1. Vakorinto va Vumbirhi 3:1-3, yi endla hi titwa njhani hi nkateko lowu hi nga na wona wo dyondzisa munhu Bibele kukondza a khuvuriwa? (Vona xifaniso lexi nga eka xifunengeto.)

 XANA u titwa njhani loko u vona xichudeni xa Bibele xa le vandlheni ra ka n’wina xi khuvuriwa? A swi kanakanisi leswaku wa tsaka. (Mat. 28:19) Loko ku ri xichudeni xa wena lexi khuvuriwaka, a swi kanakanisi leswaku wa khapakhapa hi ntsako! (1 Tes. 2:19, 20) Vadyondzisiwa lava ha ku khuvuriwaka i “mapapila ya xibumabumelo” eka lava va va dyondziseke ni le ka vandlha hinkwaro.—Hlaya 2 Vakorinto 3:1-3.

2. (a) Hi xihi xivutiso xa nkoka lexi hi nga ta bula ha xona naswona hikwalahokayini? (b) Swi vula yini ku dyondzisa munhu Bibele? (Vona nhlamuselo ya le hansi.)

² Lexi tsakisaka eka malembe ya mune lama hundzeke, hi xiringaniso ku vikiwe kwalomu ka 10 000 000 wa swichudeni swa Bibele * emisaveni hinkwayo n’hweti ni n’hweti. Eka malembe wolawo, hi xiringaniso a ku khuvuriwa vanhu vo tlula 280 000 lembe ni lembe leswaku va va Timbhoni ta Yehovha ni vadyondzisiwa va Yesu Kreste. Hi nga swi pfuna njhani swichudeni sweswo swa timiliyoni leswaku swi khuvuriwa? Loko Yehovha a ha lehisela vanhu mbilu ni ku va nyika nkarhi wo va vadyondzisiwa va Kreste, hi lava ku va pfuna leswaku va khuvuriwa handle ko dya nkarhi. Nkarhi lowu saleke wu komile!—1 Kor. 7:29a; 1 Pet. 4:7.

3. Hi ta bula hi yini eka nhlokomhaka leyi mayelana ni ku dyondzisa vanhu Bibele?

 ³ Leswi ku endla vadyondzisiwa swi nga swa xihatla, marhavi ma komberiwe ku lava tindlela leti nga hi pfunaka leswaku hi kota ku pfuna swichudeni swo tala swa Bibele swi fanelekela ku khuvuriwa. Eka nhlokomhaka leyi ni leyi landzelaka, hi ta twa leswi hi nga swi dyondzaka eka maphayona, varhumiwa ni valanguteri va miganga. * (Swiv. 11:14; 15:22) Va hlamusela leswi vadyondzisi ni swichudeni swa vona va nga swi endlaka leswaku dyondzo yi va leyi tswalaka mihandzu. Eka nhlokomhaka leyi, hi ta bula hi swilo swa ntlhanu leswi xichudeni xi faneleke xi swi endla leswaku xi ta fanelekela ku khuvuriwa.

4. I yini lexi hi faneleke hi xi tsundzuka loko hi dyondzisa munhu Bibele hi lo yima?

⁴ Vamakwerhu vo tala va dyondzisa n’wini wa muti Bibele va lo yima. Hambileswi sweswo swi nga pfunaka munhu a tsakela ku dyondza Bibele, hakanyingi mabulo ya kona ma komile naswona swi nga endleka mi nga dyondzi vhiki ni vhiki. Van’wana loko va kume munhu loyi a tsakelaka ku dyondza va kombela tinomboro ta yena ta foni leswaku va ta n’wi fonela kumbe va n’wi rhumela meseji lowu vulavulaka hi Bibele. Swi nga ha teka tin’hweti va ri karhi va endla tano kambe dyondzo ya Bibele yi nga si sunguriwa. Xana xichudeni * xi nga tinyiketela ni ku fanelekela ku khuvuriwa loko mikarhi hinkwayo xi dyondza Bibele xi lo yima? Nikatsongo!

