1. Davhida u vule yini mayelana ni ku titsongahata ka Yehovha?

 XANA hi nga vula leswaku Yehovha wa titsongahata hakunene? Ina. Davhida u tshame a ku: “U ndzi nyika xitlhangu xa wena xa ku ponisa,ku titsongahata ka wena ka ndzi tlakusa.” (2 Sam. 22:36; Ps. 18:35) Kumbexana Hosi Davhida a a ehleketa hi siku leri muprofeta Samuwele a teke ekaya ka vona a ta n’wi tota leswaku a ta va hosi leyi a yi ta landzela ya Israyele. Hambileswi Davhida a ku ri yena lontsongo eka vana va nhungu kambe Yehovha u hlawule yena leswaku a ta siva Hosi Sawulo.—1 Sam. 16:1, 10-13.

2. Hi ta bula hi yini eka nhlokomhaka leyi?

² Davhida a ma twisisa kahle marito lama tsariweke hi mupisalema loyi a vuleke leswi mayelana na Yehovha: “Wa korhama a languta etilweni ni le misaveni, a pfuxa loyi a pfumalaka entshurini. A susa xisiwana etaleni. . . leswaku a xi tshamisa ni swifumi.” (Ps. 113:6-8) Eka nhlokomhaka leyi, hi ta bula hi ndlela leyi ku titsongahata swi nga swa nkoka hayona ni ndlela leyi Yehovha a swi kombiseke hayona leswaku wa titsongahata. Hi ta tlhela hi vona leswi hi nga swi dyondzaka eka Hosi Sawulo, muprofeta Daniyele na Yesu mayelana ni ku titsongahata.

3. Xana Yehovha u tirhisana njhani na hina naswona leswi swi kombisa yini?

³ Yehovha u kombisa leswaku wa titsongahata eka ndlela leyi a tirhisanaka hayona ni vagandzeri vakwe lava nga hetisekangiki. U amukela ndlela leyi hi n’wi gandzelaka hayona naswona u hi teka hi ri vanghana vakwe. (Ps. 25:14) Leswaku hi kota ku va vanghana va yena, Yehovha u nyikele hi N’wana wa yena  leswaku hi ta rivaleriwa swidyoho. Mawaku musa ni ntwelavusiwana wonghasi lowu Yehovha a hi kombeke wona!

4. Yehovha u hi nyike yini naswona hikwalahokayini?

⁴ Xiya ndlela yin’wana leyi Yehovha a swi kombiseke hayona leswaku wa titsongahata. Leswi Yehovha a nga Muvumbi wa hina, a ta va a hi hlawulerile ndlela leyi a lavaka leswaku hi hanya hayona. Kambe a nga swi endlanga sweswo. U hi vumbe hi xifaniso xa yena naswona u hi nyike ntshunxeko wo tihlawulela. U lava leswaku hambileswi hi nga vanhu lava nga hetisekangiki hi n’wi tirhela hi mbilu hinkwayo hi tlhela hi n’wi yingisa hileswi hi n’wi rhandzaka. (Det. 10:12; Esa. 48:17, 18) Ha tlangela swinene hikwalaho ko titsongahata ko tano ka Yehovha!

5. Yehovha u hi dyondzisa njhani leswaku hi titsongahata? (Vona xifaniso lexi nga eka xifunengeto.)

⁵ Yehovha u hi dyondzisa ku titsongahata hi ndlela leyi a tirhisanaka hayona na hina. A ku na xivumbiwa ni xin’we lexi tlhariheke ku tlula Yehovha evuakweni hinkwabyo. Hambiswiritano, wa swi yingisa swiringanyeto swa van’wana. Hi xikombiso, Yehovha u pfumelele N’wana wa yena leswaku a n’wi pfuna eku tumbuluxeni ka swilo hinkwaswo. (Swiv. 8:27-30; Kol. 1:15, 16) Hambileswi Yehovha a nga ni matimba hinkwawo kambe u nyika van’wana vutihlamuleri byo endla mitirho yo karhi. Hi xikombiso, u hlawule Yesu leswaku a va Hosi ya Mfumo wakwe naswona u ta nyika vanhu va 144 000 vutihlamuleri, lava va nga ta fuma swin’we na Yesu. (Luka 12:32) Yehovha u letele Yesu leswaku a va Hosi ni Muprista Lonkulu. (Hev. 5:8, 9) U tlhela a letela lava nga ta fuma na Yesu kambe a nga va xopaxopi eka ntirho lowu va wu endlaka. Kurinasweswo, wa tshemba leswaku va ta wu endla kahle ntirho lowu a va nyikeke wona.—Nhlav. 5:10.

