Xikwembu xi yingisa swikhongelo swa vanhu vo huma ematikweni hinkwawo. (Pisalema 145:18, 19) Rito ra xona, ku nga Bibele, ri hi khutaza leswaku hi vulavula na xona hi swilo swin’wana ni swin’wana leswi hi karhataka. (Vafilipiya 4:6, 7) Kambe swikhongelo swin’wana a swi xi tsakisi Xikwembu. Hi xikombiso, ku phindha-phindha swikhongelo leswi hlokohatiweke a swi xi tsakisi.—Hlaya Matewu 6:7.

Nakambe, Yehovha a nga swi tsakeli swikhongelo swa vanhu lava tlulaka nawu wakwe hi vomu. (Swivuriso 28:9) Hi xikombiso, eminkarhini ya ku tsariwa ka Bibele, Xikwembu xi ale ku yingisa Vaisrayele lava a va ri ni nandzu wa ku dlaya. Swi le rivaleni leswaku hi fanele hi fikelela swilaveko swo karhi leswaku hi twiwa hi Xikwembu.—Hlaya Esaya 1:15.

A hi nge khongeli eka Xikwembu hi nga ri na ripfumelo. (Yakobo 1:5, 6) Hi fanele hi kholwa leswaku xi kona naswona xa khathala hi hina. Hi nga tiyisa ripfumelo ra hina hi ku hlaya Bibele hikuva ripfumelo ra xiviri ri titshege hi vumbhoni ni switiyisekiso leswi kumekaka eRitweni ra Xikwembu.—Hlaya Vaheveru 11:1, 6.

Hi fanele hi khongela hi mbilu hinkwayo hi ku titsongahata. Hambi ku ri N’wana wa Xikwembu, Yesu, a a titsongahata loko a khongela. (Luka 22:41, 42) Kutani, ematshan’weni yo byela Xikwembu leswi xi faneleke xi swi endla, hi fanele hi ringeta ku twisisa swilaveko swa xona hi ku va hi hlaya Bibele. Kutani hi nga khongela hi ku pfumelelana ni ku rhandza ka Xikwembu.—Hlaya 1 Yohane 5:14.