1. Hi xihi xirhambo lexi Yesu a xi nyikeke vavanuna va mune lava a va ri vaphasi va tihlampfi naswona va angule njhani?

 VADYONDZISIWA lava landzelaka, Petro, Andriya, Yakobo na Yohane a va ri ni bindzu ra tihlampfi. Ehleketa ndlela leyi va hlamaleke hayona loko va twa Yesu a va rhamba a ku: “Ndzi landzeleni, ndzi ta mi endla vaphasi va vanhu.” * Xana va angule njhani? Loko Bibele yi hlamula yi ri: “Hiloko va hatla va siya tinete ta vona va n’wi landzela.” (Mat. 4:18-22) Xiboho xexo a xi ta cinca vutomi bya vona hinkwabyo. Ematshan’weni yo phasa tihlampfi, a va ta “phasa vanhu va ri karhi va hanya.” (Luka 5:10) Namuntlha, Yesu u rhamba vanhu lava nga ni timbilu letinene lava rhandzaka ntiyiso. (Mat. 28:19, 20) Xana se u xi amukerile xirhambo xa Yesu xo va muphasi wa vanhu?

2. Hikwalahokayini hi fanele hi xi teka xi ri xa nkoka xiboho xo va vaphasi va vanhu naswona i yini lexi nga ta hi pfuna hi teka xiboho xexo?

² Kumbexana se i khale u dyondza Bibele lerova se u cince ni mahanyelo ya wena naswona u lava ku endla xiboho xo va muchumayeri wa mahungu lamanene. Loko u kanakana ku amukela xirhambo xa Yesu, u nga heli matimba. Ku kanakana ka wena ku kombisa leswaku wa swi tiva leswaku xiboho xexo i xa nkoka swinene. Bibele yi vula leswaku Petro ni vatirhikulobye a va ha yimayimanga, va nambe va siya “tinete” ta vona. Hambiswiritano, Petro ni makwavo a va xi endlanga hi magugu xiboho xexo. Se a swi endla tin’hweti to tlula tsevu va tiva ni ku pfumela leswaku Yesu i Mesiya. (Yoh. 1:35-42) Hilaha ku fanaka, swi nga endleka leswaku se u dyondze swo tala hi Yehovha na Yesu naswona u lava ku ya emahlweni u va ni vuxaka na Yehovha.  Kambe u fanele u ehleketisisa kahle u nga si xi teka xiboho lexi. I yini lexi pfuneke Petro na Andriya ni van’wana leswaku va teka xiboho lexi?

3. I yini leswi nga ta ku pfuna leswaku u lava ku amukela xirhambo xa Yesu?

³ Vadyondzisiwa va Yesu vo sungula, a va rhandza ntirho wa vona, a va wu tiva kahle, a va ri ni xivindzi naswona a va tiyimisela. A swi kanakanisi leswaku sweswo hi swona leswi va pfuneke va va vaphasi va vanhu lava nga ni vutshila. Nhlokomhaka leyi, yi ta ku pfuna leswaku u va mudyondzisiwa wa Kreste loyi a nga ni vutshila.

4. I yini lexi endleke leswaku Petro a va muphasi wa tihlampfi?

⁴ Petro a a phasa tihlampfi leswaku a ta wundla ndyangu wakwe naswona a a wu rhandza swinene ntirho wolowo. (Yoh. 21:3, 9-15) U tlhele a dyondza ku rhandza ntirho wa ku va muphasi wa vanhu. Hikwalaho ko pfuniwa hi Yehovha, Petro u ve muphasi wa vanhu loyi a nga ni vutshila.—Mit. 2:14, 41.