6-7. Hi nga dyondza yini eka Tata wa hina wa le tilweni mayelana ni ku nyika van’wana vutihlamuleri?

 ⁶ A hi tekeleleni Tata wa hina wa le tilweni loyi a nyikaka van’wana vutihlamuleri byo karhi hambileswi swi nga bohiki leswaku a pfuniwa! Hi xikombiso, xana u nhloko ya ndyangu kumbe u nkulu evandlheni? Tekelela Yehovha hi ku nyika van’wana ntirho naswona u papalata ku va xopaxopa. Loko u tekelela Yehovha hi ku letela van’wana, va ta wu tiva kahle ntirho naswona va ta wu endla handle ko chava. (Esa. 41:10) I yini swin’wana leswi lava nga ni vutihlamuleri byo karhi va nga swi dyondzaka eka Yehovha?

⁷ Bibele yi kombisa leswaku Yehovha wa swi yingisa swiringanyeto swa tintsumi. (1 Tih. 22:19-22) Vatswari mi nga n’wi tekelela njhani Yehovha? Mikarhi yin’wana, kombelani vana van’wina va mi byela mavonelo ya vona mayelana ni ndlela leyi ntirho wo karhi wu nga endliwaka hayona. Loko swi fanela, endlani leswi va swi vulaka.

8. Yehovha u tirhisane njhani na Abrahama na Sara?

⁸ Yehovha u tlhele a kombisa leswaku wa titsongahata hi ku lehisa mbilu. Hi xikombiso, Yehovha u ma lehisela mbilu malandza yakwe loko hi ku titsongahata ma n’wi vutisela swivutiso. U yingisile loko Abrahama a vula mavonelo ya yena mayelana ni ku lovisiwa ka muti wa Sodoma na Gomora. (Gen. 18:22-33) Nakambe, tsundzuka ndlela leyi Yehovha a tirhisaneke hayona na Sara nkata Abrahama. A nga n’wi hlundzukelanga endzhaku ka loko a hlekile loko a twa leswaku u ta tika hambileswi a dyuharile. (Gen. 18:10-14) Kurinasweswo, u xixime Sara.

9. Vatswari ni vakulu va nga dyondza yini eka Yehovha?

⁹ Vatswari ni vakulu, mi nga dyondza yini eka Yehovha? Xana mi angula njhani loko lava nga ehansi ka n’wina va mi vutisela swivutiso mayelana ni swiboho leswi mi swi tekeke? Xana mi tsutsumela ku va lulamisa? Kumbe, xana mi ringeta ku twisisa mavonelo ya vona? Mindyangu ni mavandlha ma vuyeriwa swinene loko lava va nga ni vutihlamuleri va tekelela Yehovha. Ku ta fikela sweswi, hi bule hi leswi hi nga swi dyondzaka eka Yehovha mayelana ni ku titsongahata. Sweswi a hi kambisiseni leswi hi nga swi dyondzaka mayelana ni ku titsongahata eka vanhu lava kumekaka eRitweni ra Xikwembu.

10. Yehovha u hi dyondzisa njhani hi ku tirhisa swikombiso swa vanhu van’wana?

¹⁰ Leswi a nga “Muleteri wa [hina] Lonkulu,” Yehovha u hi dyondzisa hi ku tirhisa swikombiso swa vanhu lava kumekaka eRitweni rakwe. (Esa. 30:20, 21) Ha dyondza loko hi anakanyisisa hi rungula leri vulavulaka hi vanhu lava tekeleleke Xikwembu hi tindlela hinkwato, ku katsa ni ku titsongahata. Nakambe, ha dyondza loko hi kambisisa leswi endlekeke eka vanhu lava tsandzekeke ku xi tekelela.—Ps. 37:37; 1 Kor. 10:11.

