“MUNHU [u fuma] munhu ku n’wi endla swo biha.” (Eklesiasta 8:9) Marito wolawo lama tsariweke emalembeni ya kwalomu ka 3 000 lama hundzeke, ma yi hlamusela kahle misava leyi hi hanyaka eka yona. Vanhu va ni mboyamelo wo tirhisa matimba hi ndlela yo biha, ku nga khathariseki leswaku i vamani kumbe laha va tshamaka kona. Hakanyingi va tshikilela vanhu lava nga swi kotiki ku tisirhelela ni swisiwana. Xana Yehovha u titwa njhani hi vuhomboloki byo tano? Nhlamulo hi yi kuma eka Ezekiyele 22:6, 7, 31.—Yi hlaye.

Eka Nawu wakwe lowu a wu nyikeke Vaisrayele, Yehovha u swi veke erivaleni leswaku lava a va ri ni swikhundlha a va nga fanelanga va tirhisa matimba ya vona hi ndlela yo biha. A a ta katekisa tiko loko ntsena varhangeri va khoma swisiwana hi musa ni ku swi anakanyela. (Deteronoma 27:19; 28:15, 45) Hambiswiritano, tindhuna leti hanyeke hi nkarhi wa Ezekiyele ta le Yerusalema ni le Yuda a ti tirhisa vulawuri bya tona hi ndlela yo biha. Xana a ku endleka yini?

Tindhuna a ti tirhisa “voko ra [tona] hi xikongomelo xo halata ngati.” (Ndzimana 6) Rito leri nge “voko” ri yimela matimba kumbe vulawuri. Xisweswo vuhundzuluxeri byin’wana byi ri: “Tihosana ta le Israyele . . . ti tirhise matimba ya tona leswaku ti halata ngati.” Xana i mani loyi a a ta endla leswi nawu wu swi vulaka ni ku khutaza van’wana leswaku va wu yingisa ku ri hileswaku tindhuna a ti tirhisa matimba ya tona ni ku dlaya vanhu lava nga dyangiki xa munhu?

Endzhaku ko vula leswi, entiyisweni Ezekiyele a a nga hehli ntsena varhangeri kambe ni lava va va landzeleke eka ku nga yingisi Nawu wa Yehovha. Ezekiyele u ri: “Va hlekule tatana na manana.” (Ndzimana 7) Hi ku nga xiximi xikhundlha lexi Yehovha a a xi nyike vatswari, vanhu va onhe xisekelo xa tiko, ku nga mindyangu leyi tiyeke.—Eksoda 20:12.

Vanhu vo homboloka va sungule ku dyelela swisiwana leswi a va tshama na swona. Nkarhi na nkarhi loko va nga wu yingisi Nawu a va kombisa ku honisa moya wa rirhandzu lowu a wu sekeriwa hi Nawu lowu Xikwembu a xi wu nyike Vaisrayele. Hi xikombiso, Nawu wa Xikwembu a wu lerisa Vaisrayele leswaku va kombisa ku anakanyela ko hlawuleka eka vanhu lava a va tshama na vona lava nga riki Vaisrayele. (Eksoda 22:21; 23:9; Levhitika 19:33, 34) Kambe vanhu va “dyelele” muluveri loyi a ri exikarhi ka vona.—Ndzimana 7.

Vanhu va tlhele va khoma vanhu lava a va nga swi koti ku tisirhelela hi tihanyi—ku nga “n’wana la nga riki na tatana ni noni.” (Ndzimana 7) Yehovha u swi tekela enhlokweni swinene swilaveko swa munhu loyi a feriweke hi mutswari kumbe hi munghana wakwe wa vukati. Xikwembu xi tshembise leswaku xi ta avanyisa lava xanisaka n’wana kumbe noni leyi nga swi kotiki ku tisirhelela.—Eksoda 22:22-24.

Hikwalaho ka leswi ni swin’wana, Vaisrayele lava hanyeke hi nkarhi wa Ezekiyele a va tlule Nawu wa Xikwembu lowu sekeriweke eka rirhandzu. Xana Yehovha a a ta endla yini? U tshembise a ku: “Ndzi ta chululela xigwevo xa mina ehenhla ka vona.” (Ndzimana 31) Rito rakwe a ri welanga ehansi, u pfumelele Vababilona leswaku va lovisa muti wa Yerusalema kutani va teka vanhu va wona va va yisa evukhumbini hi 607 B.C.E.

Marito ya Ezekiyele ma hi dyondzisa tidyondzo timbirhi hi Yehovha ni hi vuhomboloki: Yo sungula, wa byi venga; ya vumbirhi, u ni ntwela-vusiwana eka vanhu lava pfumalaka nandzu. Xikwembu a xi si cinca. (Malakiya 3:6) Xi tshembisa leswaku ku nga ri khale xi ta herisa vuhomboloki ni lava va byi hlohlotelaka. (Swivuriso 2:21, 22) Ha yini u nga dyondzi swo tala hi Xikwembu lexi “[rhandzaka] vululami” ni ndlela leyi u nga tshinelaka ha yona eka xona?—Pisalema 37:28.

Tindzimana ta Bibele leti u nga ti hlayaka hi August:

▪ Ezekiyele 21-38

[Marito lama tshahiweke exihlokweni lama nga eka tluka 27]

Yehovha u swi veke erivaleni leswaku lava a va ri ni swikhundlha a va nga fanelanga va tirhisa matimba ya vona hi ndlela yo biha