1. Hi swihi swilo leswinene leswi vantshwa vo tala se va swi endleke?

 LEMBE ni lembe, magidi ya vantshwa lava nga Vakreste va khuvuriwa. Xana na wena u khuvuriwile? Loko swi ri tano, vamakwerhu va tsaka na wena ku katsa na Yehovha! (Swiv. 27:11) Ehleketa hi swilo leswinene leswi se u koteke ku swi fikelela. Kumbexana se u ni malembe yo tala u ri karhi u tikarhatela ku dyondza Bibele. Sweswo swi ku pfunile u tiyiseka leswaku Bibele i Rito ra Xikwembu. Xa nkoka swinene, hi leswaku u tive ni ku rhandza Mutsari wa buku yoleyo yo kwetsima. Ndlela leyi u rhandzaka Yehovha hayona yi kurile lerova sweswi u nandza wa Yehovha la tinyiketeleke ni ku khuvuriwa. A hi ku tsakisa ka swona!

2. Hi ta bula hi yini eka nhlokomhaka leyi?

 ² A swi kanakanisi leswaku ripfumelo ra wena ri ringiwe hi tindlela to tala loko u ri karhi u tikarhatela ku fanelekela ku khuvuriwa. Kambe loko u ri karhi u kula u ta langutana ni miringo yin’wana. Sathana u ta ringeta ku endla leswaku u nga ha n’wi rhandzi Yehovha ni ku ku tshikisa ku n’wi tirhela. (Efe. 4:14) U nga pfumeli leswaku sweswo swi ku endlekela. I yini lexi nga ku pfunaka u tshama u tshembekile eka Yehovha ni ku endla leswi u nga swi tshembisa loko u tinyiketela? U fanele u ya emahlweni u antswisa vuxaka bya wena ni Xikwembu hi ku ‘tikarhatela’ ku va Mukreste la wupfeke. (Hev. 6:1) Xana u nga swi endla njhani sweswo? Hi ta bula hi leswi eka nhlokomhaka leyi.

3. Vakreste hinkwavo va fanele va ya emahlweni va endla yini endzhaku ka loko va khuvuriwile?

³ Endzhaku ka loko hi khuvuriwile, hinkwerhu hi fanele hi yingisa xitsundzuxo lexi muapostola Pawulo a xi nyikeke Vakreste va le Efesa. U va khutaze leswaku va va Vakreste lava “wupfeke.” (Efe. 4:13) Sweswo a swi fana ni loko a ku, ‘Yanani emahlweni mi antswisa vuxaka bya n’wina na Yehovha.’ Sweswo swa twisiseka leswi Pawulo a swi vuleke loko a fanisa ndlela leyi vuxaka bya hina na Yehovha byi kulaka hayona ni ndlela leyi n’wana a kulaka hayona. Vatswari lava ha ku vaka na n’wana va tsaka naswona va tinyungubyisa hi yena. Kambe n’wana loyi a nge tshami a ri xihlangi hilaha ku nga heriki. Hi ku famba ka nkarhi u ta tshika “mikhuva ya vuhlangi.” (1 Kor. 13:11) Swi tano na hi Vakreste. Endzhaku ko khuvuriwa hi fanele hi ya emahlweni hi antswisa. A hi kambisiseni swiringanyeto swin’wana leswi nga ta hi pfuna ku endla tano.

4. I yini leswi nga ku pfunaka u ya emahlweni u tiyisa vuxaka bya wena na Xikwembu? Hlamusela. (Vafilipiya 1:9)

⁴ Yana emahlweni u rhandza Yehovha swinene. Sweswi se wa n’wi rhandza Yehovha swinene. Kambe ndlela leyi u n’wi rhandzaka hayona yi nga kula. Njhani? Muapostola Pawulo u hi byela ndlela leyi sweswo hi nga swi endlaka hayona eka Vafilipiya 1:9. (Yi hlaye.) Pawulo u khongelele leswaku rirhandzu ra Vafilipiya “ri ya ri kula swinene.” Kutani yi nga kula ndlela leyi hi n’wi rhandzaka hayona Yehovha. Hi nga endla tano hi ku kuma “vutivi bya ntiyiso ni ku twisisa loku enteke.” Loko hi ya hi tiva Yehovha, hi ta n’wi rhandza swinene naswona hi ta tlangela vumunhu byakwe ni ndlela leyi a endlaka swilo hayona. Hi ta ya hi swi lava ngopfu ku n’wi tsakisa naswona a hi nge lavi ku endla nchumu lowu nga ta n’wi twisa ku vava. Hi tikarhatela ku twisisa leswi a lavaka hi swi endla ni ndlela leyi hi nga swi endlaka hayona.