11. Hi dyondza yini eka xikombiso xo biha xa Sawulo?

¹¹ Tsundzuka leswi endlekeleke Hosi Sawulo. Loko a ha ri jaha a a titsongahata. A a swi tiva swipimelo swakwe naswona u kale a ala ku amukela vutihlamuleri lebyi engetelekeke. (1 Sam. 9:21; 10:20-22) Kambe hi ku famba ka nkarhi, u sungule ku mila makatla. U sungule ku humesa mavala loko se a ri hosi. Siku rin’wana, u tsandzeke ku lehisa mbilu hi nkarhi lowu a rindzele muprofeta Samuwele. Ematshan’weni yo titsongahata a rindzela Yehovha leswaku a teka goza, Sawulo u endle xitlhavelo hambileswi a nga ri na mpfumelelo wo endla tano. Sweswo swi endle leswaku Yehovha a nga ha n’wi tsakeli naswona eku heteleleni u lahlekeriwe hi vuhosi. (1 Sam. 13: 8-14) Ku ta va ku ri vutlhari ku dyondza eka xikombiso lexi xo biha kutani hi papalata ku tikukumuxa.

12. Daniyele u swi kombise njhani leswaku wa titsongahata?

¹² Ku hambana na Sawulo, xiya xikombiso lexinene lexi vekiweke hi muprofeta Daniyele. Evuton’wini byakwe, u tshame a ri nandza loyi a titsongahataka eka Xikwembu naswona nkarhi hinkwawo a a lava nkongomiso wa Yehovha. Hi xikombiso, loko Yehovha a n’wi pfunile a hlamusela norho wa Nebukadnetsara, a nga lavanga leswaku ku dzuneka ku ya eka yena. Kurinasweswo, hi ku titsongahata u yise ku dzuneka eka Yehovha. (Dan. 2:26-28) Hi dyondza yini? Loko vamakwerhu va rhandza ndlela leyi hi andlalaka mivulavulo hayona kumbe swi hi fambela kahle entirhweni wa nsimu, hi fanele hi yisa ku dzuneka hinkwako eka Yehovha. Hi fanele hi tsundzuka leswaku a hi nga ta swi kota ku endla swilo leswi handle ko pfuniwa hi Yehovha. (Filp. 4:13) Loko hi ri ni langutelo ro tano, hi va hi tekelela langutelo lerinene ra Yesu. Njhani?

13. Hi dyondza yini eka marito ya Yesu lama kumekaka eka Yohane 5:19, 30, mayelana ni ku titsongahata?

¹³ Hambileswi Yesu a ri N’wana wa Xikwembu loyi a hetisekeke, mikarhi hinkwayo a a titshega hi Yehovha. (Hlaya Yohane 5:19, 30.) A nga kalanga a ringeta ku teka vulawuri bya Tata wakwe. Vafilipiya 2:6 yi hi byela leswaku Yesu “a nga [telanga] hi miehleketo yo lwela ku ringana ni Xikwembu.” Leswi a a ri N’wana loyi a titsongahataka, a swi tiva swipimelo swakwe naswona a a xixima vulawuri bya Tata wakwe.

14. Loko Yesu a komberiwa ku endla swilo leswi a nga ri na mfanelo yo swi endla, u angule njhani?

¹⁴ Xiya ndlela leyi Yesu a anguleke hayona loko vadyondzisiwa vakwe, ku nga Yakobo na Yohane swin’we ni mana wa vona va ye eka yena kutani va kombela swilo leswi a swi ri ehenhla ka matimba yakwe. Handle ko ba mariri, Yesu u va byele leswaku i Tata wakwe wa le tilweni loyi a nga ni mfanelo yo hlawula leswaku i mani loyi a nga ta tshama evokweni rakwe ra xinene ni ra ximatsi eMfun’weni wa Xikwembu. (Mat. 20:20-23) Yesu u kombise leswaku wa swi xixima swipimelo leswi a nyikiweke swona. A a titsongahata hakunene. A nga endlanga nchumu ni wun’we lowu Yehovha a nga n’wi lerisangiki ku wu endla. (Yoh. 12:49) Hi nga n’wi tekelela njhani Yesu?

15-16. Hi nga xi tirhisa njhani xitsundzuxo lexi nga eka 1 Vakorinto 4:6?