5. Hi ku ya hi Luka 5:8-11, i yini lexi endleke Petro a chava naswona hina hi nga ku hlula njhani ku chava ko tano?

⁵ Hi chumayela hikwalaho ka leswi hi rhandzaka Yehovha; xexo hi xona xivangelonkulu lexi endlaka hi endla ntirho lowu. Loko hi rhandza Yehovha, swi ta endla leswaku hi nga chavi ku chumayela van’wana. Loko Yesu a rhamba Petro leswaku a va muphasi wa vanhu u te: “U nga chavi.” (Hlaya Luka 5:8-11.) Petro a a nga chavi nikatsongo leswi a swi ta n’wi humelela loko a va mudyondzisiwa. Kurinasweswo, a a hlamarisiwe hi tihlampfi to tala swinene leti Yesu a endleke leswaku va kota ku ti phasa hi singita naswona a a tivona a nga faneleki ku tirha na Yesu. Ku fana na Petro, u nga ha khomiwa hi ku chava loko u ehleketa  hi leswi u faneleke u swi endla leswaku u ta va mudyondzisiwa wa Kreste. Kambe loko u rhandza Yehovha, Yesu ni warikwenu swi ta endla leswaku u nga chavi ku amukela xirhambo xa Yesu xo va muphasi wa vanhu.—Mat. 22:37, 39; Yoh. 14:15.

6. Hi swihi swivangelo swin’wana leswi endlaka hi lava ku chumayela?

⁶ Xiya swivangelo swin’wana leswi endlaka hi lava ku chumayela. Hi lava ku yingisa xileriso xa Yesu lexi nge: “Fambani mi ya endla . . . vadyondzisiwa.” (Mat. 28:19, 20) Xin’wana lexi endlaka hi chumayela hileswaku vanhu va ‘tshikileriwa naswona a va khathaleriwi’ kutani va lava ku dyondza ntiyiso mayelana ni Mfumo wa Xikwembu hi timbilu ta vona hinkwato. (Mat. 9:36) Yehovha u lava vanhu va tinxaka hinkwato va wu tiva kahle ntiyiso leswaku va ta ponisiwa.—1 Tim. 2:4.

7. Varhoma 10:13-15 yi swi kombisa njhani leswaku ntirho wo chumayela i wa nkoka?

⁷ Loko hi ehleketa hi ndlela leyi ntirho wa hina wo chumayela wu nga ponisaka vutomi bya vanhu hayona, hi ta chumayela hi tinghitsi. Ku hambana ni muphasi wa tihlampfi loyi a phaselaka ku xavisa ni ku dya, hina hi phasa vanhu hi xikongomelo xo ponisa vutomi bya vona.—Hlaya Varhoma 10:13-15; 1 Tim. 4:16.

8-9. I yini leswi muphasi wa tihlampfi a faneleke a swi tiva naswona hikwalahokayini?

⁸ Enkarhini wa Yesu, Muisrayele loyi a ri muphasi wa tihlampfi a a fanele a tiva muxaka wa tihlampfi leti a lavaka ku ti phasa. (Lev. 11:9-12) A a fanele a tiva ni lomu a ta ti kuma kona. Hi ntolovelo tihlampfi ti kumeka endhawini leyi nga ni mati lawa ti ma rhandzaka naswona yi nga ni swakudya swo tala. Xana nkarhi lowu muphasi wa tihlampfi a a sungula ntirho wakwe ha wona a wu ri wa nkoka? Ku twa hi ta nkarhi lowunene wo phasa tihlampfi, xiya leswi Mbhoni yin’wana ya le Pacific island yi swi byeleke murhumiwa un’wana loko yi n’wi rhamba leswaku va ya phasa tihlampfi. Murhumiwa u te: “Hi ta hlangana mundzuku nimixo hi awara ya kaye.” Mbhoni yoleyo yi te: “Ndza vona a wu swi twisisi. Hi sungula ku phasa tihlampfi hi nkarhi lowu ti kumekaka ha wona, ku nga ri hi nkarhi lowu hina hi lavaka ha wona.”

