Loko vanhu lavo lulama va xaniseka ha karhateka. Van’wana va hetelela va vule leswaku a swi bohi ku va munhu a va la lulameke loko ku ri hi ku hinkwerhu hi ta xaniseka.

Van’wana va pfumela leswaku loko munhu a fa u tlhela a tswariwa nakambe. Va vula leswaku lava endleke leswinene va tswariwa nakambe leswaku se va ta hanya vutomi byo antswa kasi lava a va hanya hi leswo biha va tlhela va tswariwa ivi va ya hanya hi ku xaniseka. Nakambe ku tlhela ku vuriwa leswaku hambiloko munhu o endla swo lulama sweswi kambe loko ku ri hi leswaku a hanya hi swo biha enkarhini lowu hundzeke wa ha ta xaniseka. Hambiswiritano . . .

• Munhu loyi a feke loko a pfuxiwa a nga ha swi tsundzuki swilo leswi a tshameke a swi endla hikwalaho mhaka ya ku xaniseka eka vutomi bya vumbirhi a yi twali nikatsongo.

• Loko ku ri hi leswaku hi ta vabya hi tlhela hi langutana ni makhombo yo tala hikwalaho ka leswi hi tshameke hi swi endla enkarhini lowu hundzeke hikwalaho ka yini hi fanele hi tikarhatela ku va ni rihanyo lerinene ni ku papalata makhombo?

  DYONDZA LESWI ENGETELEKEKE

  Hlalela vhidiyo leyi nge, Hikwalaho Ka Yini Xikwembu Xi Pfumelele Leswaku Ku Va Ni Ku Xaniseka? eka jw.org/ts.

Ku xaniseka a hi nxupulo lowu humaka eka Xikwembu.

Hakanyingi vanhu va xaniseka hi leswi va vaka va ri endhawini leyi hoxeke hi nkarhi lowu hoxeke.

“Lava va nga ni rivilo lerikulu a va hluli emphikizanweni, hambi ku ri lava va nga ni matimba a va hluli enyimpini, ni lavo tlhariha a va swi kumi swakudya, hambi ku ri lava twisisaka a va na rona rifuwo, ni lava va nga ni vutivi a va kombiwi tintswalo; hikuva nkarhi ni xiendlakalo lexi nga languteriwangiki swa va wela hinkwavo.”—EKLESIASTA 9:11.

Xin’wana lexi hi vangelaka ku xaniseka i xidyoho lexi hi velekiweke na xona.

Hi xitalo loko vanhu va tirhisa rito leri nge, “xidyoho” va va va kombetela eka swilo swo biha leswi munhu a swi endleke. Kambe Bibele yi tlhela yi ri tirhisela ku kombetela eka vanhu hinkwavo, vo lulama ni lava nga lulamangiki tanihi leswi xidyoho lexi hi tswariweke na xona.

“Hi switlhavi swa ku veleka ndzi velekiwe ndzi ri ni xidyoho, naswona manana u ndzi tikile exidyohweni.”—PISALEMA 51:5.

Xidyoho lexi hi velekiweke na xona xa hi xanisa.

A xi onhanga vuxaka bya hina na Muvumbi ntsena kambe xi tlhele xi endla leswaku hi tsandzekaka ku vona ku hetiseka ka xikongomelo xa Xikwembu. Leswi hi swona leswi endlaka leswaku vanhu hinkwavo va xaniseka.

“Loko ndzi navela ku endla leswi lulameke, leswo biha swi kona eka mina.”—VARHOMA 7:21.

“Ntumbuluko hinkwawo wu hambeta wu konya ni ku vaviseka swin’we.”—VARHOMA 8:22.