1. I yini leswi Yehovha a ku endleleke swona?

I YINI lexi ku endleke u va Mbhoni ya Yehovha? Swi nga endleka u twe “mahungu lamanene” ro sungula eka vatswari va wena, vatirhikuloni, vadyondzikuloni kumbe loko ku chumayeriwa hi yindlu ni yindlu. (Mar. 13:10) Endzhaku, makwerhu un’wana u hete nkarhi wo tala a ri karhi a ku dyondzisa Bibele. Loko mi ri karhi mi dyondza, u sungule ku rhandza Yehovha ni ku tiva leswaku wa ku rhandza. Yehovha u ku kokele eka yena naswona leswi se u nga mudyondzisiwa wa Yesu Kreste u ni ntshembo wo hanya hilaha ku nga heriki. (Yoh. 6:44) A wu kanakani leswaku Yehovha u tirhise munhu un’wana leswaku a ku dyondzisa Bibele naswona wa N’wi khensa hikwalaho ka sweswo ni hileswi A ku amukeleke tanihi nandza Wakwe.

2. Hi ta kambisisa yini eka nhlokomhaka leyi?

² Leswi sweswi se hi tivaka ntiyiso, hi ni vutihlamuleri byo pfuna van’wana leswaku va famba egondzweni leri yisaka evuton’wini. Swi nga endleka swi hi olovela ku chumayela hi yindlu ni yindlu kambe swi hi tikela ku dyondza ni vanhu Bibele. Xana na wena u titwa tano? Loko swi ri tano, swiringanyeto leswi nga eka nhlokomhaka leyi swi ta ku pfuna. Hi ta bula hi leswi hi susumetelaka ku endla vadyondzisiwa. Hi ta tlhela hi bula hi leswi nga hi pfunaka hi hlula mitlhontlho leyi nga hi sivelaka ku dyondza ni vanhu Bibele. A hi sunguleni hi bula hi xivangelo lexi hi endlaka hi chumayela vanhu ni ku va dyondzisa mahungu lamanene.

3. Hikwalahokayini hi chumayela?

³ Loko Yesu a ha ri laha misaveni, u nyike valandzeri vakwe swileriso swimbirhi. Xo sungula, u va lerise ku chumayela mahungu lamanene ya Mfumo a tlhela a va komba ndlela leyi va faneleke  va swi endla hayona. (Mat. 10:7; Luka 8:1) Xa nkoka swinene, u va dyondzise leswi a va fanele va swi endla loko va kuma vanhu lava tsakelaka rungula ra Mfumo ni lava nga ri tsakeliki. (Luka 9:2-5) U tlhele a va byela leswaku ntirho wa vona wo chumayela a wu ta fikelela vanhu vo tala naswona a va ta “chumayela emisaveni hinkwayo.” (Mat. 24:14; Mit. 1:8) Hambiloko van’wana va nga lavi no twa, vadyondzisiwa a va tiyimisele ku chumayela mahungu lamanene ya Mfumo wa Xikwembu nileswi wu nga ta swi endla.

4. Hi ku ya hi Matewu 28:18-20, hi fanele hi endla yini swin’wana loko hi ri karhi hi chumayela hi Mfumo?

⁴ Hi xihi xileriso xa vumbirhi lexi Yesu a xi nyikeke vadyondzisiwa vakwe? U va byele leswaku va dyondzisa vanhu ku hlayisa swilo hinkwaswo leswi a va leriseke swona. Xana ntirho lowu wo chumayela ni wo dyondzisa a wu fanele wu endliwa hi Vakreste va le nkarhini wa vaapostola ntsena hilaha van’wana va vulaka hakona? Nikatsongo, Yesu u vule leswaku a wu ta endliwa ni le nkarhini wa hina “kukondza makumu ma fika.” (Hlaya Matewu 28:18-20.) Loko a nyika vadyondzisiwa vakwe xileriso xexo, a ku ri ni vamakwerhu vo tlula 500. (1 Kor. 15:6) Nakambe eka nhlavutelo leyi a yi nyikeke Yohane, u vule leswaku vadyondzisiwa vakwe hinkwavo va fanele va pfuna vanhu va dyondza hi Yehovha.—Nhlav. 22:17.

