Loko u lava ku tiva munhu wo karhi, u sungula u n’wi vutisa, “Hi wena mani?” A hi nge u vutise Xikwembu xivutiso xexo, a xi ta hlamula njhani?

“Hi mina Yehovha. Rero i vito ra mina.”—Esaya 42:8.

Vito leri i ra nkoka eka Xikwembu. Vito leri, Xikwembu a xi thyanga hi munhu, xi lo ti hlawulela rona. Yehovha u te: “Leri i vito ra mina ra hilaha ku nga riki na makumu, naswona lexi i xitsundzuxo xa mina ku suka eka xitukulwana xin’wana ku ya eka xitukulwana xin’wana.” (Eksoda 3:15) Vito ra Xikwembu ri humelela mikarhi yo tala eBibeleni ku tlula swithopo swo tanihi leswi nge, Wa Matimba Hinkwawo, Tatana, Hosi kumbe Xikwembu naswona ri humelela mikarhi yo tala ku tlula ni mavito ya vanhu vo tanihi Abrahama, Muxe, Davhida kumbe Yesu. Yehovha u lava leswaku vanhu va tiva vito rakwe. Bibele yi ri: “Leswaku vanhu va ta swi tiva leswaku wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.”—Pisalema 83:18.

Vito ra Xikwembu i ra nkoka eka Yesu. Exikhongelweni xa Hosi, Yesu u dyondzise valandzeri vakwe leswaku loko va khongela eka Xikwembu, va ku: “Vito ra wena a ri kwetsimisiwe.” (Matewu 6:9) Yesu u khongele eka Xikwembu a ku: “Tatana, vangamisa vito ra wena.” (Yohane 12:28) Yesu a swi teka swi ri swa nkoka ku vangamisa vito ra Xikwembu, hi yona mhaka a khongeleke a ku: “Ndzi va tivise vito ra wena naswona ndzi ta ri tivisa.”—Yohane 17:26.

Vito ra Xikwembu i ra nkoka eka lava xi tivaka. Vanhu va Xikwembu va khale a va swi tiva leswaku ku ponisiwa ni ku sirheleriwa ka vona a swi titshege hi vito ra Xikwembu. “Vito ra Yehovha i xihondzo xo tiya. Lowo lulama u tsutsumela eka xona naswona u kuma nsirhelelo.” (Swivuriso 18:10) “Un’wana ni un’wana loyi a vitanaka vito ra Yehovha u ta pona.” (Yuwele 2:32) Bibele yi kombisa leswaku vito ra Xikwembu ri ta endla leswaku ku va ni ku hambana exikarhi ka lava va xi tirhelaka ni lava nga xi tirheliki. “Loko ku ri vanhu hinkwavo, un’wana ni un’wana u ta famba hi vito ra xikwembu  xakwe; kambe loko ku ri hina, hi ta famba hi vito ra Yehovha Xikwembu xa hina hilaha ku nga riki na makumu, hi masiku.”—Mikiya 4:5; Mintirho 15:14.

Vito leri ri xi hlamusela kahle Xikwembu. Swidyondzi swo tala swi vula leswaku, vito leri nge Yehovha ri vula leswaku “U Endla Leswaku Swi Va Kona.” Yehovha u byele Muxe nhlamuselo ya vito rakwe a ku: “Ndzi Ta Tikombisa Ndzi Ri Lexi Ndzi Nga Ta Tikombisa Ndzi Ri Xona.” (Eksoda 3:14) Vito ra Xikwembu ri hi byela leswaku a xo va Mutumbuluxi wa swilo hinkwaswo ntsena. Vito ra xona, ri swi veka erivaleni leswaku xi tiendla xin’wana ni xin’wana ni ku endla ntumbuluko wu va xin’wana ni xin’wana leswaku xi hetisisa xikongomelo xa xona. Hambileswi ku nga ha tirhisiwaka mavito yo tala ku hlamusela xikhundlha xa Xikwembu, vulawuri ni matimba ya xona kambe i vito leri nge Yehovha ntsena leri n’wi hlamuselaka kahle.

Vito leri, ri kombisa leswaku Xikwembu xa khathala hi hina. Vito ra Xikwembu ri kombisa leswaku xa khathala hi hina ni hi swilo, leswi xi swi vumbeke. Ku va Xikwembu xi hi byele vito ra xona, swi kombisa leswaku xi lava hi xi tiva. Ku engetela kwalaho, vito ra Xikwembu i khale ri ri kona. Swi le rivaleni leswaku Xikwembu a xi lavi leswaku hi xi teka tanihi munhu loyi hi nga n’wi tiviki kambe xi lava hi xi teka tanihi Munghana wa hina.—Pisalema 73:28.

Loko hi tirhisa vito ra Xikwembu hi kombisa leswaku ha xi rhandza. Hi xikombiso, u nga ha byela munhu loyi u lavaka ku va munghana wa yena leswaku a ku vitana hi vito. U nga titwa njhani loko munhu yoloye a ala ku tirhisa vito ra wena? U nga ha tivutisa loko hakunene munhu yoloye a swi lava ku va munghana wa wena. Swi tano ni hi Xikwembu. Yehovha u hi byele vito ra yena naswona u lava leswaku hi ri tirhisa. Loko hi ri tirhisa, hi kombisa Yehovha leswaku hi lava ku tshinela eka yena. Hikuva wa va xiya “lava va anakanyaka hi vito ra yena”!—Malakiya 3:16.

Ndlela yo sungula leyi nga hi pfunaka leswaku hi tiva Xikwembu, i ku dyondza vito ra xona. Kambe a swi heleli kwalaho. Swi lava hi tiva n’wini wa vito rero. Hi fanele hi tiva timfanelo ta Xikwembu.