1. Yehovha u va navelela yini vanhu hinkwavo?

 YEHOVHA u vumbe vanhu va ri ni tshunxeko wo tihlawulela. Munhu u tirhisa tshunxeko wolowo mikarhi hinkwayo loko a endla swiboho. Xiboho xa nkoka lexi munhu un’wana ni un’wana a nga xi endlaka, i ku tinyiketela eka Yehovha ni ku va xiphemu xa ndyangu Wakwe wa vanhu lava n’wi gandzelaka. Yehovha u lava leswaku vanhu hinkwavo va endla tano. Hikwalahokayini? Hikuva wa va rhandza vanhu naswona u va navelela leswinene. U lava leswaku va tiphina hi vuxaka na yena ni ku hanya hilaha ku nga heriki.—Det. 30:​19, 20; Gal. 6:​7, 8.

2. Yehovha u titwa njhani hi vadyohi lava nga hundzukiki? (1 Yohane 2:1)

² Hambiswiritano, Yehovha a nga sindzisi munhu leswaku a n’wi tirhela. U pfumelela munhu un’wana ni un’wana ku hlawula leswi a lavaka ku swi endla. Ku vuriwa yini loko Mukreste la khuvuriweke a tlula nawu wa Xikwembu hi ku endla xidyoho lexikulu? Loko a nga hundzuki, u fanele a susiwa evandlheni. (1 Kor. 5:13) Nilokoswiritano, Yehovha u tshemba leswaku mudyohi u ta tlhelela eka Yena. Kahlekahle, leswi hi swona swi endleke leswaku a hi nyika nkutsulo,  ku endlela leswaku vadyohi lava hundzukaka va rivaleriwa. (Hlaya 1 Yohane 2:1.) Xikwembu xa hina lexi nga ni rirhandzu, xi kombela vadyohi xi tlhela xi va khutaza leswaku va hundzuka.—Zak. 1:3; Rhom. 2:4; Yak. 4:8.

3. Hi ta bula hi yini eka nhlokomhaka leyi?

³ Yehovha u lava leswaku hi va ni langutelo rakwe loko swi ta eka vadyohi ni xidyoho. Nhlokomhaka leyi yi ta hlamusela ndlela leyi hi nga swi endlaka hayona sweswo. Loko u ri karhi u hlaya, twisisa (1) ndlela leyi xidyoho lexikulu a xi tameriwa hayona evandlheni ra Vakreste vo sungula va le Korinto, (2) nkongomiso lowu muapostola Pawulo a wu nyikeleke loko mudyohi a hundzukile ni (3) leswi mhaka leyi ya le Bibeleni yi swi kombisaka hi langutelo ra Yehovha eka Vakreste lava endlaka xidyoho lexikulu.

NDLELA LEYI XIDYOHO LEXIKULU A XI TAMERIWA HAYONA ENKARHINI WA VAKRESTE VO SUNGULA

4. I yini leswi endlekeke evandlheni ra Vakreste vo sungula eKorinto? (1 Vakorinto 5:​1, 2)

⁴ Hlaya 1 Vakorinto 5:​1, 2. Eka riendzo rakwe ra vunharhu a ri murhumiwa, Pawulo u twe mhaka leyi tsemaka nhlana leyi a yi endleka evandlheni lerintshwa ra le Korinto. Makwerhu wo karhi evandlheni rero a a endla timhaka ta masangu ni nsati wa bava wakwe. Matikhomelo wolawo a ma chavisa naswona “a ma [nga ri] kona ni le xikarhi ka matiko”! Vandlha a ri vona matikhomelo wolawo ma nga bihanga naswona swi nga ha endleka a ri tibuma hi wona. Kumbexana van’wana a va ehleketa leswaku Xikwembu a xi kombisa vadyohi tintswalo ni leswaku xa twisisa. Kambe, Yehovha a nga swi lavi leswaku vanhu vakwe va endla swilo swo biha. Manyala wolawo lama a ma endliwa hi wanuna loyi, entiyisweni a ma onha ndhuma leyinene ya vandlha. Kumbexana a a ri eku kuceteleni ka Vakreste lava a va tihlanganisa na yena. Kutani i yini leswi Pawulo a leriseke vandlha leswaku ri swi endla?

