Vuprofeta Bya Vumbirhi. Ndlala

“Ku ta va ni ku kayivela ka swakudya.”—MARKA 13:8.

● Wanuna u balekele eximutanini xa Quaratadji, le Niger hikwalaho ka ndlala. Vamuzala wakwe ni vamakwavo wakwe va xinuna ni va xisati na vona va balekele eximutanini xexo hikwalaho ka ndlala. Kambe u etlele emeteni a ri swakwe. Ha yini a ri swakwe? Sidi, la nga hosi ya ximutana xexo u ri: “U tsandzeka ku wundla [ndyangu wakwe] naswona a nge swi koti ku ya emahlweni a wu vona wu xaniseka.”

I YINI LESWI MATIMU MA SWI VULAKA? Emisaveni hinkwayo, siku ni siku munhu un’we eka va nkombo a nga kumi swakudya leswi ringaneke. Kambe leswi a hi nchumu loko swi ringanisiwa ni leswi endlekaka edzongeni wa Sahara eAfrika, laha munhu un’we eka vanharhu ku helaka nkarhi wo leha a nga si kuma swakudya leswi ringaneke. Leswaku u vona mhaka leyi hi mahlo ya mianakanyo, ehleketa hi ndyangu lowu nga ni tatana, manana ni n’wana. Loko ku ri ni swakudya leswi ringanaka vanhu vambirhi ntsena, xana i mani loyi a nga ta ka a nga dyi? I tatana? i manana kumbe i n’wana? Leswi i swin’wana swa swiboho leswi mindyangu yo tano yi faneleke yi swi endla siku ni siku.

I YINI LESWI VANHU VA SWI VULAKA? Misava yi humesa swakudya leswi nga ringanaka vanhu hinkwavo. Vanhu va fanele va ri khathalela kahle rifuwo ra misava.

XANA LESWI VA SWI VULAKA I NTIYISO? I ntiyiso leswaku namuntlha van’wamapurasi va tshovela swakudya swo tala ku tlula enkarhini lowu hundzeke. Tihulumendhe ta vanhu ti fanele ti lawula mphakelo wa swakudya leswaku ti lulamisa xiphiqo xa ndlala. Kambe, hambileswi se ku hundzeke makume ya malembe ti ri karhi ti ringeta, ti tsandzekile.

U EHLEKETA YINI? Xana Marka 13:8 yi karhi ya hetiseka? Hambileswi thekinoloji yi nga hluvuka, xana ku kayivela ka swakudya swi khumba vanhu emisaveni hinkwayo?

Ku tsekatseka ka misava ni ndlala hi swona swiphiqo leswikulu ku tlula leswin’wana leswi na swona swi nga xikombiso xa masiku ya makumu.

[Marito lama tshahiweke exihlokweni lama nga eka tluka 5]

“N’wana un’we eka vanharhu la faka hi vuvabyi bya nyumoniya, vuvabyi bya nchuluko ni mavabyi man’wana a a ta va a nga fanga loko a a kume swakudya leswi ringaneke.”—ANN M. VENEMAN, KHALE KA MULAWURI-NKULU WA NHLANGANO WA MATIKO LOWU LANGUTELAKA TIMALI TA VANA.

[Laha Xifaniso Xi Humaka Kona eka tluka 5]

© Paul Lowe/Panos Pictures