5. Hi ku ya hi Luka 14:27-33, i yini leswi Yesu a swi vuleke leswi nga hi pfunaka entirhweni wo endla vadyondzisiwa?

⁵ Yesu u tirhise xifaniso ku kombisa leswaku loko munhu a lava ku va mudyondzisiwa wakwe swi ta n’wi koxa swo karhi. U vulavule hi wanuna loyi a lavaka ku aka yindlu ni hi hosi leyi lavaka ku ya enyimpini. Yesu u vule leswaku wanuna yoloye u fanele a rhanga hi ku hlayela ntsengo ku vona loko “a ri ni mali leyi ringaneke” yo heta ku aka ni leswaku hosi yi fanele yi rhanga hi ku “kanela ni van’wana” ku vona loko masocha ya yona ma ta swi kota ku hlula. (Hlaya Luka 14:27-33.) Yesu a a lava leswaku munhu loyi a lavaka ku va mudyondzisiwa wakwe a swi tiva leswaku ku endla tano swi ta n’wi koxa swo karhi. Hikwalaho, hi lava ku khutaza swichudeni swa hina leswaku swi tinyika nkarhi wo dyondza vhiki ni vhiki. Hi nga swi endla njhani sweswo?

6. Hi nga swi pfuna njhani swichudeni swa hina leswaku swi endla nhluvuko?

 ⁶ Sungula hi ku lehisa dyondzo leyi mi vaka na yona mi lo yima. Kumbexana nkarhi ni nkarhi loko u xi endzela mi nga bula hi Matsalwa ma nga ri mangani. Loko se xi swi toloverile sweswo, kombela ndhawu yo tshama leswaku mi ta yisa bulo emahlweni. Nhlamulo ya xona yi ta swi kombisa loko xi tiyimiserile hakunene ku dyondza Bibele. Leswaku u xi pfuna xi endla nhluvuko hi ku hatlisa, u nga xi vutisa loko xi ta swi kota ku dyondza kambirhi hi vhiki. Kambe ku na swin’wana swi lavekaka ku tlula ku va u dyondza na xona kan’we kumbe kambirhi hi vhiki.

7. Mudyondzisi a nga yi lunghiselela njhani dyondzo a nga si ya dyondzisa xichudeni xakwe?

⁷ Leswi u nga mudyondzisi, u fanele u lunghiselela kahle u nga si ya dyondzisa xichudeni xa wena. Hlaya rungula leri mi nga ta ri dyondza ni matsalwa lama kombisiweke. Kuma rungula leri khomeke mongo wa mhaka. Ehleketa hi nhlokomhaka, swihlokwana, swivutiso, matsalwa lama nge “hlaya,” swifaniso ni tivhidiyo leti fambisanaka kahle ni mhaka leyi mi nga ta yi dyondza. Ehleketa hi ndlela leyi u nga ta yi veka hayona mhaka leyi mi nga ta yi dyondza leswaku xichudeni xa wena xi ta yi twisisa hi ku olova ni ku tirhisa leswi xi nga ta swi dyondza.—Neh. 8:8; Swiv. 15:28a.

8. Hi dyondza yini mayelana ni ku khongelela swichudeni swa hina eka marito lawa muapostola Pawulo a ma tsaleke eka Vakolosa 1:9, 10?

⁸ Loko u lunghiselela, titolovete ku khongelela xichudeni xa wena ni swilaveko swa xona. Kombela Yehovha a ku pfuna u fikelela mbilu ya xona loko u ri karhi u xi dyondzisa Bibele. (Hlaya Vakolosa 1:9, 10.) Ehleketa hi leswi swi nga ha xi tikelaka ku swi twisisa kumbe ku swi amukela. Tsundzuka leswaku xikongomelo xa wena i ku xi pfuna leswaku xi fanelekela ku khuvuriwa.

9. Mudyondzisi a nga xi dyondzisa njhani xichudeni xakwe ku lunghiselela? Hlamusela.

⁹ Ha tshemba leswaku loko dyondzo yi ri karhi yi ya emahlweni, xichudeni xi ta swi tlangela leswi Yehovha na Yesu va xi endleleke swona naswona xi ta lava ku dyondza leswi engetelekeke. (Mat. 5:3, 6) Leswaku xichudeni xi ta vuyeriwa eka leswi xi swi dyondzaka, xi fanele xi tinyiketela. Leswaku xi kota ku endla tano, xi hlamusele hi nkoka wo lunghiselela ni ku ehleketisisa hi ndlela leyi xi nga ri tirhisaka hayona rungula leri xi ri hlayeke. Mudyondzisi  a nga xi pfuna njhani? Lunghiselela na xona u xi komba leswaku swi endliwa njhani. * Xi kombe ndlela yo kuma tinhlamulo ni yo khwatihata marito kumbe swiga leswi nga ta endla xi tsundzuka tinhlamulo ta xona. Xi khutaze ku hlamula hi marito ya xona. Loko xi endla tano, u ta kota ku swi vona loko xi swi twisisa leswi xi swi dyondzaka. Kambe ka ha ri na swin’wana leswi u faneleke u khutaza xichudeni xa wena leswaku xi swi endla.

