1. Hi byihi vumunhu lebyinene lebyi vanhu va Yehovha va nga na byona?

EMALEMBENI lama hundzeke, Bibele yi vule leswaku vanhu va Xikwembu a va ta “tinyiketela hi ku swi rhandza” entirhweni wa Yehovha lowu wu kongomisiwaka hi Yesu. (Ps. 110:3) Vuprofeta lebyi bya hetiseka namuntlha. Lembe ni lembe, malandza ya Yehovha ma heta tiawara ta timiliyoni eka ntirho wo chumayela. Ma endla ntirho lowu hi ku swi rhandza naswona a ma hakeriwi. Nakambe ma tinyika nkarhi wo pfuna vamakwerhu hi swilo leswi va swi lavaka, ku va khutaza ni ku va pfuna va tiyisa vuxaka bya vona na Yehovha. Vakulu ni malandza ya vutirheli va wa va pfuka leswaku va lunghiselela tinhlengeletano ta vandlha ni ku endla maendzo ya vurisi. I yini lexi va susumeteleka ku endla ntirho lowu? Hileswi va rhandzaka Yehovha ni vanhu van’wana.—Mat. 22:37-39.

2. Hilaha swi hlamuseriweke hakona eka Varhoma 15:1-3, Yesu u hi vekele xikombiso xihi?

² Yesu u hi vekele xikombiso lexinene loko swi ta emhakeni yo rhangisa swilaveko swa van’wana eka swa yena n’wini. Hi wa hi pfuka leswaku hi n’wi tekelela. (Hlaya Varhoma 15:1-3.) Lava va n’wi tekelelaka va ta vuyeriwa swinene. Yesu u te: “Ku nyika swi tisa ntsako lowukulu ku tlula ku amukela.”—Mit. 20:35.

3. Hi ta bula hi yini eka nhlokomhaka leyi?

 ³ Eka nhlokomhaka leyi, hi ta kambisisa leswi Yesu a swi endleke leswaku a pfuna van’wana ni ndlela leyi hi nga xi tekelelaka hayona xikombiso xakwe. Hi ta tlhela hi bula hi ndlela leyi hi nga antswisaka hayona eka ku pfuna van’wana.

4. Yesu u swi rhangise njhani swilaveko swa van’wana?

⁴Yesu a a pfuna van’wana hambiloko a karhele. Ehleketa ndlela leyi Yesu a titweke hayona loko vanhu vo tala va ya hlangana na yena ekusuhi na Kapernawume. A a hete vusiku hinkwabyo a ri karhi a khongela. Swi nga ha endleka leswaku a a karhele ngopfu kambe loko a va vona, u va twele vusiwana vanhu lava a va ri swisiwana ni lava a va vabya. A nga lo va hanyisa ntsena kambe u tlhele a nyikela yin’wana ya mivulavulo leyi khutazaka ematin’wini, ku nga Dyondzo ya le Ntshaveni.—Luka 6:12-20.

5. Xana tinhloko ta mindyangu ti xi tekelela njhani xikombiso xa Yesu xo rhangisa swilaveko swa van’wana hambiloko ti karhele?

⁵Ndlela leyi tinhloko ta mindyangu ti tekelelaka Yesu hayona. A hi nge hi xikombiso, nhloko ya ndyangu yi vuya hi le ntirhweni yi lo lee! Hambileswi a ringekaka ku tlula Dyondzo ya Ndyangu leswaku yi nga vi kona hi siku rero kambe u kombela Yehovha hi xikhongelo leswaku a n’wi nyika matimba yo yi fambisa. Yehovha u hlamula xikhongelo xakwe kutani va khoma vugandzeri bya ndyangu. Leswi swi endla leswaku vana va vona ku vatswari va vona va rhangisa vuxaka bya vona na Yehovha.