⁹ Hilaha ku fanaka, vadyondzisiwa vo sungula va Yesu, a va ya laha vanhu va kumekaka kona ni hi nkarhi lowu va kumekaka ha wona. Hi xikombiso, a va chumayela etempeleni, emasinagogeni, hi yindlu ni yindlu ni le timakete. (Mit. 5:42; 17:17; 18:4) Na hina hi fanele hi wu tiva kahle nkarhi lowu vanhu va le nsin’wini ya ka hina va kumekaka ha wona. Hi fanele hi fambisana ni swiyimo, hi chumayela laha vanhu va kumekaka kona ni hi nkarhi lowu va kumekaka ha wona.—1 Kor. 9:19-23.

10. Hi swihi switirhisiwa leswi nhlangano wa Yehovha wu hi nyikaka swona?

¹⁰ Muphasi wa tihlampfi u fanele a va ni switirhisiwa leswi faneleke a tlhela a kota ku swi tirhisa kahle. Na hina hi ni switirhisiwa leswi faneleke leswi nga hi pfunaka entirhweni wa hina. Kambe hi fanele hi tiva ndlela yo swi tirhisa kahle. Yesu u nyike vadyondzisiwa vakwe swiletelo leswi twisisekaka swo phasa vanhu. U va byele leswi a va fanele va famba na swona, laha a va fanele va ya chumayela kona ni leswi a va fanele va swi vula. (Mat. 10:5-7; Luka 10:1-11) Namuntlha, nhlangano wa Yehovha wu hi nyika Switirhisiwa Swo Pfuneta Ku Dyondzisa leswi pfunaka swinene. * Hi tlhela hi leteriwa ndlela leyi hi nga swi tirhisaka hayona. Ndzetelo  lowu hi wu kumaka wu endla leswaku hi va ni xivindzi ni ku va vachumayeri lava nga ni vutshila.—2 Tim. 2:15.

11. Hikwalahokayini vaphasi va vanhu va fanele va va ni xivindzi?

¹¹ Van’wamabindzu lava nga vaphasi va tihlampfi va fanele va va ni xivindzi. Mikarhi yin’wana va hlangana ni swiyimo leswi chavisaka elwandle. Hakanyingi va tirha nivusiku naswona xidzedze xi nga va hlasela nkarhi wun’wana ni wun’wana. Hilaha ku fanaka, ni vaphasi va vanhu va fanele va va ni xivindzi. Loko hi sungula ku chumayela ni ku byela van’wana leswaku hi Timbhoni ta Yehovha, hi nga ha kanetiwa hi swirho swa ndyangu, hi hlekuriwa hi vanghana naswona van’wana va nga ha ala ku yingisa rungula leri hi ri chumayelaka. Kambe leswi a swi hi hlamarisi. Yesu u lemukise vadyondzisiwa vakwe leswaku va ta kanetiwa swinene.—Mat. 10:16.

12. Hi ku ya hi Yoxuwa 1:7-9, i yini lexi nga ta hi pfuna leswaku hi va ni xivindzi?

¹² U nga xi kuma njhani xivindzi? Xo sungula, u fanele u kholwa leswaku Yesu wa ha ya emahlweni a kongomisa ntirho wo chumayela a ri etilweni. (Yoh. 16:33; Nhlav. 14:14-16) Xa vumbirhi, tiyiseka leswaku Yehovha u ta ku khathalela hilaha a tshembisaka hakona. (Mat. 6:32-34) Loko ripfumelo ra wena ri ya ri tiya, u ta ya u va ni xivindzi. Petro ni vatirhikulobye va kombise leswaku va ni ripfumelo loko va tshika bindzu ra vona kutani va landzela Yesu. Hilaha ku fanaka, na wena u  kombisa leswaku u ni ripfumelo loko u byela vanghana ni ndyangu wa ka n’wina leswaku se u dyondza Bibele ni Timbhoni ta Yehovha naswona u ya ni le tinhlengeletanweni ta tona ta vandlha! A swi kanakanisi leswaku se u cince mahanyelo ya wena ya khale naswona se u hanya hi milawu ya Yehovha. Swi lava xivindzi ku endla tano. Loko u ya u tikarhatela ku va ni xivindzi, tiyiseka leswaku “Yehovha Xikwembu xa wena u na wena kun’wana ni kun’wana laha u yaka kona.”—Hlaya Yoxuwa 1:7-9.

