ANAKANYA hi siku leri a wu tsake ha rona evuton’wini bya wena. Xana a ku ri loko u cata kumbe loko ku velekiwa n’wana wa wena wa mativula? Kumbe a ku ri loko u khuvuriwa? Swi nga endleka leswaku siku rero a ku ri ra nkoka swinene ni leri tsakisaka evuton’wini bya wena. Naswona hi siku rero vamakwerhu a va tsakile loko va ku vona u kombisa leswaku u rhandza Xikwembu, hi mbilu ya wena hinkwayo ni hi moyaxiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo!—Marka 12:30.

Kumbexana, u ve ni ntsako lowukulu loko u ri karhi u tirhela Yehovha ku sukela loko u khuvuriwile. Hambiswiritano vahuweleri vo hlayanyana va heleriwe hi ntsako lowu a va ri na wona eku sunguleni. Ha yini? Hi swihi swivangelo leswi hi nga na swona swo hambeta hi tirhela Yehovha hi ntsako?

Mahungu ya Mfumo ma hi endla hi tsaka swinene. Ha yini? Hikuva Yehovha u tshembisa leswaku ku nga ri khale Mfumo wu ta herisa misava leyi yo homboloka kutani wu tisa misava leyintshwa ya Xikwembu. Sofaniya 1:14 yi ri: “Siku lerikulu ra Yehovha ri le kusuhi. Ri le kusuhi, naswona ra hatlisa swinene!” Kambe loko hi vona onge ra hlwela hi nga ha heleriwa hi ntsako lowu a hi ri na wona. Leswi swi nga ha endla leswaku hi nga ha hiseki entirhweni wa Xikwembu.—Swivuriso 13:12.

Loko hi heta nkarhi ni vamakwerhu ha khutazeka leswaku hi hambeta hi tirhela Yehovha hi ntsako. Ndlela leyi vanhu va Xikwembu va tikhomaka ha yona yi nga ha va yi endle leswaku hi ta eka vugandzeri bya ntiyiso ni ku tlhela yi hi pfuna leswaku hi tirhela Xikwembu hi ntsako. (1 Petro 2:12) Hambiswiritano, ku nga humelela yini loko makwerhu un’wana a tshinyiwa hikwalaho ka leswi a nga yingisangiki swileriso swa Xikwembu? Leswi swi nga ha heta van’wana matimba evandlheni ni ku endla leswaku va heleriwa hi ntsako.

Nakambe swilo leswi vonakaka swi nga endla leswaku hi heleriwa hi ntsako. Njhani? Misava ya Sathana yi ringeta ku hi khorwisa leswaku hi xava swilo leswi nga bohiki. Onge hi nga tsundzuka marito ya Yesu lama nge: “Ku hava loyi a nga vaka hlonga ra tihosi timbirhi; hikuva u ta venga yin’wana a rhandza leyin’wana, kumbe u ta namarhela yin’wana a yi langutela ehansi leyin’wana. A mi nge vi hlonga ra Xikwembu ni ra Rifuwo.” (Matewu 6:24) A hi nge swi koti ku tirhela Yehovha hi tsakile loko hi hala tlhelo hi lava ku kuma xin’wana ni xin’wana eka misava leyi.

Ku tirhela Yehovha a hi ndzhwalo eka lava va n’wi rhandzaka. (1 Yohane 5:3) Tsundzuka leswaku Yesu u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.” (Matewu 11:28-30) Ku va Mukreste wa ntiyiso swa phyuphyisa naswona swi tisa ntsako. Hakunene hi ni swivangelo leswinene swo va hi tsaka entirhweni wa  Yehovha. Sweswi a hi kambisiseni swivangelo swinharhu.​—Habakuku 3:18.

Hi tirhela Xikwembu lexi tsakeke, lexi nga Munyiki wa Vutomi. (Mintirho 17:28; 1 Timotiya 1:11) Ha swi xiya leswaku hi kolota Mutumbuluxi wa hina vutomi bya hina. Kutani a hi hambeteni hi n’wi tirhela hi ntsako ku nga khathariseki leswaku hi ni malembe mangani hi khuvuriwile.

Anakanya hi Héctor, loyi a tirheleke Yehovha tanihi mulanguteri wa muganga ku ringana malembe ya 40. ‘Niloko a ri mpunga’ wa ha tiphina hi ku tirhela Yehovha. (Pisalema 92:12-14) Ku vabya ka nsati wakwe ku cince ndlela leyi a tirhela Xikwembu ha yona, kambe sweswo a swi endlanga leswaku a heleriwa hi ntsako. U ri: “Hambileswi swi ndzi twisaka ku vava ku vona nsati wa mina a hohloka hakatsongotsongo naswona swi yaka swi tika leswaku ndzi n’wi khathalela, a ndzi swi pfumelelanga leswaku swi ndzi hetela ntsako loko ndzi ri karhi ndzi tirhela Xikwembu xa ntiyiso. Ku tiva leswaku ndzi kolota Yehovha vutomi bya mina, loyi a vumbeke vanhu hi xikongomelo, hi xona xivangelo lexi endlaka leswaku ndzi n’wi rhandza swinene naswona ndzi n’wi tirhela hi mbilu ya mina hinkwayo. Ndzi tikarhatela ku tshama ndzi hiseka entirhweni wo chumayela naswona ndzi ringeta ku tshama ndzi ri karhi ndzi titsundzuxa hi ntshembo wa Mfumo leswaku ndzi nga heleriwi hi ntsako.”