5-6. Hi nga endla yini leswaku ndlela leyi hi n’wi rhandzaka hayona Yehovha yi kula? Hlamusela.

⁵ Yi nga kula ndlela leyi hi rhandzaka Yehovha hayona loko hi tikarhatela ku n’wi tiva kahle N’wana wakwe, loyi a kombiseke vumunhu bya Tata wakwe hi ku helela. (Hev. 1:3) Ndlela ya kahle swinene yo kota ku tiva Yesu i ku dyondza hi yena eka Tievhangeli ta mune. Loko u nga si titoloveta ku hlaya Bibele siku ni siku, hikwalahokayini u nga sunguli sweswi? Loko u ri karhi u hlaya hi timhaka ta Yesu, xiyisisa ngopfu vumunhu byakwe. A a ngheneka naswona ni vana lavatsongo a a va tlakula. (Mar. 10:13-16) A a ri ni musa ni xinghana naswona vadyondzisiwa vakwe a va nga chavi ku n’wi byela ndlela leyi va titwaka hayona. (Mat. 16:22) Hi ndlela yoleyo, Yesu u tekelele Tata wakwe wa le tilweni. Yehovha na yena wa ngheneka swinene. Hi nga khongela eka yena. Loko hi khongela, hi nga n’wi phofulela hinkwato ta le mbilwini. Ha tiyiseka leswaku a nge hi avanyisi. Wa hi rhandza naswona wa khathala hi hina.—1 Pet. 5:7.

⁶ Yesu a a twela vanhu vusiwana. Muapostola Matewu u te: “Loko a vona mintshungu a yi twela vusiwana, hikuva a yi tshikileriwa yi nga khathaleriwi ku fana ni tinyimpfu leti nga riki na murisi.” (Mat. 9:36) Yehovha u titwa njhani? Yesu u te: “Tata wa mina la nga ematilweni a nga naveli leswaku un’wana wa lava lavatsongo a lova.” (Mat. 18:14) Leyi i mhaka yo tsakisa! Loko hi ya hi tiva Yesu ku antswa, ndlela leyi hi n’wi rhandzaka hayona Yehovha ya kula.

7. Swi nga ku pfuna njhani ku va munghana wa Vakreste lava wupfeke?

⁷ U nga tlhela u dyondza ku rhandza van’wana ni ku ya emahlweni u va Mukreste la wupfeke hi ku heta nkarhi ni vamakwerhu lava nga ni ntokoto evandlheni ra ka n’wina. Xiya ndlela leyi va tsakeke hayona. A va tisoli nikatsongo hi xiboho xa vona xo tirhela Yehovha. Va kombele leswaku va ku byela hi mitokoto yin’wana leyi va veke na yona loko va ri karhi va tirhela Yehovha. Loko u  lava ku endla xiboho xa nkoka, kombela xitsundzuxo xa vona. Tsundzuka leswaku “laha ku nga ni vatsundzuxi vo tala swilo swi famba kahle.”—Swiv. 11:14.

8. U nga endla yini loko u kanakana leswi Bibele yi swi vulaka?

⁸ Tshika ku kanakana. Hilaha hi buleke hakona eka  ndzimana ya vumbirhi, Sathana u ta ringeta ku ku sivela leswaku u ya emahlweni u tiyisa vuxaka bya wena ni Xikwembu. Ndlela yin’wana leyi a nga swi endlaka hayona sweswo, i ku ku endla u kanakana tidyondzo tin’wana ta Bibele. Hi xikombiso, hi ku famba ka nkarhi u ta hlangana ni dyondzo leyi sandzaka Xikwembu ya leswaku swilo hinkwaswo swi lo tiendlekela (evolution). Swi nga endleka loko wa ha ri ntsongo a wu nga ehleketi hi dyondzo leyi kambe leswi sweswi u yaka u kula u dyondzisiwa yona hi ku kongoma exikolweni. Kumbexana u vona onge leswi mathicara ma ku dyondzisaka swona hi dyondzo leyi swa twala. Hambiswiritano, swi nga endleka va nga si tshama va tinyika nkarhi wo lavisisa vumbhoni lebyi kombisaka leswaku ku ni Muvumbi. Tsundzuka nawu lowu nga eka Swivuriso 18:17 lowu nge: “Munhu wo sungula ku hlamusela mhaka yakwe u vonaka a lulamile, ku fikela loko munhu un’wana a n’wi vutisisa leswaku a kuma ntiyiso.” Ematshan’weni yo pfumela ku humbiwa mano hi leswi u swi twaka exikolweni, hi vukheta kambisisa ntiyiso lowu kumekaka eRitweni ra Xikwembu ku nga Bibele. Endla ndzavisiso eka tibuku ta hina. Bula ni vamakwerhu lava na vona va tshameke va pfumela eka dyondzo ya evolution. Va vutise leswaku i yini lexi va endleke va tshemba leswaku ku ni Muvumbi loyi a hi rhandzaka. Mabulo yo tano lama khutazaka ma nga ku pfuna leswaku u kambisisa vumbhoni bya leswaku ku ni Muvumbi.