13. Ku anakanyisisa ni xikhongelo swi nga ku pfuna njhani leswaku u va ni xivindzi?

¹³ I yini swin’wana leswi nga ku pfunaka u va ni xivindzi? Khongela u kombela xivindzi. (Mit. 4:29, 31) Yehovha u ta hlamula swikhongelo swa wena naswona a nge pfuki a ku tshikile. U tshama a lunghekele ku ku pfuna. Nakambe, anakanyisisa hi ndlela leyi Yehovha a va poniseke hayona van’wana enkarhini lowu hundzeke. Ehleketa ni hi ndlela leyi a ku pfuneke hayona leswaku u hlula swiphiqo ni ku cinca mahanyelo ya wena. Handle ko kanakana, Xikwembu lexi rhangeleke vanhu va xona leswaku va tsemakanya Lwandle ro Tshwuka, xi nga ku pfuna leswaku u va mudyondzisiwa wa Kreste. (Eks. 14:13) Vana ni ripfumelo ku fana ni mupisalema loyi a nga te: “Yehovha u le kusuhi na mina; a ndzi nge chavi. Xana munhu a nga ndzi endla yini?”—Ps. 118:6.

14. U dyondza yini eka ntokoto wa Masae na Tomoyo?

¹⁴ Xin’wana lexi nga ku pfunaka u va ni xivindzi, i ku dyondza hi ndlela leyi Yehovha a va pfuneke hayona vanhu lava nga ni tingana leswaku va va ni xivindzi. Twana ntokoto wa makwerhu wa xisati Masae. A a ri ni tingana naswona a a nga tshembi leswaku u ta pfuka a chumayele vanhu van’wana. Eka yena ku vulavula ni vanhu lava a nga va tiviki, a swi fana ni ku khandziya ntshava leyikulu leyi a nga ta ka a nga swi koti ku yi khandziya. Kutani u endle matshalatshala yo kurisa ndlela leyi a xi rhandzaka hayona Xikwembu swin’we ni vanhu van’wana. U anakanyisise hi ndlela leyi swi nga swa xihatla hayona ku chumayela enkarhini lowu hi hanyaka eka wona kutani u khongerile a kombela mpfuno. U swi kotile ku hlula ku chava koloko naswona u tlhele a teka ni vuphayona. Yehovha a nga pfuna vahuweleri lavantshwa leswaku va va ni “xivindzi.” Twana ntokoto wa makwerhu wa xisati Tomoyo. Loko a sungula ku chumayela hi yindlu ni yindlu, munhu wo sungula loyi a n’wi kumeke u n’wi holovele a ku: “A ndzi lavi ku twa nchumu hi Timbhoni ta Yehovha!” kutani a pfala rivanti. Hi xivindzi Tomoyo u byele loyi a a famba na yena a ku: “U swi vonile? A ndzi kalanga ndzi vula nchumu kambe u swi vonile leswaku ndzi Mbhoni ya Yehovha. Ndzi tsake ngopfu!” Sweswi hi vulavulaka, Tomoyo i phayona.

15. Swi vula yini ku tiyimisela naswona hikwalahokayini swi ri swa nkoka eka Vakreste?

¹⁵ Vaphasi va tihlampfi lava swi va fambelaka kahle va tiyimisela. Ku tiyimisela swi vula ku “tikarhatela ku endla swilo leswi u faneleke u swi endla.” Van’wamabindzu lava phasaka tihlampfi va fanele va tiyimisela ku vindzuka ni ku tiyiselela maxelo yo biha ku kondza va heta ntirho wa vona. Na hina hi fanele hi tiyimisela leswaku hi ta kota ku tiyisela ni ku heta ntirho wa hina.—Mat. 10:22.