Yehovha u hi nyike nkutsulo lowu endlaka swi koteka leswaku hi tiphina hi vutomi. Entiyisweni, “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Hi rivaleriwa swidyoho naswona hi nga kuma vutomi lebyi nga heriki loko hi kombisa ripfumelo eka nyiko ya nkutsulo ya Xikwembu. Hakunene i xivangelo lexinene xo va hi tsaka! Naswona ku tlangela ka hina nkutsulo swi ta hi susumetela ku tirhela Yehovha hi ntsako.

Makwerhu la vitaniwaka Jesús, loyi a a tshama eMexico u te: “A ndzi ri hlonga ra ntirho wa mina, minkarhi yin’wana a ndzi tirha nkarhi lowu engetelekeke hambileswi a swi nga bohi. A ndzi lava ku kuma mali yo tala. Kutani ndzi dyondze hi Yehovha ni ndlela leyi a nyikeleke hi N’wana wakwe loyi a n’wi rhandzaka leswaku a kutsula vanhu. A ndzi swi lava hi mbilu hinkwayo ku n’wi tirhela. Kutani ndzi nyiketele vutomi bya mina eka Yehovha naswona endzhaku ka loko ndzi tirhe ekhampanini malembe ya 28, ndzi teke xiboho xo tshika ntirho ivi ndzi nghenela ntirho wa nkarhi hinkwawo.” Leyi hi yona ndlela leyi Jesús a sunguleke ku tirhela Yehovha a tsakile.

Hi ni mahanyelo lamanene, leswi hi endlaka hi tsaka. Xana wa ha tsundzuka leswaku a wu hanya njhani loko u nga si dyondza hi Yehovha? Muapostola Pawulo u tsundzuxe Vakreste va le Rhoma leswaku ‘a va ri mahlonga ya xidyoho’ kambe se i “mahlonga ya ku lulama.” Leswi se a va hanya hi ndlela leyinene, a va byi langutele hi mahlongati vutomi lebyi nga  heriki. (Varhoma 6:17-22) Na hina hi landzela milawu ya Yehovha, kutani a ha ha kingindziwi hi ripfalo hikwalaho ka vuyelo bya ku tikhoma hi ndlela yo biha kumbe ku katseka eka madzolonga. Hakunene leswi hi swona swi hi endlaka hi tsaka!

Anakanya hi Jaime, loyi a nga pfumeli leswaku Xikwembu xi kona naswona a pfumela eka dyondzo ya ku tiendlekela ka swilo naswona a a tlanga ntlangu wa swibakele. Jaime u sungule ku ya eminhlanganweni ya Vukreste naswona u khumbiwe hi ndlela leyi vamakwerhu va n’wi kombeke rirhandzu ha yona. Leswaku a tshika ndlela leyi a a hanya ha yona, a fanele a kombela Yehovha leswaku a n’wi pfuna naswona a pfumela leswaku U kona. U ri: “Hakatsongotsongo, ndzi xiye leswaku ku ni Xikwembu lexi nga ni tintswalo naswona xi nga Tatana la nga ni rirhandzu. Ku hanya hi milawu yo lulama ya Yehovha swi ndzi sirhelerile. Loko a ndzi nga cincanga, a ndzi fanele ndzi file ku fana ni khale ka vanghana va mina lava a va tlanga ntlango wa xibakele. Evuton’wini bya mina, malembe yo tsakisa lawa ndzi tiphineke ha wona hi lawa ndzi ma heteke ndzi tirhela Yehovha.”

Hi fanele hi titwa njhani loko ha ha rindzele makumu ya misava leyi yo homboloka? Tsundzuka leswaku hi endla ku rhandza ka Xikwembu naswona hi byi langutele hi mahlongati vutomi lebyi nga heriki. “Kutani hi nga tshiki ku endla leswi nga swinene, hikuva hi nguva leyi faneleke hi ta tshovela loko hi nga karhali.” (Vagalatiya 6:8, 9) Hi ku pfuniwa hi Yehovha, a hi tiyiseleni, hi tirha hi matimba leswaku hi hlakulela timfanelo leti nga ta endla leswaku hi pona ‘nhlomulo lowukulu’ naswona hi hambeta hi tirhela Yehovha hi tsakile.​—Nhlavutelo 7:9, 13, 14; Yakobo 1:2-4.

Hi nga tiyiseka leswaku Yehovha u ta hi katekisa loko hi tiyisela hikuva wa wu tiva ntirho lowu hi n’wi endlelaka wona ni rirhandzu leri hi ri kombisaka eka yena ni le ka vito rakwe. Loko hi ya emahlweni hi n’wi tirhela hi tsakile, hi ta fana na mupisalema Davhida, loyi a vuleke a ku: “Ndzi veke Yehovha emahlweni ka mina nkarhi hinkwawo. Hikuva u le vokweni ra mina ra xinene, a ndzi nge tsekatsekisiwi. Hikokwalaho mbilu ya mina ya tsaka, ni ku vangama ka mina ku voyamele eku tsakeni. Nakambe, nyama ya mina yi ta tshama yi sirhelelekile.”​—Pisalema 16:8, 9.