9. U dyondza yini eka ntokoto wa Melissa?

⁹ Makwerhu waxisati Melissa wu n’wi vuyerise ngopfu ndzavisiso lowu a wu endleke wa ku vulavula hi ntumbuluko. * U ri: “Exikolweni, evolution yi dyondzisiwa hi ndlela leyi vonakaka onge i ntiyiso. Eku sunguleni, a ndzi nga swi lavi ku endla ndzavisiso hileswi a ndzi chava ku kuma leswaku dyondzo ya evolution swi nga endleka yi ri ntiyiso. Kambe ndzi tibyele leswaku Yehovha a nga swi lavi leswaku hi n’wi tirhela hi nga tiyiseki. Hikwalaho ndzi tshike ku kanakana. Ndzi hlaye buku leyi nge, Is There a Creator Who Cares About You? ni broxara leyi nge, Xana Swilo Leswi Hanyaka Swi Lo Tumbuluxiwa? swin’we ni leyi nge,  The Origin of Life—Five Questions Worth Asking. Leswi hi swona leswi a ndzi swi lava. Loko a ndzi swi tivile a ndzi ta va ndzi sungule khale.”

10-11. I yini leswi nga ku pfunaka leswaku u tshama u tikhome kahle? (1 Vatesalonika 4:3, 4)

¹⁰ Papalata ku tikhoma ku biha. Loko wa ha ri muntshwa ku navela ku endla timhaka ta masangu ku nga ha va ni matimba naswona van’wana va nga ha ku kucetela leswaku u tikhoma ku biha hi swa masangu. Sathana u lava leswaku u endla tano. I yini leswi nga ku pfunaka leswaku u nga phasiwi hi xidyoho? (Hlaya 1 Vatesalonika 4:3, 4.) Loko u khongela, byela Yehovha ndlela leyi u titwaka hayona naswona n’wi kombele leswaku a ku nyika matimba. (Mat. 6:13) Tsundzuka leswaku Yehovha u lava ku ku pfuna ku nga ri ku ku xupula. (Ps. 103:13, 14) Rito ra Xikwembu ri nga ku pfuna. Melissa loyi hi buleke ha yena eku sunguleni, a a karhatiwa hi ku ehleketa swilo leswi thyakeke. U ri: “Ku hlaya Bibele siku ni siku swi ndzi pfunile leswaku ndzi nga heli matimba. A swi ndzi tsundzuxa leswaku ndzi wa Yehovha naswona ndza n’wi lava evuton’wini bya mina.”—Ps. 119:9.

¹¹ Papalata ku titlhantlhela swiphiqo swa wena hi wexe. Byela vatswari va wena leswi ku karhataka. I ntiyiso leswaku a swi olovi ku va byela swiphiqo swa wena kambe i swa nkoka leswaku u endla tano. Melissa u ri: “Ndzi kombele Yehovha a ndzi pfuna leswaku ndzi vulavula na papa hi swiphiqo swa mina. Endzhaku ka sweswo, ndzi titwe ndzi rhuliwe ndzhwalo lowukulu. A ndzi swi tiva leswaku Yehovha wa tinyungubyisa ha mina.”