5. Eka 1 Vakorinto 3:6-9, Pawulo u fanise ntirho wo chumayela ni wo dyondzisa na yini?

⁵ Pawulo u fanise ntirho wo endla vadyondzisiwa ni ku byala mbewu, u kombise leswaku a hi fanelanga hi byala mbewu swi helela kwalaho. U byele Vakorinto a ku: “Mina ndzi byarile, Apolosi a cheleta . . . Nwina mi nsimu ya Xikwembu leyi rimiwaka.” (Hlaya 1 Vakorinto 3:6-9.) Leswi hi nga vatirhi ‘ensin’wini ya Xikwembu,’ a hi byali mbewu ntsena kambe hi tlhela hi yi cheleta ni ku tshama hi ri karhi hi yi kamba loko yi kula. (Yoh. 4:35) Hi nkarhi lowu fanaka, hi tlhela hi swi vona leswaku Xikwembu hi xona xi yi kurisaka.

6. Ntirho wa hina wo dyondzisa wu katsa yini?

⁶ Hi lavisisa lava ‘lavaka ku kuma vutomi lebyi nga heriki.’ (Mit. 13:48) Leswaku hi va endla vadyondzisiwa, hi fanele hi va pfuna va (1) twisisa, (2) va tshemba, (3)  ni ku tlhela va hanya hi leswi va swi dyondzaka eBibeleni. (Yoh. 17:3; Kol. 2:6, 7; 1 Tes. 2:13) Vamakwerhu hinkwavo evandlheni va nga pfuna swichudeni swa Bibele hi ku swi komba rirhandzu ni ku swi endla swi titwa swi ri ekaya loko swi ta etinhlengeletanweni ta vandlha. (Yoh. 13:35) Makwerhu loyi a dyondzisaka xichudeni a nga ha boheka ku heta nkarhi wo tala a ri karhi a xi pfuna ku tshika tidyondzo ta mavunwa leti ‘simekiweke ti tiya’ kumbe mahanyelo ya xona. (2 Kor. 10:4, 5) Swi nga ha teka tin’hweti to tala ku pfuna xichudeni leswaku xi kota ku khuvuriwa. Kambe matshalatshala ya hina a ma nge vi nyuku wa mbyana.

7. I yini lexi hi susumetelaka ku chumayela ni ku endla vadyondzisiwa?

⁷ I yini lexi hi endlaka hi chumayela ni ku endla vadyondzisiwa? Xo sungula, hileswi hi rhandzaka Yehovha. Loko u tirha hi matimba entirhweni wo chumayela ni wo endla vadyondzisiwa, swi kombisa leswaku u rhandza Xikwembu. (1 Yoh. 5:3) Ehleketa hi mhaka leyi: Ku rhandza Yehovha swi ku susumetele leswaku u famba hi muti ni muti u chumayela. Xana swa olova ku yingisa xileriso lexi? Nikatsongo. Xana u titwe njhani loko u nghena emutini ro sungula u lava ku chumayela? Swi le rivaleni leswaku a wu chuhile! Kambe a wu swi tiva leswaku u endla ntirho lowu Yesu a ku rhumeke wona naswona u yingisa xileriso xakwe. Hi ku famba ka nkarhi, se a swi ku olovela ku  chumayela. Xana swi njhani loko u fanele u dyondza ni munhu Bibele? Wa chava? Kumbexana. Kambe loko u kombela Yehovha leswaku a ku pfuna u hlula ku chava ni ku tlhela u kombela xivindzi xo kota ku dyondzisa Bibele, u ta hlamula xikombelo xa wena naswona u ta ku pfuna u rhandza ntirho wo chumayela.

