Dyondza Eka Rito Ra Xikwembu

Xikwembu I Mani?

Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. Xikwembu i mani?

Xikwembu xa ntiyiso i Muvumbi wa swilo hinkwaswo. Bibele yi n’wi vitana “Hosi leyi nga riki na makumu,” leswi vulaka leswaku a nga na masungulo naswona a nga na makumu. (Nhlavutelo 15:3) Leswi Xikwembu xi nga Xihlovo xa vutomi, hi fanele hi gandzela xona ntsena.—Hlaya Nhlavutelo 4:11.

2. Xana Xikwembu xi njhani?

A ku na munhu la tshameke a vona Xikwembu hikuva i Moya, leswi vulaka leswaku xi tlakukile eka swivumbiwa hinkwaswo leswi nga laha misaveni. (Yohane 1:18; 4:24) Timfanelo ta xona ti vonaka eka swilo leswi xi swi tumbuluxeke. Hi xikombiso, loko hi xiyisisa ndlela leyi mihandzu ni swiluva swo hambana-hambana swi vumbiweke ha yona, hi vona rirhandzu ra Xikwembu ni vutlhari bya xona. Ndlela leyi vuako byi nga kula ha yona byi kombisa matimba ya Xikwembu.—Hlaya Varhoma 1:20.

Hi nga dyondza swo tala hi vumunhu bya Xikwembu eBibeleni. Hi xikombiso, Bibele yi hi byela leswi Xikwembu xi swi rhandzaka ni leswi xi nga swi rhandziki, ndlela leyi xi va khomaka ha yona vanhu ni ndlela leyi xi angulaka ha yona eka swiyimo swo hambana-hambana.—Hlaya Pisalema 103:7-10.

3. Xana Xikwembu xi ni vito?

Yesu u te: “Tata wa hina la nge matilweni, vito ra wena a ri kwetsimisiwe.” (Matewu 6:9) Hambileswi Xikwembu xi nga ni swithopo swo tala, xi ni vito rin’we ntsena. Vito rero ri vitaniwa hi tindlela leti nga faniki hi ku ya hi tindzimi. Hi Xitsonga i “Yehovha.”—Hlaya Pisalema 83:18.

Vito ra Xikwembu ri susiwile eTibibeleni to tala naswona ri siviwe hi xithopo lexi nge Hosi kumbe Xikwembu. Kambe loko Bibele yi tsariwa, vito leri a ri humelela minkarhi ya kwalomu ka 7 000. Yesu u endle leswaku vito ra Xikwembu ri tiveka hi ku va a ri tirhisa loko a hlamusela vanhu Rito ra xona. U pfune vanhu leswaku va tiva Xikwembu.—Hlaya Yohane 17:26.

  4. Xana Yehovha wa khathala hi hina?

Yehovha u kombisa leswaku wa khathala hi hina hi ku yingisa swikhongelo swa hina hi ku kongoma. (Pisalema 65:2) Xana ku xaniseka ko tala loku nga kona ku kombisa leswaku Xikwembu a xi na mhaka na hina? Vanhu van’wana va vula leswaku xi hi ringa hi ku endla leswaku hi xaniseka, kambe sweswo a hi ntiyiso. Bibele yi ri: “A swi ve ekule swinene ni Xikwembu xa ntiyiso leswaku xi endla hilaha ku hombolokeke.”—Yobo 34:10; hlaya Yakobo 1:13.

Xikwembu xi nyike vanhu ntshunxeko wo tihlawulela. Hi nga kombisa leswaku hi tlangela lunghelo leri hi ku hlawula ku xi tirhela. (Yoxuwa 24:15) Lexi endlaka leswaku ku xaniseka ku andza hileswi vanhu va endlelaka van’wana swilo swo biha. Sweswo swi twisa Yehovha ku vava.—Hlaya Genesa 6:5, 6.

Ku nga ri khale, Yehovha u ta tirhisa Yesu leswaku a herisa ku xaniseka ni vanhu lava ku vangaka. Kambe sweswi u ni xivangelo lexi twalaka xo pfumelela ku xaniseka leswaku ku ya emahlweni swa xinkarhana. Xihloko lexi nga ta landzela xi ta hlamusela leswaku ha yini Xikwembu xi pfumelela ku xaniseka.—Hlaya Esaya 11:4.

5. I yini leswi Xikwembu xi lavaka leswaku hi swi endla?

Yehovha u hi vumbe hi ri ni vuswikoti byo n’wi tiva ni ku n’wi rhandza. U lava leswaku hi dyondza ntiyiso ha yena. (1 Timotiya 2:4) Loko hi dyondza Bibele, Xikwembu xi nga va Munghana wa hina.—Hlaya Swivuriso 2:4, 5.

Leswi Yehovha a hi nyikeke vutomi, hi fanele hi n’wi rhandza ku tlula vanhu hinkwavo. Hi nga kombisa leswaku ha n’wi rhandza hi ku vulavula na yena hi xikhongelo ni ku endla leswi a lavaka leswaku hi swi endla. (Swivuriso 15:8) Yehovha u lava leswaku hi rhandzana.—Hlaya Marka 12:29, 30; 1 Yohane 5:3.

Leswaku u kuma rungula leri engetelekeke, vona ndzima 1 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.

[Xifaniso lexi nga eka tluka 17]

Xana ku ni xivangelo lexi twalaka xo va ku pfumeleriwa ku xaniseka leswaku ku ya emahlweni swa xinkarhana?