12. U nga swi endla njhani swiboho leswinene?

¹² Kongomisiwa hi milawu ya Bibele. Hi ku famba ka nkarhi u ta ya u kuma tshunxeko wo tiendlela swiboho. Kambe ka ha ri ni swo tala leswi u nga swi tiviki. U nga swi papalata njhani ku endla swihoxo leswi nga khumbaka vuxaka bya wena na Yehovha? (Swiv. 22:3) Makwerhu waxisati la vuriwaka Kari u hlamusela leswi n’wi pfuneke ku endla swiboho leswinene. U xiye leswaku Vakreste lava wupfeke a va lavi nawu eka nchumu wun’wana ni wun’wana. U ri: “A ndzi fanele ndzi twisisa leswi Yehovha a swi ehleketaka hi mhaka yo karhi ematshan’weni yo tiva swinawanawana.” Loko u hlaya Bibele tivutise leswi: ‘Xana mhaka leyi ndzi hlayaka hayona yi ndzi byela yini hi ndlela leyi Yehovha a langutaka swilo hayona? Xana ku ni milawu ya Bibele leyi nga ndzi kongomisaka ndzi endla leswinene? Loko swi ri tano, ndzi ta vuyeriwa njhani loko ndzi tirhisa leswi Bibele yi swi dyondzisaka?’ (Ps. 19:7; Esa. 48:17, 18) Loko u hlaya Bibele ni ku anakanyisisa hi milawu ya yona leyi kongomisaka, swi ta ku olovela ku endla swiboho leswi tsakisaka Yehovha. Loko u ya emahlweni u tiyisa vuxaka bya wena na Yehovha, u ta swi xiya leswaku a wu lavi nawu eka nchumu wun’wana ni wun’wana hikuva u ta va u twisisa ndlela leyi Yehovha a langutaka swilo hayona.

13. Vanghana lavanene va nga ku pfuna njhani? (Swivuriso 13:20)

¹³ Hlawula vanghana lava rhandzaka Yehovha. Hilaha hi buleke hakona eku sunguleni, vanghana lava u va hlawulaka va ta ku pfuna swinene leswaku u va Mukreste la wupfeke. (Hlaya Swivuriso 13:20.) Makwerhu waxisati la vuriwaka Sara a a heleriwa hi ntsako. Kutani ku endleke nchumu wun’wana lowu n’wi pfuneke leswaku a tlhela a tsaka. Sara u ri: “Ndzi kume vanghana lavanene hi nkarhi lowu faneleke. Mina na makwerhu waxisati la ha riki muntshwa a hi hlangana vhiki ni vhiki leswaku hi dyondza Xihondzo xo Rindza. Munghana un’wana u ndzi pfunile leswaku ndzi sungula ku hlamula etidyondzweni. Hikwalaho ko pfuniwa hi vanghana va mina, ndzi sungule ku yi tekela enhlokweni mhaka ya ku khongela ni ku va ni dyondzo ya munhu hi yexe. Ndzi sungule ku va ni vuxaka lebyikulu na Yehovha naswona ndzi tlhele ndzi kuma ntsako.”

14. Julien u va kume njhani vanghana lavanene?

¹⁴ U nga va kuma njhani vanghana lava nga ta  ku pfuna u tiyisa vuxaka bya wena na Yehovha? Julien loyi sweswi a nga nkulu u ri: “Loko ndza ha ri muntshwa, ndzi kume vanghana lavanene loko hi ri karhi hi chumayela swin’we. Vanghana lava a va hiseka naswona va ndzi pfunile ndzi vona ndlela leyi ku chumayela swi tsakisaka hayona. Ntirho wa nkarhi hinkwawo wu nambe wu va leswi ndzi lavaka ku swi fikelela. Ndzi tlhele ndzi xiya leswaku loko ndzi hlawula vanghana lava ringanaka na mina ntsena, sweswo a swi endla ndzi kayela mitokoto yo tsakisa ni vanghana lavanene. Hi ku famba ka nkarhi ndzi tlhele ndzi kuma vanghana lavanene lava tirhaka eBethele. Xikombiso xa vona xi ndzi pfune leswaku ndzi hlawula vuhungasi lebyinene naswona sweswo swi endle leswaku ndzi tshinela swinene ekusuhi na Yehovha.”

15. Pawulo u nyike Timotiya xilemukiso xihi mayelana ni vanghana? (2 Timotiya 2:20-22)

¹⁵ U fanele u endla yini loko u xiya leswaku munhu loyi u tolovelaneke na yena evandlheni a hi munghana lonene? Pawulo a a swi tiva leswaku van’wana evandlheni ra Vukreste emikarhini ya ku tsariwa ka Bibele a va nga ri na vuxaka lebyinene na Yehovha, kutani u lemukise Timotiya leswaku a va papalata. (Hlaya 2 Timotiya 2:20-22.) Vuxaka bya hina na Yehovha i bya nkoka swinene. A hi fanelanga hi pfumelela munhu a tsanisa vuxaka bya hina ni Tata wa hina wa le tilweni lebyi hi byi tirheleke hi matimba.—Ps. 26:4.