5. I yini leswi Pawulo a byeleke vandlha leswaku ri swi endla naswona a a vula yini? (1 Vakorinto 5:13) (Nakambe vona xifaniso.)

⁵ Hlaya 1 Vakorinto 5:13. Yehovha u kongomise Pawulo ku tsala papila a vula leswaku mudyohi loyi a nga hundzukiki a susiwe evandlheni. Xana Vakreste vo tshembeka a va fanele va n’wi khoma njhani mudyohi yoloye? Pawulo u va byele leswaku va “tshika ku tihlanganisa” na yena. Xana sweswo a swi vula yini? Pawulo u hlamusele leswaku  xileriso lexi a xi vula leswaku “hambi ku ri ku dya [va] nga dyi na yena munhu wo tano.” (1 Kor. 5:11) Ku dya swakudya ni munhu swi nga endla leswaku mi sungula ku va vanghana. Swi le rivaleni leswaku Pawulo a a vula leswaku vandlha a ri fanelanga ri tihlanganisa ni munhu yoloye. Leswi a swi ta sirhelela vandlha leswaku ri nga tekeleli mikhuva yakwe yo biha. (1 Kor. 5:​5-7) Ku engetela kwalaho, loko vandlha ri n’wi papalata, a swi ta endla a swi xiya leswaku u twise Yehovha ku vava ivi a tisola kutani a hundzuka.

6. Papila ra Pawulo ri ri khumbe njhani vandlha swin’we ni mudyohi?

⁶ Loko Pawulo a rhumele papila rakwe eka Vakreste va le Korinto, u sungule ku tivutisa leswaku vandlha a ri ta endla yini. Hi ku famba ka nkarhi, Tito u n’wi byele mahungu lama n’wi tsakiseke. Vandlha ri ri amukele kahle papila ra Pawulo. (2 Kor. 7:​6, 7) Ri landzele  swiletelo swakwe. Nakambe, eka tin’hweti leti landzeleke endzhaku ka loko Pawulo a rhumele papila, mudyohi luya u hundzukile exidyohweni xakwe! U cince mahanyelo ni langutelo rakwe kutani a sungula ku hanya hi milawu yo lulama ya Yehovha. (2 Kor. 7:​8-11) Xana Pawulo a a ta byela vandlha leswaku ri endla yini?

NDLELA LEYI VANDLHA A RI FANELE RI KHOMA MUNHU LOYI A HUNDZUKEKE

7. Ku va mudyohi a susiwa evandlheni swi n’wi pfuna leswaku a endla yini? (2 Vakorinto 2:​5-8)

⁷ Hlaya 2 Vakorinto 2:​5-8. Pawulo u vule leswaku “ndzayo leyi, leyi nyikeriweke hi vo tala va n’wina yi enele eka munhu wo tano.” Hi marito man’wana ndzayo leyi se a yi hetisise xikongomelo xa yona eka mudyohi. Ku nga xikongomelo xihi? Xo endla leswaku a hundzuka.—Hev. 12:11.

8. I yini swin’wana leswi Pawulo a byeleke vandlha leswaku ri swi endla?

⁸ Loko a byela vandlha hi makwerhu loyi a dyoheke, Pawulo u te: “Mi n’wi rivalela hi musa mi tlhela mi n’wi chavelela, . . . mi n’wi kombisa rirhandzu.” Xiya leswaku Pawulo a a lava leswaku vandlha ri endla swo tala endzhaku ka loko ri amukele mudyohi exikarhi ka vanhu va Yehovha. A a lava leswaku ri kombisa mudyohi loyi a hundzukeke hi marito ni hi swiendlo leswaku ri n’wi rivalerile ni leswaku ra n’wi rhandza. Kutani a ri ta swi veka erivaleni leswaku ra tsaka hi leswi mudyohi a vuyeke evandlheni.

