hanyisi vanhu leswaku a tikokela valandzeri kumbe vayingiseri vo tala. Ku hambana ni sweswo, masingita yo tala lawa a ma endleke u ma endlele exihundleni. Minkarhi yo tala a a byela vanhu lava a va hanyiseke leswaku va nga byeli munhu.—Luka 5:13, 14.

Yesu a a nga va hakerisi vanhu hikwalaho ka masingita lawa a a ma endla. (Matewu 10:8) A nga kona munhu loyi Yesu a tsandzekeke ku n’wi hanyisa. Vanhu hinkwavo lava vabyaka lava teke eka yena va hanyisiwe hi ku helela naswona ku horisiwa ka vona a ku nga titsheganga hi ripfumelo leri a va ri na rona. (Luka 6:19; Yohane 5:5-9, 13) Hi hala tlhelo, a a pfuxa ni vafi!—Luka 7:11-17; 8:40-56; Yohane 11:38-44.

Hambileswi a endleke masingita wolawo, xikongomelo xa vutirheli byakwe a ku nga ri xona xexo. Ematshan’weni ya sweswo, ntirho wakwe wa nkoka a ku ri ku chumayela mahungu lamanene ya Mfumo wa Xikwembu. Yesu u lerise valandzeri vakwe ku endla vanhu vadyondzisiwa, lava na vona a va ta byela van’wana hi ntshembo wo kuma rihanyo leri hetisekeke ehansi ka Mfumo wa Xikwembu.—Matewu 28:19, 20.

I ntiyiso leswaku van’wana va valandzeri va Yesu va lembe-xidzana ro sungula a va ri ni tinyiko to hanyisa hi singita, kambe hi ku famba ka nkarhi a ti ta hela. (1 Vakorinto 12:29, 30; 13:8, 13) Namuntlha Vakreste va ntiyiso a va vonaki hi ku hanyisa vanhu, kambe va vonaka hi rirhandzu ra xiviri leri va nga na rona. (Yohane 13:35) Ku hanyisiwa ka vanhu hi singita namuntlha a swi endlanga leswaku vanhu va tinxaka hinkwato va rhandzana.

Ku ni ntlawa wa Vakreste lava hlanganisiwaka hi rirhandzu lerova va papalata ku twisa van’wana ku vava hambiloko va pfa va tlulana milenge. I vamani? I Timbhoni ta Yehovha. Emisaveni hinkwayo, ti tiviwa hi ku kombisa rirhandzu ro fana ni ra Kreste. Ku hlanganisa vanhu va tinxaka hinkwato ni va mindhavuko hinkwayo i singita, naswona leswi swi nga koteka ntsena hikwalaho ka moya wa Xikwembu lowo kwetsima. Ha yini u nga yi eka yin’wana ya minhlangano ya tona leswaku u ta tivonela hi ya wena?

[Xifaniso lexi nga eka tluka 13]

Xana vafundhisi lava hanyisaka vanhu namuntlha hi singita (lava kombisiweke exineneni) va seketeriwa hi Xikwembu?