Ntiyiso Hi Vumundzuku
Xana u tshame u tivutisa leswaku vumundzuku byi ku khomele yini? Bibele yi hi byela hi swilo swa nkoka leswi nga ta endleka ku nga ri khale leswi nga ta khumba vanhu hinkwawo.
Yesu u hlamusele leswi nga ta hi pfuna ku ‘tiva loko Mfumo wa Xikwembu wu ri kusuhi.’ (Luka 21:31) U vule leswaku ku ta va ni tinyimpi letikulu, ku tsekatseka lokukulu ka misava, ku kayivela ka swakudya ni mintungu ku nga swilo leswi hi swi vonaka namuntlha.—Luka 21:10-17.
Bibele yi tlhela yi hi byela leswaku ‘masiku yo hetelela’ hi ta ma vona hi ndlela yo biha leyi vanhu va ti khomaka ha yona. U nga tihlayela mhaka leyi eka 2 Timotiya 3:1-5. Ndlela leyi vanhu va hanyaka ha yona namuntlha yi swi veka erivaleni leswaku vuprofeta bya Bibele byi le ku hetisekeni namuntlha.
Xana leswi swi vula yini? Nkarhi wa leswaku Mfumo wa Xikwembu wu cinca misava leyi, yi va leyinene wu kwala nyongeni. (Luka 21:36) Bibele yi tshembisa leswaku Xikwembu xi ta endlela vanhu swilo leswinene emisaveni. Hi leswi swikombiso swin’wana.
KU FUMA HI NDLELLA LEYINENE
“Kutani a nyikiwa ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela. Ku fuma ka yena i ku fuma loku tshamaka hilaha ku nga heriki loku ku nga ta ka ku nga hundzi, mfumo wakwe a wu nge lovisiwi.”—DANIYELE 7:14.
Leswi swi vulaka swona: U ta tiphina hi vutomi ehansi ka Mfumo lowu tlakukeke emisaveni hinkwayo lowu Xikwembu xi vekeke N’wana wa xona leswaku a va Hosi ya wona.
RIHANYO LERINENE
“Ku hava munhu la tshamaka kona la nga ta ku: ‘Ndza vabya.’”—ESAYA 33:24.
Leswi swi vulaka swona: A wu nge he vabyi kumbe ku lamala naswona u ta hanya hilaha ku nga heriki.
KU RHULA LOKUKULU
“U herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; Tigolonyi u ti hisa endzilweni.”—PISALEMA 46:9.
Leswi swi vulaka swona: A ku nge he vi na tinyimpi kumbe ku xaniseka hinkwako loku tisiwaka hi tona.
LAHA MISAVENI KU TA VA KU RI NA VANHU LAVANENE NTSENA
“Lowo homboloka a nge he vi kona . . . Lavo rhula va ta dya ndzhaka ya misava.”—PISALEMA 37:10, 11.
Leswi swi vulaka swona: A ku nge he vi na vanhu vo homboloka kambe ku ta va ni vanhu lava tiyimiseleke ku yingisa Xikwembu ntsena.
MISAVA HINKWAYO YI TA VA PARADEYISI
“Va ta aka tindlu va tshama eka tona; kunene va ta rima masimu ya vhinya va dya mihandzu ya wona.”—ESAYA 65:21, 22.
Leswi swi vulaka swona: Misava hinkwayo yi ta va yi sasekile. Xikwembu xi ta hlamula xikhongelo xa hina mayelana ni leswaku ku rhandza ka xona ku endleka “emisaveni.”—Matewu 6:10
U Nga Ha Tsakela
SWIVUTISO LESWI HLAMURIWAKA HI BIBELE
I Yini Leswi Mfumo Wa Xikwembu Wu Nga Ta Swi Endla?
Twana leswi u nga swi langutelaka loko hulumendhe ya Xikwembu se yi fuma emisaveni.