8. Hi ku ya hi Marka 6:34, i yini xin’wana lexi hi endlaka hi chumayela?

⁸ Xa vumbirhi, ku rhandza vanhu hi swona swi endlaka hi va dyondzisa ntiyiso wa le Bibeleni. Siku rin’wana, Yesu ni vadyondzisiwa vakwe a va karhele hileswi va heteke nkarhi wo leha va ri eku chumayeleni. Va lave ndhawu leyi a va ta koka moya eka yona kambe ntshungu wu va landze ni laha a va ri kona. Loko Yesu a wu vona, u wu twele vusiwana kutani a sungula ku wu dyondzisa “swilo swo tala.” (Hlaya Marka 6:34.) Hambileswi a lo lakahlaa kambe u ye emahlweni a wu dyondzisa. Hikwalahokayini? Hikuva a a yi twisisa kahle ndlela leyi a wu titwa hayona. U vone ndlela leyi a wu xaniseka hayona kutani a a lava ku wu pfuna ni ku wu nyika ntshembo hi vumundzuku. Ninamuntlha vanhu vo tala a va na ntshembo hi vumundzuku. Va vonaka onge va tsakile kambe a swi tano. Va fana ni tinyimpfu leti lahlekeke naswona ti nga riki na murisi. Muapostola Pawulo u vule leswaku vanhu lava, a va tivi Xikwembu naswona a va na ntshembo. (Efe. 2:12) Va le ka “nyangwa lowu yisaka eku lovisiweni.” (Mat. 7:13) Loko hi ehleketa hi vanhu va le nsin’wini ya ka hina, rirhandzu ni ntwelavusiwana swi hi susumetela ku va chumayela. Ndlela yin’wana leyi hi nga va pfunaka hayona, i ku kombela ku dyondza na vona Bibele.

9. Hi ku ya hi Vafilipiya 2:13, Yehovha u ta ku pfuna njhani?

⁹ Kumbexana wa kanakana ku dyondza na munhu Bibele hileswi u tivaka leswaku swi lava nkarhi wo tala ku endla tano. Loko swi ri tano, byela Yehovha ndlela leyi u titwaka hayona. N’wi kombele a ku pfuna u kuma munhu loyi u nga dyondzaka na yena Bibele. (Hlaya Vafilipiya 2:13.) Muapostola Yohane u vule leswaku Xikwembu xi ta hlamula swikhongelo swa hina leswi fambisanaka ni ku rhandza ka Xona. (1 Yoh. 5:14, 15) Hilaha ku fanaka, na wena tshemba leswaku Yehovha u ta ku pfuna u navela ku hoxa xandla entirhweni wo endla vadyondzisiwa.

10-11. I yini lexi nga endlaka hi chava ku dyondza ni vanhu Bibele?

¹⁰ Hi wu teka wu ri wa nkoka ntirho lowu hi nyikiweke wona wo endla vadyondzisiwa hambileswi hi langutanaka ni mitlhontlho leyi nga hi sivelaka ku endla leswi engetelekeke entirhweni lowu. A hi kambisiseni mitlhontlho ya kona ni ndlela leyi hi nga yi hlulaka hayona.

¹¹ Hi nga ha tsandzeka ku endla leswi hi swi lavaka hikwalaho ka swiyimo swa hina. Hi xikombiso, vamakwerhu van’wana va dyuharile kumbe va vabya. Xana na wena swi tano? Loko swi ri tano, xiya leswi hi swi dyondzeke eka ntungu wa COVID-19. Hi dyondze leswaku hi nga swi kota ku ya emahlweni hi dyondza ni vanhu Bibele hi ku tirhisa tifoni. Hi nga tlhela hi swi kota ku dyondza ni vanhu Bibele hi ri emakaya. Nakambe ku ni nchumu wun’wana wo tsakisa. Van’wana va tsakela ku dyondza Bibele kambe a va kumeki emakaya hi mikarhi leyi vamakwerhu va chumayelaka hayona. Hambiswiritano, va nga ha kumeka nimixo kumbe nimadyambu. Xana u nga swi kota ku tinyika nkarhi wo dyondza ni vanhu volavo Bibele? Yesu u dyondzise Nikodema nivusiku, ku nga nkarhi lowu Nikodema a a tsakela ku dyondza ha wona.—Yoh. 3:1, 2.

