Sweswo swi vuriwe hi ntlawa wa valavisisi vamatiko mayelana ni ku cinca ka maxelo. Loko u tshembela eka Muvumbi loyi a khathalaka hi vanhu, swilo leswi swi nga ku tsundzuxa hi leswi van’wasayense va swi vuleke hi tindlela to tala leti Xikwembu xi endleke misava leswaku yi tivuyetela.

Nilokoswiritano, leswi vanhu va onheke misava swinene, a yi nge swi koti ku tivuyetela hi yoxe. Hikwalahokayini hi tiyiseka leswaku Xikwembu xi ta endla swo karhi hi yona?

Xiya matsalwa lama xaxametiweke eka bokisi lama hi tiyisekisaka leswaku misava yi ta pona hambi ku ri ku ya emahlweni yi va kona.

• Misava ya hina yi vumbiwe hi Xikwembu. “Eku sunguleni Xikwembu xi tumbuluxe tilo ni misava.”—Genesa 1:1.

• Xikwembu i n’wini wa misava. “Misava ni swilo hinkwaswo leswi nga eka yona i swa Yehovha.” a—Pisalema 24:1.

• Xikwembu xi tumbuluxe misava leswaku yi pona. “U tiyise masungulo ya misava; a yi nge susiwi endhawini ya yona hilaha ku nga heriki.”—Pisalema 104:5

• Xikwembu xi tshembisa leswaku hi ta hanya laha misaveni hilaha ku nga heriki. ‘Xikwembu xa ntiyiso, Loyi a vumbeke misava, . . . a nga yi tumbuluxelanga swa hava, kambe u yi vumbele leswaku ku tshamiwa eka yona.’—Esaya 45:18

• Xikwembu xi tshembisa leswaku hi ta hanya laha misaveni hilaha ku nga heriki. “Lavo lulama va ta tshama emisaveni, va ta hanya eka yona hilaha ku nga heriki.” —Pisalema 37:29

Xikwembu xi endle misava leswaku vanhu va tiphina hi vutomi handle ko va va yi onha. Bibele yi profeta leswaku Yehovha Xikwembu hi nkarhi wakwe lowu a wu vekeke, u ta lovisa vanhu lava onhaka misava.—Nhlavutelo 11:18

Bibele yi tshembisa leswaku Xikwembu xi ta endla leswaku misava yi va leyinene, yi va paradeyisi leyi sasekeke naswona xi ta ‘pfula voko ra xona xi enerisa ku navela ka swivumbiwa hinkwaswo leswi hanyaka.”—Pisalema 145:16