Vatekani lava xiximanaka va kombisana rirhandzu hambiloko va nga pfumelelani eka swin’wana. Buku leyi nge, Ten Lessons to Transform Your Marriage yi ri: “Vatekani volavo loko va nga pfumelelani hi mhaka yo karhi, va tikarhatela ku yi lulamisa hi ndlela leyinene. Va yingiselana hi xichavo loko un’wana a vula vonelo rakwe kutani ekuheteleleni va fikelela xiboho lexi va pfumelelanaka ha xona hinkwavo.”

NSINYA WA NAWU WA LE BIBELENI: “Rirhandzu . . . a ri lavi leswi vuyerisaka rona ntsena.”—1 Vakorinto 13:4, 5.

“Ku kombisa leswaku ndzi xixima nsati wa mina ndzi tlangela hinkwaswo leswi a swi endlaka naswona a ndzi lavi ku n’wi twisa ku vava kumbe ku onha vukati bya hina.”—Micah.

Vatekani lava nga xiximaniki, loko va bula va xopaxopana, va nyefulana ni ku teka un’wana a nga ri wa nkoka. Vakambisisi va vula leswaku leswi swi kombisa leswaku vatekani volavo va nga hetelela va dlaye vukati.

“Ku tlhavana hi marito hi ndlela yo gega, ku sandza kumbe ku endla xihlekiso hi nsati wa wena swi ta n’wi endla a nga ha titshembi, a nga ha ku tshembi ni ku onha vukati bya n’wina.”—Brian.

TIKAMBELE

Anakanyisisa hi leswi u swi vuleke ni leswi u swi endleke vhiki leri. Kutani tivutise:

• ‘Xana ndzi n’wi sole kangani murhandziwa wa mina naswona ndzi n’wi bumabumele kangani?’

• ‘Ndzi swi kombise njhani leswaku ndza n’wi xixima murhandziwa wa mina?’

BURISANA NI NKATAKU

• I yini leswi mi nga swi endlaka leswaku mi xiximana?

• Hi swihi swiendlo leswi nga endlaka leswaku mi nga xiximani?

SWIRINGANYETO

• Tsala swilo swinharhu leswi u nga tsakelaka ku xiximiwa eka swona. Nkataku na yena a endle tano. Cincanani leswi mi swi tsaleke kutani mi antswisa laha ku faneleke.

• Xaxameta timfanelo leti u ti rhandzaka hi murhandziwa wa wena. Kutani u n’wi byela ndlela leyi u ti tlangelaka ha yona timfanelo teto.

“Ndzi swi kombisa hi swiendlo leswaku ndza n’wi xixima nuna wa mina ni leswaku ndzi lava a tsaka. A swi kali swi lava leswaku ndzi n’wi endlela swilo leswikulu, mikarhi yin’wana ku n’wi endlela swilo switsongo nkarhi na nkarhi swi nga kombisa leswaku ndza n’wi xixima swinene.”—Megan.

Xa nkoka swinene, a hi mhaka ya leswaku wena u tivona u n’wi xixima kumbe e-e, kambe xivutiso hileswaku xana nkataku u titwa a xiximiwa?

NSINYA WA NAWU WA LE BIBELENI: “Tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha.”—Vakolosa 3:12.