6. Nyika xikombiso xa ndlela leyi Yesu a tirhiseke nkarhi wakwe leswaku a pfuna van’wana.

⁶Yesu u tirhise nkarhi wakwe leswaku a pfuna van’wana hambiloko a lava ku va yexe. Ehleketa ndlela leyi Yesu a titweke hayona loko a twa leswaku munghana wakwe Yohane Mukhuvuri u dlayiwile. Leswi swi fanele swi n’wi tshove mbilu. Bibele yi ri: “Loko a twa [hi ta rifu ra Yohane], Yesu a suka kwalaho a famba hi xikepe a ya endhawini leyi nga riki na vanhu.” (Mat. 14:10-13) Swa twisiseka leswaku hikwalahokayini a lave nkarhi wo va yexe. Van’wana loko va feriwile va lava nkarhi wo va voxe leswaku va rila. Kambe Yesu a  nga swi kotanga ku va yexe. Ntshungu wu n’wi rhangele ku fika endhawini leyi a a lava ku va yexe eka yona. Xana u endle yini? U ehlekete hi leswi ntshungu a wu swi lava kutani “a wu twela vusiwana.” Yesu u swi xiyile leswaku a wu lava mpfuno ni nchavelelo lowu humaka eka Xikwembu kutani a nga banga mariri. Sweswo swi endle “a sungula ku wu dyondzisa [ku nga ri swilo switsongo kambe] swilo swo tala.”—Mar. 6:31-34; Luka 9:10, 11.

7-8. Nyika xikombiso xa ndlela leyi vakulu va tekelelaka Yesu loko van’wana va lava ku pfuniwa evandlheni.

⁷Ndlela leyi vakulu va tekelelaka Yesu hayona. Hi ba mandla hi vuyelela eka mitirho leyi vakulu va hi endlelaka yona! Mitirho yo tala leyi endliwaka hi vakulu, vamakwerhu a va yi tivi. Hi xikombiso, loko ku tshuka ku va ni mhaka ya xihatla leyi katsaka swa vutshunguri, Swirho swa Komiti yo Vulavula ni Swibedlhele swi tshama swi vambe ngoma leswaku swi pfuna vamakwerhu. Mikarhi yo tala swiyimo lexi swa xihatla swi endleka nivusiku! Kambe leswi va rhandzaka vamakwerhu, vakulu lava rhandzekaka swin’we ni mindyangu ya vona, va rhangisa swilaveko swa van’wana.

⁸ Vakulu va tlhela va pfuneta eku akiweni ka Tiholo ta Mfumo ni miako yin’wana, ku katsa ni le ka ntirho wo phalala. A ha ha vuli hi nkarhi wo tala lowu va wu hetaka va ri karhi va dyondzisa vamakwerhu evandlheni, va va khutaza ni ku va seketela. Ha va bumabumela vamakwerhu lava swin’we ni mindyangu ya vona. Onge Yehovha a nga ya emahlweni a katekisa ku tikarhata ka vona! Hambiswiritano, vakulu va fanele va ringanisela. A va fanelanga va tirhisa nkarhi wa vona hinkwawo  va endla vutihlamuleri bya vona evandlheni ivi va rivala hi swilaveko swa mindyangu ya vona.

9. Hi ku ya hi Vafilipiya 2:4, 5, hi yihi mianakanyo leyi Vakreste hinkwavo va faneleke va va na yona?

⁹ Hlaya Vafilipiya 2:4, 5. Hambileswi hi nga riki vakulu hinkwerhu kambe hi fanele hi dyondza ku tekelela Yesu emhakeni yo rhangisa swilaveko swa van’wana. Bibele yi vula leswaku u ‘fane ni hlonga.’ (Filp. 2:7) Ehleketa leswi hi swi dyondzaka eka ndzimana yoleyo. Hlonga lerinene ri tshama ri ri karhi ri lava tindlela to tsakisa n’wini wa rona. A swi kanakanisi leswaku u lava ku ya emahlweni u antswisa ndlela leyi u pfunaka vamakwerhu hayona hikuva u nandza wa Yehovha. Xiya swiringanyeto leswi landzelaka.

