Dyondza Eka Rito Ra Xikwembu
Xana Xikwembu Xi Ta Simeka Hulumendhe Ya Misava Hinkwayo?
Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.
1. Ha yini vanhu va lava hulumendhe ya misava hinkwayo?
Hakanyingi swiphiqo swa vanhu namuntlha swa fana emisaveni hinkwayo. Ematikweni man’wana, vanhu vo tala i swisiwana naswona va tshikileriwa. Eka man’wana, swi tikomba onge vanhu vo tala i swigwili. I mfumo wa misava hinkwayo lowu nga kotaka ku avela vanhu swilo hi ndlela leyinene.—Hlaya Eklesiasta 4:1; 8:9.
2. I mani la nyikiweke vutihlamuleri byo fuma hulumendhe ya misava hinkwayo?
Mhaka leyi ya mufumi wa misava a yi amukeriwi hikuva a ku na wanuna kumbe wansati loyi a nga kotaka ku wu endla kahle ntirho wolowo. Ku hava munhu la nga tsakeriwaka hi vanhu hinkwavo. Loko munhu a kuma xikhundlha, u endla swilo swa vukanganyisi. Mhaka ya leswaku mufumi un’we la nga ni tihanyi a fuma vanhu hinkwavo yi tsema nhlana.—Hlaya Swivuriso 29:2; Yeremiya 10:23.
Yehovha Xikwembu u hlawule N’wana wakwe, Yesu, leswaku a fuma vanhu hilaha ku nga heriki. (Luka 1:32, 33) Yesu wa swi tiva leswaku swi njhani ku hanya emisaveni. Loko a ri laha misaveni, u horise lava vabyaka, a dyondzisa lavo rhula a tlhela a heta nkarhi ni vana. (Marka 1:40-42; 6:34; 10:13-16) Kutani Yesu i Mufumi la fanelekaka.—Hlaya Yohane 1:14.
3. Xana swa koteka leswaku ku va ni hulumendhe leyi fumaka misava hinkwayo?
Xikwembu xi veke N’wana wa xona leswaku a fuma misava a ri etilweni. (Daniyele 7:13, 14) Tanihi leswi munhu wa nyama swi nga bohiki leswaku a va etikweni rin’wana ni rin’wana leri a ri fumaka, Yesu na yena a nga boheki leswaku a va laha misaveni hi xiviri leswaku a kota ku fuma vanhu.—Hlaya Matewu 8:5-9, 13.
Xana munhu un’wana ni un’wana u ta amukela Yesu tanihi Mufumi? Doo! I vanhu lava rhandzaka leswinene lava nga ta n’wi amukela. Yehovha u ta lovisa lava alaka Mufumi loyi a n’wi vekeke loyi a nga ni rirhandzu ni vululami.—Hlaya Matewu 25:31-33, 46.
4. Xana Mufumi wa misava u ta endla yini?
Ku fana ni murisi loyi a hlengeletaka tinyimpfu, Yesu se u sungule ku hlengeleta vanhu vo rhula lava humaka eka matiko hinkwawo ni ku va dyondzisa tindlela ta Xikwembu ta rirhandzu. (Yohane 10:16; 13:34) Vanhu vo tano va va vaseketeri lava hisekaka va Yesu ni mfumo wakwe. (Pisalema 72:8; Matewu 4:19, 20) Emisaveni hinkwayo, vaseketeri va Yesu lava tshembekaka va twarisa hi vun’we leswaku Yesu se i Hosi.—Hlaya Matewu 24:14.
Ku nga ri khale, Yesu u ta tirhisa matimba yakwe leswaku a ntshunxa vanhu ehansi ka hulumendhe leyi nga ni vukanganyisi. U hlawule valandzeri vakwe van’wana lava tshembekaka leswaku va fuma na yena tanihi tihosi etilweni. (Daniyele 2:44; 7:27) Mfumo wa Yesu wu ta tata misava hinkwayo hi ku tiva Yehovha naswona wu ta simeka paradeyisi leyi lahlekeke eku sunguleni ka matimu ya vanhu.—Hlaya Esaya 11:3, 9; Matewu 19:28.
U Nga Ha Tsakela
XIHONDZO XO RINDZA
Ha Yini Xikwembu Xi Rhume Yesu eMisaveni?
Vona leswaku ha yini Yesu a te emisaveni ni ndlela leyi hi vuyeriwaka ha yona namuntlha.
XIHONDZO XO RINDZA
Xana U Nga Hanya Hilaha Ku Nga Heriki?
Xihlovo xa Vutomi, ku nga Yehovha Xikwembu a nga nyika vanhu vutomi lebyi nga heriki naswona u tshembise ku endla tano.
XIHONDZO XO RINDZA
Xana Ku Ta Humelela Yini Hi Siku Ra Vuavanyisi?
Ku ni swilo swo tala swo hambana-hambana leswi tshembiwaka hi Siku ra Vuavanyisi. Xana ri fanele ri chaviwa? Xana ri ta hetisisa yini?
XIHONDZO XO RINDZA
I Mani Yesu Kreste?
Ha yini Yesu a file? Xana Yesu u endla yini sweswi? Kuma ta tinhlamulo ta kona ni swivutiso swin’wana eBibeleni ya wena.