10. Hikwalahokayini swi ri swa nkoka ku hlaya Bibele siku ni siku naswona xichudeni xi fanele xi endla yini leswaku xi ta vuyeriwa?

¹⁰ Handle ko dyondzisiwa hi mudyondzisi wa xona vhiki ni vhiki, leswaku xi ta vuyeriwa xichudeni xi fanele xi tinyika nkarhi wo hlaya. Xi fanele xi vulavurisana na Yehovha. Njhani? Hi ku n’wi yingisa xi tlhela xi vulavula na yena. Xi nga yingisa Xikwembu hi ku hlaya Bibele siku ni siku. (Yox. 1:8; Ps. 1:1-3) Xi kombe ndlela yo tirhisa “Xiyimiso Xo Dyondza Bibele” lexi nga eka jw.org. * Leswaku xi ta vuyeriwa, xi khutaze ku anakanyisisa hi leswi Bibele yi xi dyondzisaka swona hi Yehovha ni ndlela leyi xi nga swi tirhisaka hayona leswi xi swi dyondzaka.—Mit. 17:11; Yak. 1:25.

11. U nga xi dyondzisa njhani xichudeni xa wena ku khongela naswona hikwalahokayini xi fanele xi khongela nkarhi ni nkarhi?

¹¹ Khutaza xichudeni xa wena leswaku xi vulavula na Yehovha hi ku khongela siku ni siku. Loko mi sungula niloko mi gimeta dyondzo, khongela swin’we na xona swi suka embilwini u tlhela u xi katsa exikhongelweni. Loko xi twa ndlela leyi u khongelaka hayona, xi ta dyondza ndlela yo khongela eka Yehovha Xikwembu swi suka embilwini hi vito ra Yesu Kreste. (Mat. 6:9; Yoh. 15:16) Ku hlaya Bibele siku ni siku (ku yingisela Yehovha) ni ku khongela (ku vulavula na Yehovha) swi ta xi pfuna leswaku xi tshinela eka Xikwembu! (Yak. 4:8) Loko xichudeni xa wena xo tolovela ku endla leswi, swi ta xi pfuna leswaku xi tinyiketela ni ku fanelekela ku khuvuriwa.

12. Mudyondzisi a nga xi pfuna njhani xichudeni xakwe leswaku xi va ni vuxaka na Yehovha?

¹² Leswi xichudeni xi swi dyondzaka eBibeleni, swi fanele swi xi fikelela mbilu. Hikwalahokayini? Mbilu ya hina leyi katsaka ku navela ni ndlela leyi hi titwaka hayona yi hi susumetela ku teka goza. Yesu loko a dyondzisa a a  kota ku fikelela timbilu ta vanhu. Sweswo hi swona leswi endleke leswaku vanhu va n’wi landzela. (Luka 24:15, 27, 32) Xichudeni xa wena xi fanele xi teka Yehovha a ri wa xiviri, loyi xi nga vaka ni vuxaka na yena, xi tlhela xi N’wi teka tanihi Tatana ni Munghana wa xona. (Ps. 25:4, 5) Loko u ri karhi u xi dyondzisa, xi pfune xi swi twisisa kahle leswaku Xikwembu xi njhani. (Eks. 34:5, 6; 1 Pet. 5:6, 7) Mikarhi hinkwayo loko u xi dyondzisa, vulavula ngopfu hi ndlela leyi Yehovha a nga xiswona. Xi pfune xi tlangela rirhandzu, musa ni ntwelavusiwana lowu Yehovha a nga na wona. Yesu u vule leswaku “nawu lowukulu ni wo sungula eka hinkwayo” hi lowu nge “rhandza Yehovha Xikwembu xa wena.” (Mat. 22:37, 38) Pfuna xichudeni xa wena leswaku xi rhandza Yehovha hi mbilu hinkwayo.