16. Hi nga swi kota njhani ku tiyimisela?

¹⁶ Ku tiyimisela swi lava ku hlakuleriwa. Hi ntolovelo hi lava ku endla swilo leswi olovaka. Leswaku hi kota ku tiyimisela hi fanele hi kota ku tikhoma. Hikwalaho, leswaku hi kota ku endla swilo leswi vonakaka swi tika ku swi endla, hi lava ku pfuniwa. Yehovha wa hi pfuna hi ku tirhisa moya wakwe lowo kwetsima.—Gal. 5:22, 23.

17. Hi ku ya hi 1 Vakorinto 9:25-27, muapostola Pawulo u vule leswaku u boheke ku endla yini leswaku a kota ku tiyimisela?

 ¹⁷  Muapostola Pawulo a a tiyimisela. Kambe u vule leswaku u boheke ku “ba” miri wakwe leswaku a kota ku endla swilo leswinene. (Hlaya 1 Vakorinto 9:25-27.) U tsundzuxe van’wana leswaku va tiyimisela ni ku endla swilo hinkwaswo hi “ndlela leyinene ni hi ku hleleka.” (1 Kor. 14:40) Hi fanele hi tiyimisela leswaku hi ta kota ku tiyisa vuxaka bya hina na Yehovha ni ku katseka entirhweni wo chumayela mikarhi hinkwayo.—Mit. 2:46.

18. I yini lexi nga ta endla Yehovha a hi teka hi ri vachumayeri lava nga ni vutshila?

¹⁸ Muphasi wa tihlampfi u vula leswaku u tirhile hi ku languta nhlayo ya tihlampfi leti a ti phaseke. Kambe hina ku humelela ka hina entirhweni wo chumayela, a swi titsheganga hi nhlayo ya vanhu lava hi va tisaka enhlanganweni wa Yehovha. (Luka 8:11-15) Loko hi ya emahlweni hi tiyisela entirhweni wa hina wo chumayela ni ku dyondzisa van’wana, Yehovha u hi teka tanihi vachumayeri lava nga ni vutshila. Hikwalahokayini? Hikuva hi endla ntirho lowu yena ni N’wana wakwe va lavaka leswaku hi wu endla.—Mar. 13:10; Mit. 5:28, 29.

19-20. Hi xihi xivangelo xin’wana lexi endlaka hi chumayela namuntlha?

¹⁹ Ematikweni man’wana, ku phasa tihlampfi swi pfumeleriwa ntsena hi tin’hweti to karhi. Ematikweni wolawo, muphasi wa tihlampfi u gingiriteka ku tlula rini na rini loko nkarhi wo phasa tihlampfi wu ri ekusuhi ni ku hela. Xivangelo xin’wana lexi endlaka leswaku hi chumayela namuntlha hi lexi: Nkarhi wa leswaku misava leyi yi lovisiwa wu kwala nyongeni! Nkarhi lowu saleke wo endla ntirho lowu, lowu ponisaka vutomi i wutsongo ngopfu. U nga ha yimayimi kumbe u tibyela leswaku u yimele nkarhi lowu faneleke wo endla ntirho lowu wa nkoka swinene.—Ekl. 11:4.

²⁰ Teka goza sweswi u tikarhatela ku rhandza ntirho wa wena, u yi tiva kahle Bibele, u va ni xivindzi naswona u tiyimisela. Joyina vaphasi va vanhu lava tlulaka timiliyoni ta nhungu emisaveni hinkwayo kutani u ta tiphina hi ntsako lowu humaka eka Yehovha. (Neh. 8:10) Tiyimisele ku hoxa xandla hilaha u nga kotaka hakona entirhweni lowu, ku fikela loko wu fika emakumu. Eka nhlokomhaka leyi landzelaka, hi ta bula hi tindlela tinharhu leti nga ta hi pfuna leswaku hi ya emahlweni hi chumayela rungula ra Mfumo wa Xikwembu.