12. I yini lexi hi endlaka hi tshemba leswaku hi nga va vadyondzisi lavanene?

¹² Hi nga ha tibyela leswaku hi pfumala  vuswikoti byo dyondzisa vanhu Bibele. Kumbexana hi tibyela leswaku ku laveka vutivi kumbe vuswikoti byo karhi leswaku hi kota ku dyondzisa munhu Bibele. Loko u titwa tano, xiya swilo swinharhu leswi nga ku pfunaka u titshemba. Xo sungula, Yehovha u ku vona u faneleka ku dyondzisa van’wana. (2 Kor. 3:5) Xa vumbirhi, Yesu loyi a “nyikiweke matimba yo lawula swilo hinkwaswo etilweni ni le misaveni” u ku rhume ku dyondzisa. (Mat. 28:18) Xa vunharhu, u nga kombela mpfuno eka van’wana. Yesu a a titshege hileswi Tata wakwe a a n’wi dyondzise swona na wena u nga endla tano. (Yoh. 8:28; 12:49) Nakambe u nga kombela mulanguteri wa ntlawa wa nsimu ya ka n’wina, phayona kumbe muhuweleri loyi a nga ni ntokoto leswaku va ku pfuna u sungula ku dyondza ni munhu Bibele. Xin’wana lexi nga ku pfunaka, i ku famba na vona loko va ya dyondza ni swichudeni swa vona swa Bibele.

13. Hikwalahokayini hi fanele hi tiyimisela ku dyondzisa hi tindlela to hambanahambana?

¹³ Swi nga hi tikela ku tolovela madyondziselo lamantshwa ni ku tirhisa switirhisiwa leswintshwa swo chumayela. Ndlela leyi hi sungulaka hayona ku dyondza ni vanhu Bibele se yi cincile. Buku leyi hi yi tirhisaka ku dyondza ni vanhu Bibele, leyi nge Tiphine Hi Vutomi Hilaha Ku Nga Heriki! yi lava hi lunghiselela leswi hi nga ta swi dyondza ni xichudeni ni ku dyondzisa hi ndlela leyi hambaneke ni leyi a hi dyondzisa hayona enkarhini lowu nga hundza. Hi hlaya tindzimana ti nga ri tingani kutani hi bula ni xichudeni. Loko hi ri karhi hi dyondzisa, hi tirhisa tivhidiyo to tanihi leti kumekaka eka JW Library. Loko u nga swi koti ku tirhisa switirhisiwa leswi, kombela van’wana va ku dyondzisa. Hi ntumbuluko vanhu va rhandza ku endla swilo leswi va swi toloveleke. A swi olovi ku dyondza swilo leswintshwa. Kambe hi mpfuno wa Yehovha ni vamakwerhu, swi ta ku olovela ku tiva tindlela letintshwa to dyondzisa naswona u ta tirhandza. Phayona rin’wana ri te, ndlela leyi yo dyondzisa yi endla leswaku “xichudeni ni mudyondzisi va tiphina.”

14. Hi swihi leswi hi faneleke hi swi tsundzuka loko hi tirha ensin’wini ya vanhu lava nga tsakeriki naswona 1 Vakorinto 3:6, 7, yi hi khutaza njhani?