10. Hi swihi swivutiso leswi hi nga ha tivutisaka swona?

¹⁰Tikambisise. Tivutise swivutiso swo fana ni leswi: ‘Xana ndzi tiyimisele ku pfuna van’wana hi ku tirhisa nkarhi ni matimba ya mina? A hi nge ndzi komberiwa leswaku ndzi endzela makwerhu loyi a dyuhaleke ekaya rakwe kumbe ndzi komberiwa ku famba na makwerhu wa xisati etinhlengeletanweni ta vandlha, xana ndzi ta ku yini? Xana ndzi tiyimisele ku pfuna loko ku basisiwa Holo ya Mfumo kumbe laha tinhlengeletano ti khomiwaka kona?’ Yehovha wa tsaka loko hi tirhisa nkarhi wa hina, matimba ni swilo leswi hi nga na swona leswaku hi pfuna van’wana. Loko hi vona onge hi salele endzhaku, xana hi nga endla yini?

11. Xana xikhongelo xi nga hi pfuna njhani leswaku hi antswisa ndlela leyi hi pfunaka van’wana hayona?

¹¹Khongela eka Yehovha hi mbilu hinkwayo. Swi nga endleka u swi xiya leswaku u fanele u antswisa eka ndlela leyi u pfunaka van’wana hayona kambe a ku na nchumu lowu ku susumetelaka ku antswisa. Loko swi ri tano, yana eka Yehovha hi xikhongelo. U nga tumbeti nchumu. Byela Yehovha ndlela leyi u titwaka hayona naswona u n’wi kombela a ku “nyika matimba yo navela ni ku endla swilo hinkwaswo leswi [A] swi lavaka.”—Filp. 2:13.

12. Vamakwerhu va xinuna lava ha riki vantshwa va nga ri pfuna njhani vandlha?

¹² Loko u ri makwerhu wa xinuna loyi a khuvuriweke naswona wa ha ri muntshwa, kombela Yehovha leswaku a ku pfuna u navela ku pfuna vamakwerhu evandlheni. Ematikweni man’wana, ku ni vakulu vo tala ku tlula malandza ya vutirheli naswona yo tala ya malandza lama kona etindhawini teto se ti dya ti ya emagoveni. Leswi nhlangano wa Xikwembu wu yaka emahlweni wu kula, ku laveka vamakwerhu lava ha riki vantshwa leswaku va pfuna vakulu ku khathalela vanhu va Yehovha. U ta khapakhapa hi ntsako loko u tiyimisela ku pfuna hi tindlela hinkwato. Hikwalahokayini? Hikuva u ta tsakisa Yehovha, vamakwerhu va ta wu tlangela mpfuno wa wena naswona u ta eneriseka hi ku pfuna van’wana.

13-14. Hi nga endla yini leswaku hi pfuna vamakwerhu? (Vona xifaniso lexi nga eka xifunengeto)

¹³Xalamukela ku pfuna van’wana. Pawulo u byele Vaheveru a ku: “Mi nga rivali ku endla swilo leswinene ni ku avela van’wana swilo leswi mi nga na swona, hikuva Xikwembu xi tsakisiwa ngopfu hi magandzelo yo tano.” (Hev. 13:16) Xitsundzuxo xexo a xi fike hi nkarhi! Swi nga si ya kwihi va ha ku kuma papila leri, Vakreste va le Yudiya va boheke ku siya mabindzu, makaya ni maxaka lama nga riki Vakreste leswaku va ‘balekela etintshaveni.’ (Mat. 24:16) Hi nkarhi wolowo a swi ri swa nkoka leswaku va pfunana. Loko va xi yingisile  xitsundzuxo xa Pawulo mayelana ni ku avelana ni van’wana, swi ta va swi va oloverile ku hanya hi ku tsemelana nhloko ya njiya.