9. Hikwalahokayini van’wana swi nga ha endlekaka va kanakanile ku rivalela mudyohi la hundzukeke?

⁹ Xana va kona van’wana evandlheni lava a va nga swi lavi ku amukela munhu loyi a hundzukeke exikarhi ka vona? Bibele a yi hi byeli kambe swi nga endleka va ve kona. Phela swiendlo swakwe swi vangele vandlha hinkwaro swiphiqo naswona swi nga endleka swi khomise ni van’wana tingana. Swi nga endleka van’wana va vone swi nga fanelanga leswaku mudyohi a amukeriwa hi mandla mambirhi hikuva a va wa va pfuka leswaku va tshama va tshembekile. (Ringanisa Luka 15:​28-30.) Kutani hikwalahokayini a swi ri swa nkoka leswaku vandlha ri kombisa makwerhu loyi a hundzukeke leswaku ra n’wi rhandza?

10-11. Ku nga endleka yini loko vakulu va ala ku rivalela munhu loyi a hundzukeke?

¹⁰ Ehleketa leswaku ku nga endleka yini loko vakulu va ala ku amukela munhu loyi a hundzukeke evandlheni kumbe loko vandlha ri ala ku n’wi kombisa rirhandzu loko se a vuyile. A nga va ni “gome lerikulu.” A nga ha vona onge ku hundzuka kakwe a ku pfuni nchumu. Kumbexana a nga tshika ni ku lunghisa vuxaka bya yena ni Xikwembu.

¹¹ Xo biha no tlurisa, loko vamakwerhu evandlheni va ala ku rivalela munhu loyi a hundzukeke, va nga ha veka vuxaka bya vona na Yehovha ekhombyeni. Hikwalahokayini? Hikuva va ta va va nga kombisi langutelo ra Yehovha ro rivalela munhu loyi a hundzukeke kambe va ta va va kombisa langutelo ra tihanyi ra Sathana. Kahlekahle va ta va va pfumela ku tirhisiwa hi Diyavulosi leswaku va dlaya vuxaka lebyi munhu loyi a hundzukeke a nga na byona na Yehovha.—2 Kor. 2:​10, 11; Efe. 4:27.

12. Vandlha ri nga n’wi tekelela njhani Yehovha?

¹² Vandlha ra le Korinto a ri ta n’wi tekelela njhani Yehovha hayi Sathana? Hi ku tekelela ndlela leyi Yehovha a va khomaka hayona vanhu lava hundzukeke. Xiya leswi vatsari van’wana va Bibele va swi vuleke hi Yehovha. Davhida u vule leswaku Yehovha u “lulamile . . . naswona u lunghekele ku  rivalela.” (Ps. 86:5) Mikiya u tsale a ku: “Hi xihi Xikwembu lexi fanaka na wena, lexi rivalelaka xihoxo naswona xi nga hlayeliki milandzu?” (Mik. 7:18) Nakambe Esaya u te: “Lowo homboloka a a tshike mahanyelo yakwe, ni lowo biha miehleketo yakwe; a a tlhelele eka Yehovha, loyi a nga ta n’wi twela vusiwana eka Xikwembu xa hina, hikuva xi ta rivalela hi ndlela leyikulu.”—Esa. 55:7.

13. Hikwalahokayini a swi fanerile leswaku munhu loyi a hundzukeke a vuyiseriwa evandlheni? (Vona bokisi le ri nge, “ Wanuna Wa Le Korinto U Vuyiseriwe Rini?”)

