Xana tinyeleti ni misava ku katsa ni swilo leswi hanyaka emisaveni swi vumbiwe hi Xikwembu kumbe swi lo tiendlekela? Marito ya vakambisisi lavambirhi va ntumbuluko lama boxiweke eka nhlokomhaka leyi ni marito yo sungula ya Bibele, ma nyikela tinhlamulo timbirhi leti hambaneke swinene ta xivutiso xexo. Mavonelo lawa hamambirhi ma ni vaseketeri. Kambe ku ni vanhu vo tala lava nga swi tiveki leswaku va yime kwihi. Vanhu va kanetana hi mhaka leyi eka tibuku leti dumeke ni le ka minongonoko ya le ka TV.

Mathicara ya wena ma nga ha va ma ku byele leswaku tinyeleti ni misava ku katsa ni swilo leswi hanyaka emisaveni swi lo tiendlekela, a swi na Muvumbi. Kambe xana mathicara ya wena ma ku kombile vumbhoni bya leswaku a ku na Muvumbi? Hi hala tlhelo, u nga ha va u twe vafundhisi va chumayela leswaku ku ni Muvumbi. Kambe xana va ku kombile vumbhoni lebyi seketela leswi va swi vulaka? Kumbe xana va lo ku byela leswaku u fanele u pfumela leswaku Xikwembu xi kona kambe u nga ri na vumbhoni?

A swi kanakanisi leswaku u anakanyisise hi xivutiso lexi naswona u nga ha va u vona onge a ku na munhu la nga vulaka hi ku tiyiseka leswaku ku ni Muvumbi. Swi nga endleka u tivutisa xivutiso xin’wana lexi nge: Xana i swa nkoka ku tiva nhlamulo ya kona?

Magazini lowu wa Xalamuka! wu ta rhanga wu kombisa byin’wana bya vumbhoni lebyi khorwiseke vanhu vo tala leswaku ku ni Muvumbi. Endzhaku wu ta hlamusela lexi endlaka swi va swa nkoka ku tiva nhlamulo ya xivutiso lexi xa ndlela leyi swilo leswi hanyaka swi veke kona hayona laha misaveni.