¹⁴ Mikarhi yin’wana vamakwerhu a va nge hi byeli hileswi va swi pfumalaka. Hi xikombiso, makwerhu wa xisati a nga ha fa ivi a siya nuna wakwe ni gome. Makwerhu loyi a nga ha lava ku pfuniwa hi swakudya, hi xo famba kumbe hi mitirho ya le kaya. A nga ha chava ku kombela mpfuno hileswi a chavaka ku va ndzhwalo. Loko ho teka goza ro n’wi pfuna a nga se ta eka hina, u ta swi tlangela swinene. A hi fanelanga hi va ni moya wa leswaku loko n’wana a nga rili u ta fela edzobyeni kumbe u ta pfuniwa hi van’wana. Tivutise, ‘Loko a ndzi ri exiyin’weni lexi fanaka, a ndzi ta tsakela ku pfuniwa hi tindlela tihi?’

15. Hi fanele hi endla yini leswaku hi pfuna van’wana?

¹⁵Ngheneka. Swi nga endleka u tiva vamakwerhu lava tshamaka va lunghekele ku pfuna van’wana evandlheni. A va hi endli hi titwa onge hi ndzhwalo. Ha swi tiva ku hi nga ya eka vona nkarhi wun’wana ni wun’wana leswaku va hi pfuna naswona ha swi lava ku va tekelela. Nkulu loyi a vuriwaka Alan naswona a nga ni malembe ya 45, u tirhela emhakeni ya ku va loyi a nghenekaka. Loko a vulavula hi xikombiso xa Yesu, u ri: “Yesu a a tshama a ri bizi kambe vanhu hinkwavo a va tshunxeka ku ya eka yena leswaku va ya kombela mpfuno. A va swi tiva leswaku Yesu a a khathala hi vona. Ndzi lava ku tekelela Yesu hi ku va la nghenekaka naswona ndzi lava vanhu va swi tiva leswaku ndza khathala ha vona.”

16. Pisalema 119:59, 60 yi nga hi pfuna njhani ku tekelela Yesu?

¹⁶ Hi nga wi mapa loko hi nga swi koti ku tekelela Yesu hi ku helela. (Yak. 3:2) Xichudeni a xi nge n’wi tekeleli hi ku helela mudyondzisi  wa xona. Xichudeni xi ta antswisa loko xo ya emahlweni xi dyondza eka swihoxo swa xona ni ku lwa hi matimba ku tekelela mudyondzisi wa xona. Na hina hi nga swi kota ku tekelela Yesu loko hi tirhisa leswi hi swi dyondzaka eBibeleni ni ku tikarhatela ku lulamisa swihoxo swa hina.—Hlaya Pisalema 119:59, 60.

17-18. Ku ta va ni vuyelo byihi loko hi pfuna van’wana ku fana na Yesu?

¹⁷ Van’wana va ta hi tekelela loko hi ri ni moya wo pfuna. Nkulu la vuriwaka Tim, u ri: “Evandlheni hi ni vamakwerhu lava ha riki vantshwa lava veke malandza ya vutirheli hikwalaho ka leswi va tekeleleke xikombiso xa vamakwerhu lava a va ri ni moya wo pfuna van’wana. Leswi va tinyiketeleke ku pfuna vandlha, va va mpfuno wukulu eka vakulu.”

¹⁸ Hi hanya emisaveni ya mina hi mina. Kambe vanhu va Yehovha a va tano. Ya hi tsakisa ndlela leyi Yesu a pfuneke van’wana hayona naswona hi lava ku n’wi tekelela. A hi nge swi koti ku fana na yena thwii, kambe hi nga swi kota ku “landzelerisisa mikondzo yakwe.” (1 Pet. 2:21) Loko hi tikarhatela ku tekelela ndlela leyi Yesu a a pfuna van’wana hayona, hi ta tsaka ku tiva leswaku hi tsakisa Yehovha.