Misava Leyintshwa Ya Paradeyisi Leyi Nga Kusuhi!
Xikwembu xi tumbuluxe misava leswaku vanhu vo lulama va ta tshama eka yona hilaha ku nga heriki. (Pisalema 37:29) Xi veke vatekani vo sungula, Adamu na Evha entangeni wo saseka wa Edeni ivi xi nyika vona ni vatukulu va vona vutihlamuleri byo rima misava va tlhela va yi khathalela.—Genesa 1:28; 2:15.
Misava ya namuntlha a hi Paradeyisi leyi Xikwembu a xi lava leswaku ku va yona. Hambiswiritano, xikongomelo xa Xikwembu a xi si cinca. Xi ta xi hetisisa njhani xikongomelo xa xona xo sungula? Hilaha tinhlokomhaka leti nga hundza ti kombiseke hakona, Xikwembu a xi nge yi lovisi misava. Ku ri na sweswo, xi ta pfumelela vanhu vo tshembeka leswaku va hanya eka yona. Misava yi ta va njhani loko Xikwembu xi hetisisa switshembiso swa xona?
Mfumo wun’we wu ta fuma misava hinkwayo
Ku nga ri khale, loko mfumo lowuntshwa wa Xikwembu wa le tilweni wu fuma vanhu hinkwavo, misava yi ta va ndhawu yo tsakisa laha vanhu va nga ta tshama swin’we hi ku rhula, va endla ntirho lowunene ni lowu enerisaka. Xikwembu xi hlawule Yesu Kreste leswaku a fuma misava. Ku hambana ni vafumi vo tala namuntlha, Yesu mikarhi hinkwayo u ta va endlela leswinene vanhu. U ta fuma hi rirhandzu naswona u ta va ni musa, tintswalo a tlhela a va Hosi leyi nga riki na xihlawuhlawu.—Esaya 11:4.
Vun’we emisaveni hinkwayo
Vanhu lava nga ta hanya emisaveni leyintshwa a va nge hambanisiwi hi rixaka kumbe ndhavuko. Vanhu va ta va ni vun’we. (Nhlavutelo 7:9, 10) Vanhu hinkwavo lava nga ta hanya emisaveni va ta rhandza Xikwembu ni vanhukulobye naswona va ta tirhisana hi ku rhula leswaku va hetisisa xikongomelo xo sungula xa Xikwembu xo khathalela kaya ra vona, ku nga misava.—Pisalema 115:16.
Ku lawuriwa ka maxelo
Loko Mfumo wa Xikwembu wu fuma misava, Muvumbi u ta ma lawula hi ku helela maxelo, a endla leswaku ma va exiyin’weni xa kahle. (Pisalema 24:1, 2) Loko Yesu a ha ri emisaveni, u ma kombise katsongo matimba lawa Xikwembu xi n’wi nyikeke wona loko a miyeta moya wa matimba. (Marka 4:39, 41) Loko Kreste a fuma, a nga kona loyi a nga ta chava timhangu ta ntumbuluko. Loko Mfumo wa Xikwembu wu fuma, hi ta hanyisana hi ku rhula ni swiharhi naswona a hi nge he yi onhi misava.—Hosiya 2:18.
Rihanyo lerinene ni swakudya swo tala
Un’wana ni un’wana u ta va ni rihanyo lerinene. Ku hava munhu loyi a nga ta vabya, a dyuhala kumbe a fa. (Esaya 35:5, 6) Vanhu va ta tiphina hi mbangu wo saseka wu tlhela wu basa wo fana ni lowu vatekani vo sungula a va tiphina hi wona entangeni wa Edeni. Emisaveni leyintshwa, misava yi ta humesa swakudya swo tala naswona vanhu hinkwavo emisaveni va ta va ni swakudya swo tala. (Genesa 2:9) Ku fana ni tiko ra khale ra Xikwembu ra Israyele, un’wana ni un’wana eParadeyisini u ta ‘dya xinkwa xakwe a xurha.’—Levhitika 26:4, 5.