16. Hi swihi swilo leswi u nga hlawulaka ku swi fikelela?

¹⁶ Tiyimisele ku fikelela swilo swa nkoka. Hlawula ku endla swilo leswi nga ta tiyisa ripfumelo ra wena ni ku ku pfuna leswaku u va Mukreste la wupfeke. (Efe. 3:16) Hi xikombiso, u nga ha hlawula ku antswisa ndlela leyi u hlayaka Bibele hayona ni ku endla dyondzo ya munhu hi yexe. (Ps. 1:2, 3) Kumbe u nga ha vona swi fanerile ku antswisa ndlela leyi u khongelaka hayona ni leswaku u khongela kangani. Kumbexana u fanele u tikhoma loko swi ta emhakeni yo hlawula vuhungasi ni ndlela leyi u wu tirhisaka hayona nkarhi wa wena. (Efe. 5:15, 16) Yehovha u ta tsaka loko a ku vona u tirha hi matimba leswaku u antswisa.

17. Swi ta ku vuyerisa njhani loko u pfuna van’wana?

¹⁷ U ta ya emahlweni u va Mukreste la wupfeke loko u pfuna vanhu van’wana. Yesu u te: “Ku nyika swi tisa ntsako lowukulu ku tlula ku amukela.”  (Mit. 20:35) U ta vuyeriwa swinene loko u tirhisa nkarhi ni matimba ya wena leswaku u pfuna van’wana. Hi xikombiso, u nga ha tiyimisela ku pfuna lava dyuhaleke evandlheni ra ka n’wina. Kumbexana u nga ha va yela eswitolo kumbe u va dyondzisa ku tirhisa swilo swo fana ni tifoni ta manguva lawa. Loko u ri makwerhu, tiyimisele ku fanelekela ku va nandza wa vutirheli leswaku u ta tirhela vamakwerhu. (Filp. 2:4) U nga tlhela u kombisa van’wana rirhandzu hi ku va chumayela mahungu lamanene ya Mfumo. (Mat. 9:36, 37) Loko swi koteka, ku nghenela ntirho wa nkarhi hinkwawo a ku ve leswi u lavaka ku swi fikelela.

18. Ku va eka ntirho wa nkarhi hinkwawo swi nga ku pfuna njhani leswaku u ya u tshinela ekusuhi na Yehovha?

¹⁸ Ntirho wa nkarhi hinkwawo wu nga ku pfuna leswaku u ya u tshinela ekusuhi na Yehovha. Loko u ri phayona, u nga kota ku ya eXikolweni xa Vachumayeri va Mfumo. U nga ha kota ku tirha eBethele kumbe ku pfuneta eka tiprojeke to aka miako ya nhlangano. Makwerhu waxisati Kaitlyn laha riki muntshwa naswona a nga phayona u ri: “Ku heta nkarhi ensin’wini ni vamakwerhu lava nga ni ntokoto swi ndzi pfune swinene leswaku ndzi tiyisa vuxaka bya mina na Yehovha endzhaku ko khuvuriwa. Xikombiso xa vona xi ndzi pfune leswaku ndzi ya ndzi dyondza Bibele ni ku antswisa ndlela leyi ndzi chumayelaka hayona.”

19. Hi yihi mikateko leyi u nga ta tiphina hayona loko u ya emahlweni u tiyisa vuxaka bya wena na Yehovha?

¹⁹ Loko u ya emahlweni u tiyisa vuxaka bya wena na Yehovha, u ta tiphina hi mikateko yo tala. U nge tlangi hi vuntshwa bya wena hi ku hlongorisa swilo leswi nga pfuniki nchumu. (1 Yoh. 2:17) U ta papalata mbitsi lowu vangiwaka hi ku endla swiboho leswi hoxeke. U ta humelela naswona u ta kuma ntsako wa xiviri. (Swiv. 16:3) Xikombiso xa wena lexinene xi ta khutaza vamakwerhu lavakulu ni lavatsongo. (1 Tim. 4:12) Kasi xa nkoka swinene, u ta eneriseka ni ku tiphina hi ku rhula loku kumiwaka hi lava tsakisaka Yehovha ni ku va ni vuxaka lebyinene na yena.—Swiv. 23:15, 16.