Siku ni siku, vanhu vo tala va kulula va n’watseka leswaku va kuma swilo leswi va swi lavaka. Lexi twisaka ku vava, swa tika ku kuma leswi va swi lavaka hikwalaho ka swiphiqo swa misava leyi. Hikwalahokayini?

• Loko etindhawini to karhi timhangu ku ri tshamela maxelo, hakanyingi swakudya ni ndhawu yo tshama swa durha swinene.

• Timhangu ti nga endla leswaku mitirho yi kala kumbe vatirhi va hunguteriwa muholo.

• Makhombo ma nga onha mabindzu, makaya kumbe nhundzu naswona sweswo swi nga ha va siya va ri evuswetini.

• Loko u yi tirhisa kahle mali ya wena swi ta ku pfuna leswaku u lunghekela swiyimo swo tika.

• Tsundzuka leswaku ku va na timali, ntirho lowu holelaka, mali leyi u yi hlayiseke ebangi kumbe nhundzu leyi u nga na yona swi nga ha hela hi ku tsopeta ka tihlo.

• Ku ni swilo leswi mali yi nga kotiki ku swi xava, swo tanihi ntsako ni ku va ni vun’we ekaya.

Bibele yi ri: “Loko hi ri ni swakudya ni swiambalo hi ta eneriseka hi swilo leswi.”—1 Timotiya 6:8.

Ku eneriseka hi leswi hi nga na swona swi ta endla leswaku hi tsaka loko hi kuma swilo leswi hi swi lavaka. Leswi i swa nkoka ngopfungopfu loko hi ri ni mali yitsongo.

Leswaku u eneriseka hileswi u nga na swona, u fanele u tidyondzisa ku papalata ku xava swilo swo durha. Loko u tshamela ku xava swilo leswi u tsandzekaka ku swi hakelela, swi ta ku vangela swiphiqo swo tala.