TA RIVALA
Ta Lava Gangisanaka
Loko swi ta eka ku rhandzana, xana Bibele hi yona yo sungula leyi a wu ta ya eka yona leswaku u kuma xitsundzuxo kumbexana a yi ta va yo hetelela? Xiya ndlela leyi vutlhari bya yona bya khale byi pimanisiwaka ha yona ni mindzavisiso ya sweswinyana.
Indiya
Hi ku ya hi nkambisiso lowu endliweke hi 2014, wu kombisa leswaku vantshwa lava ringanaka 61 wa tiphesente lava nga exikarhi ka malembe ya 18 na 25 va tshemba leswaku ku endla timhaka ta masangu va nga si tekana “a ka ha ri mhaka yo biha le Indiya.” Dokodela wa le Mumbai u byele vatsari va phephahungu ra Hindustan Times leswaku hi ku ya hi vonelo rakwe “loko vantshwa va sungula ku rhandzana a swi vuli swona leswaku va va va ehlekete hi ku tekana. Ku nga khathariseki leswaku xikongomelo xa vona i ku endla timhaka ta masangu ntsena, ku rhandzana va nga tiyimiselanga kumbe ku tshama swin’we, va va va nga tiyimiselanga ku tekana.”
MHAKA YO ANAKANYISISA HA YONA: Xana vuvabyi lebyi tlulelaka hi ku endla timhaka ta masangu ni ntshikilelo swi fambisana ngopfu ni ku va vanhu va endla timhaka ta masangu va nga si tekana kumbe endzhaku ka loko va tekanile?—1 Vakorinto 6:18.
Denmark
Ku tshamela ku holova ni swirho swa ndyangu swi nga endla leswaku munhu a va ekhombyeni ro fa loko a ri emalembeni ya le xikarhi. Vakambisisi va le Yunivhesiti ya Copenhagen va landzelerise vanhu va kwalomu ka 10 000 lava nga emalembeni ya le xikarhi, va hete malembe yo tlula 11 va endla ndzavisiso naswona va kume leswaku vanhu lava holovaka ni swirho swa mindyangu ya vona hakanyingi va fa va ha ri vatsongo loko va pimanisiwa ni lava nga holoviki. Mutsari wa ndzavisiso wolowo u vula leswaku ku lulamisa swiphiqo ni timholovo ku katsa ni swilaveko swa vona “swi fanele swi tekeriwa enhlokweni leswaku vanhu va papalata ku fa va ha ri vatsongo.”
BIBELE YI RI: “Un’wana ni un’wana la hlwelaka ku vula marito yakwe u ni vutivi, naswona munhu la nga ni ku twisisa u ni moya wo rhula.”—Swivuriso 17:27.
United States
Hi ku ya hi nkambisiso wa sweswinyana lowu endliweke eka vanhu va 564 lava ha ku tekanaka eLouisiana, lava va tshamelaka ku hambana va tlhela va vuyelelana loko va nga si tekana, hakanyingi va hambana ku ringana nkarhi wo karhi ku nga si hela malembe ya ntlhanu va tekanile. Nakambe va tshamela ku holova naswona a va eneriseki hi vukati bya vona.
BIBELE YI RI: “Leswi Xikwembu xi swi paneke swin’we [evukatini], ku nga tshuki ku va ni munhu la swi hambanisaka.”—Matewu 19:6.
U Nga Ha Tsakela
XALAMUKA!
Xana Swi Hoxile Ku Endla Timhaka Ta Masangu U Nga Si Nghenela Vukati?
Twana leswi Bibele yi swi vulaka hi ku endla timhaka ta masangu u nga si nghenela vukati ni swi endlo swin’wana swa ku tikhoma ko biha hi tlhelo ra rimbewu.
U NGA VA NI NDYANGU LOWU TSAKEKE
Titshege Hi Xikwembu Leswaku U Va Ni Vukati Lebyi Tsakisaka
Ku tirhisa swivutiso swimbirhi swo olova swi nga ku pfuna leswaku u antswisa vukati bya wena.
