Rifu ra Yesu i xiendlakalo xa nkoka ematin’wini ku tlula hinkwaswo—u file leswaku vanhu va kuma vutomi. Munhu a nga tumbuluxiwanga a ri ni mboyamelo wo endla swilo swo biha, a vabya kumbe a fa. (Genesa 1:31) Kambe xidyoho xi nghene emisaveni hikwalaho ka munhu wo sungula ku nga Adamu. Yesu u nyikele hi vutomi byakwe leswaku a hi ponisa eka xidyoho ni rifu.—Hlaya Matewu 20:28; Varhoma 6:23.

Xikwembu xi kombise rirhandzu lerikulu hi ku rhumela N’wana wa xona emisaveni leswaku a ta hi fela. (1 Yohane 4:9, 10) Yesu u byele valandzeri vakwe leswaku va tsundzuka rifu rakwe hi ku va va endla nkhuvo wo olova wa xinkwa ni vhinyo. Loko hi endla tano lembe ni lembe, hi va hi khensa rirhandzu leri Xikwembu na Yesu va hi kombeke rona.—Hlaya Luka 22:19, 20.

Loko Yesu a byela vadyondzisiwa vakwe ro sungula leswaku va tsundzuka rifu rakwe, u vulavule hi ntwanano kumbe mpfumelelano. (Matewu 26:26-28) Sweswo swi endle leswaku vadyondzisiwa vakwe ni vanhu va nhlayo yo karhi va va tihosi ni vaprista na yena etilweni. Hambileswi vanhu va ntsandza vahlayi va tlangelaka siku ra ku fa ka Yesu, ko va lava nga eka ntwanano wolowo ntsena lava dyaka xinkwa ni ku nwa vhinyo.—Hlaya Nhlavutelo 5:10.

Se ku hundze malembe ya kwalomu ka 2 000 Yehovha a ri karhi a hlawula lava nga ta va tihosi. (Luka 12:32) Vanhu volavo i vatsongo loko va ringanisiwa ni lava nga ta hanya hilaha ku nga heriki laha emisaveni.—Hlaya Nhlavutelo 7:4, 9, 17.