13. Vula ndlela leyi nga pfunaka xichudeni leswaku xi dyondza hi ndlela leyi Yehovha a nga xiswona.

¹³ Loko u bula ni xichudeni xa wena, xi byele ndlela leyi u n’wi rhandzaka hayona Yehovha. Leswi swi ta endla leswaku xichudeni xa wena na xona xi lava ku va ni vuxaka lebyinene ni Xikwembu. (Ps. 73:28) Hi xikombiso, xana eka buku leyi mi yi dyondzaka ku ni xiga kumbe tsalwa leri ku khumbeke mbilu leri vulavulaka hi rirhandzu, vutlhari, vululami kumbe hi matimba lawa Yehovha a nga na wona? Byela xichudeni xa wena hi mhaka yoleyo u tlhela u xi hlamusela leswaku sweswo hi swin’wana leswi endlaka u rhandza Tata wa wena wa le tilweni. Ka ha ri na swin’wana leswi xichudeni xi faneleke xi swi endla leswaku xi ta fanelekela ku khuvuriwa.

14. Hi ku ya hi Vaheveru 10:24, 25, tinhlengeletano ta vandlha ti ta xi pfuna njhani xichudeni leswaku xi endla nhluvuko?

¹⁴ Hinkwerhu hi lava leswaku swichudeni swa hina swi khuvuriwa. Ndlela yin’wana leyi hi nga swi pfunaka hayona, i ku swi khutaza ku va kona etinhlengeletanweni ta vandlha. Vadyondzisi lava nga ni vutshila va vula leswaku swichudeni leswi yaka etinhlengeletanweni ta vandlha to ho suka swi endla nhluvuko hi ku hatlisa. (Ps. 111:1) Vadyondzisi van’wana va byela swichudeni swa vona leswaku loko swi ta etinhlengeletanweni ta vandlha swi ta dyondza leswi engetelekeke hi Yehovha. Hlaya Vaheveru 10:24, 25 ni xichudeni xa wena kutani u xi hlamusela leswi xi nga ta vuyeriwa ha swona loko xi ta etinhlengeletanweni ta vandlha. Xi kombe vhidiyo leyi nge Ku Endliwa Yini eHolweni Ya Mfumo? * Pfuna xichudeni xa  wena xi teka ku ta etinhlengeletanweni ta vandlha nkarhi ni nkarhi swi ri swa nkoka.

15. Hi nga xi khutaza njhani xichudeni leswaku nkarhi ni nkarhi xi va kona etinhlengeletanweni ta vandlha?

¹⁵ U fanele u endla yini loko xichudeni xa wena xi nga ti kumbe xi pfa xi xwa etinhlengeletanweni ta vandlha? Xi byele leswi ku tsakiseke leswi wa ha ku swi dyondzaka enhlengeletanweni ya vandlha. Sweswo swi nga xi khutaza leswaku xi tsakela ku ta. Xi nyike Xihondzo xo Rindza ni Xiyimiso Xa Mahanyelo Ni Ntirho Wa Hina Wo Chumayela leswi dyondziwaka evandlheni. Xi kombe leswi nga ta dyondziwa eka nhlengeletano leyi landzelaka kutani u xi vutisa leswaku hi swihi leswi xi swi languteleke. Leswi xi nga ta swi vona loko xi ta enhlengeletanweni ro sungula, xi ta swi xiya leswaku swi hambane ngopfu ni leswi endliwaka eka vukhongeri byin’wana. (1 Kor. 14:24, 25) Xi ta hlangana ni vanhu lava nga ni mahanyelo lamanene lawa xi nga ma tekelelaka naswona va nga ta xi pfuna xi fanelekela ku khuvuriwa.

16. Hi nga swi dyondzisa njhani swichudeni swa hina leswaku swi fanelekela ku khuvuriwa naswona hi ta dyondza yini eka nhlokomhaka leyi landzelaka?

¹⁶ Hi nga swi dyondzisa njhani swichudeni swa hina leswaku swi fanelekela ku khuvuriwa? Hi ku swi khutaza swi teka dyondzo yi ri ya nkoka, hi ku dyondza vhiki ni vhiki ni ku lunghiselela. Hi fanele hi tlhela hi swi khutaza ku vulavurisana na Yehovha siku ni siku ni ku aka vuxaka na Yena. Hi lava ku khutaza swichudeni swa hina leswaku swi ta etinhlengeletanweni ta vandlha. (Vona bokisi leri nge, “ Leswi Swichudeni Swi Faneleke Swi Swi Endla Leswaku Swi Fanelekela Ku Khuvuriwa.”) Eka nhlokomhaka leyi landzelaka, hi ta bula hi swilo swa ntlhanu, leswi vadyondzisi va nga swi endlaka leswaku va pfuna swichudeni swa vona swi fanelekela ku khuvuriwa.