¹³ Leswaku vandlha ra le Korinto ri tekelela Yehovha, a ri fanele ri amukela munhu loyi a hundzukeke ri tlhela ri n’wi tiyisekisa leswaku ra n’wi rhandza. Loko vandlha ri yingisa nkongomiso wa Pawulo wo amukela munhu loyi a hundzukeke, a ri kombisa leswaku ra “yingisa eka swilo hinkwaswo.” (2 Kor. 2:9) I ntiyiso leswaku mudyohi a lo susiwa swa tin’hweti ti nga ri tingani kambe ndzayo yi n’wi endle leswaku a hundzuka. A ku nga ri na xivangelo xa leswaku vakulu va hlwela ku n’wi vuyisela evandlheni.

NDLELA LEYI HI NGA TEKELELAKA VULULAMI NI TINTSWALO TA YEHOVHA

14-15. Hi dyondza yini eka ndlela leyi nandzu wa le vandlheni ra Korinto wa khale wu tameriweke hayona? (2 Petro 3:9) (Nakambe vona xifaniso.)

¹⁴ Ndlela leyi nandzu wa le vandlheni ra Korinto wa khale wu tameriweke hayona yi tsariwile ni ku hlayisiwa leswaku yi hi “letela.”  (Rhom. 15:4) Eka mhaka yoleyo, hi dyondza leswaku Yehovha a nga n’wi pfumeleli munhu loyi a endlaka xidyoho exikarhi ka vanhu vakwe. Yehovha nga swi pfumeleli leswaku vadyohi lava nga hundzukiki va kombiwa “tintswalo” kutani va ya emahlweni va tihlanganisa ni vagandzeri vakwe vo tshembeka. Yehovha u ni tintswalo kambe a nga pfumeleli swilo hinkwaswo naswona milawu yakwe a yi cinci. (Yuda 4) Ku endla tano a swi nga ta kombisa tintswalo hikuva a swi ta veka vandlha hinkwaro ekhombyeni.—Swiv. 13:20; 1 Kor. 15:33.

¹⁵ Kambe, hi dyondza leswaku Yehovha a nga swi lavi leswaku ku va ni munhu loyi a lovisiwaka. U lava ku ponisa vanhu loko swi koteka. U kombisa tintswalo eka vanhu lava hundzukaka hi timbilu ta vona hinkwato naswona va lavaka ku lunghisa vuxaka bya vona na Yena. (Ezek. 33:11; hlaya 2 Petro 3:9.) Xisweswo, loko wanuna yoloye wa le Korinto a hundzukile, a tshika xidyoho xakwe, Yehovha u tirhise Pawulo ku byela vandlha leswaku ri fanele ri n’wi rivalela ri tlhela ri n’wi amukela.

16. U titwa njhani hi ndlela leyi nandzu wa le Korinto wu tameriweke hayona?

¹⁶ Leswi hi kambisiseke ndlela leyi nandzu wa le Korinto wu tameriweke hayona, swi hi pfune hi vona leswaku Yehovha u ni rirhandzu ni vululami. (Ps. 33:5) Xana a swi ku endli u lava ku ya emahlweni u dzunisa Xikwembu xa hina? Phela hinkwerhu hi vadyohi naswona hi lava leswaku a hi rivalela. Hinkwerhu hi ni xivangelo xo khensa Yehovha hikwalaho ka nkutsulo lowu endlaka swi koteka leswaku hi rivaleriwa. Swa chavelela ni ku tiyisa nhlana ku tiva leswaku Yehovha wa va rhandza swinene vanhu vakwe naswona u va navelela leswinene!

17. Hi ta bula hi yini eka tinhlokomhaka leti landzelaka?

¹⁷ Xana milandzu ya vadyohi yi tameriwa njhani namuntlha? Vakulu va nga ku tekelela njhani ku navela ka Yehovha ko pfuna mudyohi a hundzuka? Vandlha ri fanele ri titwa njhani loko vakulu va teka xiboho xo susa kumbe ku vuyisela munhu evandlheni? Swivutiso leswi swi ta tlhuvutsiwa eka tinhlokomhaka leti landzelaka.