Eka tinhloko mhaka leti hundzeke se hi kume nhlamulo ya xivutiso lexi nge, Xikwembu I Mani? Bibele yi swi veka erivaleni leswaku vito ra xona, i Yehovha naswona mfanelo ya xona ya nkoka i rirhandzu. Hi xiye leswi xi swi endleke ni leswi xi nga ta swi endlela vanhu. Ku ni swilo swo tala leswi u nga swi dyondzaka hi Xikwembu kambe u nga ha tivutisa leswaku sweswo swi ta ku pfuna njhani.

Yehovha u vula leswaku “loko u n’wi lavisisa, u ta endla leswaku u n’wi kuma.” (1 Tikronika 28:9) Anakanya hi nyiko ya nkoka leyi u nga ta yi kuma loko u tiva Xikwembu—ku va ni “xinakulobye na Yehovha”! (Pisalema 25:14) U ta vuyeriwa njhani loko u va munghana wa Yehovha?

U ta va ni ntsako lowukulu. Yehovha u hlamuseriwa tanihi “Xikwembu lexi tsakeke.” (1 Timotiya 1:11) Loko u va munghana wa Xikwembu swi ta endla leswaku u tsaka naswona swi ta ku pfuna hi tindlela to hambanahambana. (Pisalema 33:12) U ta va ni vutomi byo tsakisa naswona u ta swi kota ku tshika mahanyelo lama nga ku vavisaka kutani u va ni mahanyelo lamanene ni ku hanyisana kahle ni van’wana. Hikwalaho, u ta ma twisisa kahle marito ya mupisalema loyi a nga te: “Ku tshinela eka Xikwembu i swinene eka mina.”—Pisalema 73:28.

Yehovha wa khathala hi wena. Yehovha u tshembisa malandza yakwe a ku: “Ndzi ta ku tsundzuxa ndzi veke tihlo ra mina ri ri ehenhla ka wena.” (Pisalema 32:8) Yehovha u khathalela lava n’wi gandzelaka naswona u pfuna un’wana ni un’wana hi ku ya hi swiyimo swa yena. (Pisalema 139:1, 2) Loko se u ri munghana wa Yehovha u ta swi vona leswaku mikarhi hinkwayo wa ku seketela.

Vumundzuku lebyinene. Yehovha u ta ku pfuna leswaku u hanya vutomi byo tsakisa ni lebyi enerisaka sweswi, ni ku ku pfuna leswaku u langutela vumundzuku lebyinene. (Esaya 48:17, 18) Bibele yi ri: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Emikarhini leyi yo tika ku anakanyisisa hi switshembiso swa Xikwembu swi ta hi pfuna leswaku hi ‘tiyiseka hi tlhela hi tiya.’—Vaheveru 6:19.

Leti i tin’wana ta tindlela leti kombisaka nkoka wo tiva Xikwembu ni ku va ni vuxaka lebyinene na xona. U nga ha vulavula ni un’wana wa Timbhoni ta Yehovha kumbe u nghena eka jw.org/ts leswaku u kuma rungula leri engetelekeke.