Ku rhula ka xiviri ni nsirhelelo
Ehansi ka Mfumo wa Xikwembu lowu nga ta fuma misava hinkwayo, vanhu hinkwavo va ta tiphina hi ku rhula naswona va ta kombana musa va tlhela va khomana kahle. A ku nge he vi ni tinyimpi, ku tirhisa matimba hi ndlela yo biha naswona vanhu hinkwavo va ta va ni leswi va swi pfumalaka. Bibele ya tshembisa yi ku: “Un’wana ni un’wana u ta tshama ehansi ka murhi wakwe wa madiriva ni le hansi ka nkuwa wakwe, a va nge chavisiwi hi munhu.”—Mikiya 4:3, 4.
Ndhawu ya kahle yo tshama ni ntirho lowu enerisaka
Ndyangu wun’wana ni wun’wana wu ta va ni kaya wu nga chavi leswaku wu ta tekeriwa rona naswona ntirho hinkwawo lowu hi nga ta wu endla wu ta tsakisa. Hilaha Bibele yi vulaka hakona, lava tshamaka emisaveni leyintshwa ya Xikwembu “a va nge he tirheli swa hava.”—Esaya 65:21-23.
Dyondzo leyinene
Bibele ya tshembisa yi ku: “Misava hinkwayo yi ta tala hi ku tiva Yehovha.” (Esaya 11:9) Vanhu lava nga ta fumiwa hi Mfumo wa Xikwembu va ta dyondza hi vutlhari lebyikulu bya Muvumbi wa vona, Yehovha ni hi swilo swo saseka leswi a swi tumbuluxeke. A va nge tirhisi vutivi bya vona leswaku va endla matlhari kumbe va vavisa vanhu van’wana. (Esaya 2:4) Ku ri na sweswo, va ta dyondza ku hanyisana hi ku rhula ni vanhu van’wana ni ndlela yo khathalela misava.—Pisalema 37:11.
Vutomi lebyi nga heriki
Xikwembu xi tirhe hi matimba leswaku xi lunghiselela misava leswaku hi ta tiphina hi vutomi siku rin’wana ni rin’wana. Xi lava leswaku vanhu va hanya emisaveni hilaha ku nga heriki. (Pisalema 37:29; Esaya 45:18) Leswaku Xikwembu xi hetisisa xikongomelo xa xona xo sungula, ‘rifu xi ta ri mitela makumu.’ (Esaya 25:8) Bibele yi tshembisa leswaku “rifu a ri nge he vi kona, hambi ku ri nkosi, ku rila ni switlhavi a swi nge he vi kona.” (Nhlavutelo 21:4) Xikwembu xi ta nyika vanhu hinkwavo nkarhi wo hanya hilaha ku nga heriki, lava katsaka lava xi va poniseke loko xi lovisa misava leyi yo homboloka ni vanhu va ntsandzavahlayi lava xi nga ta va pfuxa emisaveni leyintshwa.—Yohane 5:28, 29; Mitirho 24:15.
Ni sweswi, vanhu va timiliyoni emisaveni hinkwayo va tilunghiselela ku hanya emisaveni leyintshwa leyi nga kwala nyongeni loko ku fuma Mfumo wa Xikwembu. Hambileswi va nga hetisekangiki, va tikarhatela ku va muxaka wa vanhu lava Xikwembu xi nga ta lava leswaku va hanya emisaveni ya xona leyintshwa. Njhani? Hi ku dyondza hi Yehovha Xikwembu ni loyi xi n’wi rhumeke, Yesu Kreste.—Yohane 17:3.
Kuma swo tala mayelana ni ndlela leyi u nga ponaka ha yona loko ku lovisiwa misava leyi kutani u hanya emisaveni leyinene leyi nga kwala nyongeni. Pfumela ku dyondzeriwa Bibele mahala hi Timbhoni ta Yehovha.
U Nga Ha Tsakela
XIHONDZO XO RINDZA
I Yini Leswi Mfumo Wa Xikwembu Wu Nga Ta Swi Endla?
Yesu a a swi tiva leswaku Mfumo wa Xikwembu hi wona ntsena lowu nga herisaka swiphiqo swa vanhu laha misaveni. I yini leswi Mfumo wolowo se wu swi endleke leswaku wu tiyisa ntshembo wa hina?
XIHONDZO XO RINDZA
Mfumo Wa Xikwembu
Swilo swa tsevu swa Mfumo wolowo leswi tiyisekisaka leswaku a wu nge pfuki wu ve ni vukanganyisi.
