“XIKWEMBU i Moya” naswona a hi nge swi koti ku xivona hi mahlo ya nyama. (Yohane 4:24) Kambe, Bibele yi vula leswaku vanhu van’wana va xi vonile hi ndlela yo karhi. (Vaheveru 11:27) Va xi vone njhani? Xana hakunene u nga swi kota ku vona “Xikwembu lexi nga vonakiki”?—Vakolosa 1:15.

Fananisa xiyimo xa hina ni xa munhu loyi a velekiweke a ri bofu. Xana xiyimo xakwe xi n’wi endla a nga koti ku swi twisisa swilo leswi endlekaka endhawini leyi a tshamaka eka yona? Nikatsongo! Munhu loyi a nga bofu u kota ku twisisa rungula hi tindlela to hambana-hambana leti n’wi endlaka a kota ku tiva nchumu wo karhi, ku twisisa vanhu ni swilo leswi endlekaka. Munhu un’wana loyi a nga bofu u te: “Ku vona a swi le matihlweni kambe swi le miehleketweni.”

Hilaha ku fanaka, leswi u nga taka u nga swi koti ku vona Xikwembu hi mahlo ya wena ya nyama, u nga kota ku xi vona hi ‘mahlo ya mbilu ya wena.’ (Vaefesa 1:18) Xiya tindlela tinharhu leti u nga swi endlaka ha yona sweswo.

Hakanyingi switwi swa munhu loyi a nga bofu swi tirha hi ku hatlisa, xisweswo swi n’wi pfuna leswaku a kota ku twisisa swilo leswi a nga swi voniki. Hilaha ku fanaka, u nga kota ku vona Xikwembu lexi nga vonakiki hi ku va u kambisisa swilo leswi u swi vonaka leswi xi swi tumbuluxeke. “Timfanelo ta xona leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke.”—Varhoma 1:20.

Hi xikombiso, anakanya hi misava leyi hi hanyaka eka yona. Misava leyi yi tumbuluxiwe hi ndlela yo hlawuleka leswaku hi ta tsakela vutomi eka yona. Loko hi twa ku hunga ka rimoyana ro tenga, nantswo wa mbhandzu wo nandziha, loko hi orha masana ni loko hi twa vuyimbeleri byo tsokombela bya tinyenyana, ha tsaka swinene. Xana leswi hinkwaswo a swi kombisi ku anakanyela, rirhandzu ni ku hanana ka Muvumbi wa hina?

Loko u vona swilo leswi Xikwembu xi swi tumbuluxeke, u nga dyondza yini hi xona? Matilo ma kombisa matimba ya Xikwembu. Nkambisiso wa sayense lowu wa ha ku endliwaka, wu kombisa leswaku misava yi ndlandlamuka hi rivilo lerikulu swinene. Loko u languta exibakabakeni nivusiku, tivutise: ‘I matimba ya mani lama endlaka leswaku vuako byi va hi ndlela leyi?’ Bibele yi hi byela leswaku Muvumbi u ni “matimba lamakulu.” (Esaya 40:26) Ntumbuluko wa Xikwembu wu kombisa leswaku i xa “Matimba Hinkwawo,” naswona xi “tlakukile hi matimba.”—Yobo 37:23.

Manana loyi a nga ni vana vambirhi lava nga mabofu u ri: “Ku vulavula i swa nkoka loko u ri karhi u va dyondzisa. Va byele xin’wana ni xin’wana lexi u xi vonaka ni lexi u xi twaka naswona tiyimisele ku va byela xin’wana ni xin’wana loko mi ri endleleni. Wena u mahlo ya vona.” Hilaha ku fanaka, hambileswi ku nga riki “na munhu la tshameke a vona Xikwembu.” Yesu N’wana wa Xikwembu loyi a nga ‘exifuveni xa Tata wa yena, hi yena loyi a xi hlamuseleke.’ (Yohane 1:18) Leswi a nga xivumbiwa xo sungula ku tumbuluxiwa, Yesu N’wana wa Xikwembu loyi a tswariweke a ri yexe, u hi pfunile leswaku hi kota ku tiva Xikwembu. Hi yena ntsena loyi a hi pfuneke hi twisisa Xikwembu lexi nga vonakiki.

Xiya swilo swi nga ri swingani leswi hlamuseriwaka hi Yesu loyi a hanyeke ni Tata wakwe malembe ya ntsandza vahlayi:

• Xikwembu xi tirha xi nga wisi. “Tata wa mina u ya emahlweni a tirha ku fikela sweswi.”—Yohane 5:17.