¹⁴ Hi nga ha va hi tshama endhawini leyi swi tikaka ku sungula ku dyondza ni vanhu Bibele. Van’wana va nga ha ala ku amukela leswi hi va chumayelaka swona kumbe va hi kaneta. I yini lexi nga hi pfunaka hi va ni ntshembo wa leswaku siku rin’wana va ta hi yingisa? Tsundzuka leswaku swiyimo swa vanhu swi nga ha cinca hi ku tsopeta ka tihlo naswona lava a va nga lavi ku twa nchumu hi hina va nga ha tsakela ku dyondza Bibele. (Mat. 5:3) Van’wana lava khale a va nga swi lavi ku teka tibuku ta hina, hi ku famba ka nkarhi va pfumele ku dyondzeriwa Bibele. Hikwalaho, ha swi tiva leswaku Yehovha hi yena N’wini wa ntshovelo. (Mat. 9:38) U lava hi ya emahlweni hi byala ni ku cheleta kambe Yena u ta swi kurisa. (1 Kor. 3:6, 7) Swa khutaza ku tiva leswaku Yehovha a nga languti nhlayo ya vanhu lava hi dyondzaka na vona Bibele kumbe nhlayo yo karhi ya tibuku leti hi nyikaka vanhu kambe u languta ku tikarhata ka hina naswona u ta hi hakela! *

15. Yehovha u titwa njhani loko munhu a pfumela ku dyondzeriwa Bibele a tlhela a tirhisa leswi a swi dyondzaka?

¹⁵ Yehovha wa tsaka loko munhu a amukela ntiyiso lowu nga eBibeleni a tlhela a wu dyondzisa van’wana. (Swiv. 23:15, 16) Yehovha u tsaka ngopfu loko a vona ntirho lowu hi wu endlaka namuntlha! Hi xikombiso, hambileswi emisaveni hinkwayo eka lembe ra ntirho ra  2020 ku veke ni ntungu, ku dyondzisiwe vanhu vo ringana 7 705 765 Bibele naswona sweswo swi endle leswaku vanhu vo ringana 241 994 va khuvuriwa. Vadyondzisiwa lava lavantshwa na vona va ta dyondza ni vanhu Bibele naswona sweswo swi ta endla leswaku nhlayo ya vadyondzisiwa yi engeteleka. (Luka 6:40) A swi kanakanisi leswaku Yehovha wa tsaka loko hi pfuna van’wana leswaku va va vadyondzisiwa.

16. Hi swihi swilo leswinene leswi hi lavaka ku swi fikelela?

¹⁶ A swi olovi ku endla vadyondzisiwa kambe hi ku pfuniwa hi Yehovha hi nga swi kota ku dyondzisa swichudeni leswintshwa leswaku swi rhandza Tata wa hina wa le tilweni. A hi tiyimiseleni ku kuma vanhu lava hi nga dyondzaka na vona Bibele. Swi ta hi hlamarisa ngopfu ku vona ndlela leyi va nga ta angula hayona loko hi kombela ku dyondza na vona Bibele. Hi ta swi vona leswaku Yehovha wa ma katekisa matshalatshala ya hina.

17. Hi ta titwa njhani loko hi dyondza ni vanhu ni Bibele?

¹⁷ Hakunene i nkateko ku chumayela ni ku dyondzisa van’wana ntiyiso! Ntirho lowu wu endla hi tsaka. Muapostola Pawulo, loyi a pfuneke vanhu vo tala eTesalonika leswaku va va vadyondzisiwa, u hlamusele ndlela leyi a titwaka hayona, u te: “Hi wihi ntshembo wa hina kumbe ntsako kumbe harhi ya ku khana emahlweni ka Hosi ya hina Yesu hi nkarhi wa ku vuya kakwe? Xana a hi n’wina? Hakunene mi ku vangama ni ntsako wa hina.” (1 Tes. 2:19, 20; Mit. 17:1-4) Vo tala va titwa tano. Makwerhu waxisati Stéphanie, ni nuna wakwe lava pfuneke vanhu vo tala leswaku va khuvuriwa u ri: “Swi tsakisa ngopfu ku pfuna vanhu leswaku va tinyiketela eka Yehovha.”