 ¹⁵ Hi kombisa leswaku ha titsongahata ku fana na Yesu loko hi tirhisa xitsundzuxo lexi nga eka 1 Vakorinto 4:6. Yi ri: “Namarhelani leswi tsariweke.” Loko vanhu va kombela ku pfuniwa hi timhaka to karhi, hi nga va sindzisi leswaku va endla swilo hi ndlela ya hina kumbe hi vula xin’wana ni xin’wana handle ko anakanya. Kurinasweswo, hi fanele hi va pfuna hi ku tirhisa Bibele ni mikandziyiso ya hina leyi sekeriweke eBibeleni. Loko hi endla tano, hi kombisa leswaku ha swi xixima swipimelo swa hina naswona loko hi titsongahata hi ndlela yoleyo, hi yisa ku dzuneka eka Lowa Matimba Hinkwawo loyi a “[avanyisaka] hi ndlela leyinene.”—Nhlav. 15:3, 4.

¹⁶ Leswi hi lavaka ku tsakisa Yehovha, hi ni swivangelo leswi twalaka swo titsongahata. Sweswi hi ta vona ndlela leyi ku titsongahata swi nga hi pfunaka hayona leswaku hi tshama hi tsakile ni ku tirhisana kahle ni van’wana.

17. I yini lexi endlaka vanhu lava titsongahataka va tshama va tsakile?

¹⁷ Loko hi titsongahata, hi ta tshama hi tsakile. Hikwalahokayini? Loko hi pfumela leswaku ku ni swilo leswi hi tsandzekaka ku swi endla, hi ta tsaka loko van’wana va hi pfuna. Hi xikombiso, ehleketa hi loko Yesu a hanyisa vanhu va khume lava a va ri ni nhlokonho. I wanuna un’we ntsena loyi a tlheleleke eka Yesu a ya khensa hikwalaho ka leswi a tshunguriweke vuvabyi lebyi nga ni khombo, ku nga nchumu lowu a nga ta swi kota ku wu endla. Wanuna yoloye loyi a a titsongahata, u wu tlangerile swinene mpfuno lowu a wu kumeke naswona u vangamise Xikwembu hikwalaho ka sweswo.—Luka 17:11-19.

18. Ku titsongahata swi hi pfuna njhani leswaku hi kota ku tirhisana kahle ni van’wana? (Varhoma 12:10)

 ¹⁸ Vanhu lava titsongahataka va tirhisana kahle ni vanhu van’wana naswona vunghana bya vona bya khomelela. Hikwalahokayini? Va swi xiya leswaku vanhu van’wana va ni vumunhu lebyinene naswona va va tshemba. Vanhu lava titsongahataka va tsaka loko van’wana swi va fambela kahle evuton’wini naswona va va bumabumela va tlhela va va xixima.—Hlaya Varhoma 12:10.

19. Hi swihi swivangelo swin’wana leswi endlaka hi papalata ku tikurisa?

¹⁹ Vanhu lava tikukumuxaka swa va tikela ku bumabumela van’wana naswona mikarhi yo tala va lava ku bumabumeriwa vona. Va rhandza ku tipimanisa ni vanhu van’wana naswona va hlohlotela moya wa ku phikizana. Ematshan’weni yo letela van’wana kumbe ku va nyika vutihlamuleri, munhu loyi a tikukumuxaka u tibyela leswaku ntirho wu ta famba kahle, ntsena loko wu endliwa hi yena. Hakanyingi munhu loyi a tikukumuxaka u ni mavondzo. (Gal. 5:26) Mikarhi yo tala, vanhu vo tano a va vi na vanghana. Loko hi xiya leswaku hi ni moya wa ku tikukumuxa, hi fanele hi khongela eka Yehovha leswaku a hi pfuna hi tsuvula moya wo tano wo biha etimbilwini ta hina.—Rhom. 12:2.

20. Hikwalahokayini hi fanele hi titsongahata?

²⁰ Mayana xikombiso lexinene swonghasi lexi Yehovha a hi vekeleke xona! Hi kota ku vona ndlela leyi a titsongahataka hayona loko a tirhisana ni malandza yakwe naswona hi lava ku n’wi tekelela. Ku engetela kwalaho, hi lava ku tekelela swikombiso leswinene swa vanhu va le Bibeleni, lava veke ni nkateko wo famba ni Xikwembu. Onge mikarhi hinkwayo hi nga tiyimisela ku xixima Yehovha ni ku n’wi vangamisa hilaha swi n’wi fanelaka hakona. (Nhlav. 4:11) Loko hi endla tano, na hina hi ta va ni nkateko wo famba ni Tata wa hina wa le tilweni, loyi a rhandzaka vanhu lava titsongahataka.