• Xikwembu xi tiva swilaveko swa hina. ‘Tata wa n’wina  wa swi tiva swilo leswi mi swi lavaka mi nga si swi kombela eka yena.’—Matewu 6:8.

• Xikwembu xa hi khathalela. ‘Tata wa n’wina la nge matilweni, . . . u tsuvukisa dyambu ra yena eka vanhu vo homboloka ni lavanene naswona u nisa mpfula yakwe ehenhla ka vanhu lava lulameke ni lava nga lulamangiki.’—Matewu 5:45.

• Xikwembu xi teka un’wana ni un’wana wa hina a ri wa nkoka. “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: Mi ni risima ku tlula swindzingiri swo tala.”—Matewu 10:29-31.

Vanhu lava nga mabofu hakanyingi va twisisa swilo hi tindlela leti hambaneke ni ta vanhu lava kotaka ku vona. Munhu loyi a nga bofu a nga kota ku hambanisa ndzhuti ni xinyama. Ku fana ni munhu loyi a nga bofu loyi a nga kotiki ku vona ndzhuti kumbe ku vonakala ka dyambu, na hina a hi nge swi koti ku twisisa Yehovha handle ko pfuniwa. Hikwalaho, Yehovha u rhumele munhu loyi a tikombiseke hi ku helela timfanelo ni vumunhu byakwe.

Munhu yoloye i Yesu. (Vafilipiya 2:7) Yesu a nga lo vulavula ntsena hi Tata wakwe kambe u tlhele a hi komba leswaku i Xikwembu xa njhani. Filipi mudyondzisiwa wa Yesu u te: “Hosi, hi kombe Tatana.” Yesu u n’wi hlamule a ku: “Loyi a ndzi voneke u vone na Tatana.” (Yohane 14:8, 9) I yini leswi u nga kotaka ku swi vona hi Tatana eka swiendlo swa Yesu?

Yesu a ri ni rirhandzu, a ti tsongahata naswona a ngheneka. (Matewu 11:28-30) Vumunhu byakwe byi endle leswaku vanhu va kota ku va ni vuxaka na yena. Yesu a a twa ku vava loku vanhu van’wana a va ku twa naswona a tsaka na vona loko va tsakile. (Luka 10:17, 21; Yohane 11:32-35) Loko u ri karhi u hlaya kumbe u twa hi rungula ra Yesu eBibeleni, dzikisa mianakanyo ya wena kutani u endla rungula ri va ra xiviri emianakanyweni ya wena. Loko u anakanyisisa hi ndlela leyi Yesu a tirhisaneke ha yona ni vanhu, u ta swi kota kahle ku vona vumunhu lebyi tsakisaka bya Xikwembu naswona u ta tshinela eka xona.

Loko mutsari un’wana a hlamusela ndlela leyi munhu loyi a nga bofu a kotaka ha yona ku twisisa swilo leswi nga kona laha misaveni, u te: “U twisisa swilo ha katsongo-tsongo hi tindlela to hlayanyana (ku khumba, nun’hwelo, ku twa ni swin’wana) naswona hi ndlela yo karhi u fanele a hlanganisa rungula rero ri va nchumu wun’we.” Hi laha ku fanaka, loko u xiya swilo leswi Xikwembu xi swi vumbeke, u hlaya leswi Yesu a swi vuleke hi Tata wakwe u tlhela u anakanyisisa hi ndlela leyi Yesu a tikombiseke ha yona timfanelo ta Xikwembu, u ta kota ku n’wi vona kahle Yehovha. U ta va wa xiviri eka wena.

Yobo loyi a hanyeke eminkarhini ya khale, na yena u tshame a yi xiya mhaka leyi. Eku sunguleni a a vulavula a “nga ri na ku twisisa.” (Yobo 42:3) Kambe endzhaku ko kambisisa swilo swo hlamarisa leswi Xikwembu xi swi tumbuluxeke, Yobo u susumeteleke ku vula a ku: “Ndzi twe ha wena hi mahungu-ndlela, kambe sweswi tihlo ra mina ra ku vona.”—Yobo 42:5.

Na wena u nga ha titwa hi ndlela leyi fanaka. ‘Loko u lavisisa Yehovha, u ta endla leswaku u n’wi kuma.’ (1 Tikronika 28:9) Timbhoni ta Yehovha ti ta swi tsakela ku ku pfuna leswaku u lava u tlhela u kuma Xikwembu lexi nga vonakiki.