Ti le ku tsutsumeni hi rivilo lerikulu! Ndlela leyi Bibele yi ti hlamuselaka ha yona tihanci ta mune ta matimba ni vagadi va tona swi hi endla hi xi vona kahle hi mahlo ya mianakanyo xivono lexi! Hanci yo sungula i yo basa naswona mugadi wa yona la vangamaka wa ha ku nyikiwa vuhosi. Kutani yi landzeriwa hi hanci yo tshwuka xindzilo, leyi mugadi wa yona a endlaka leswaku ku nga vi na ku rhula emisaveni hinkwayo. Ivi ku landzela hanci ya vunharhu ya ntima naswona mugadi wa yona u khome swikalo swimbirhi naswona ku twakala rito ri huwelela ta ku kayivela ka swakudya. Hanci ya vumune i ya muhlovo wo kwalala, naswona yi yimela mavabyi lama nga ni khombo ku katsa ni swilo swin’wana leswi dlayaka vanhu naswona yi gadiwe hi Rifu hi roxe. Kutani yi landzeriwa hi Sirha leri hetaka vanhu vo tala!—Nhlavutelo 6:1-8.

“A ndzi chuhile loko ndzi hlaya hi vagadi va mune va tihanci ro sungula. A ndzi twa onge Siku ra Vuavanyisi ri kwala nyongeni naswona leswi a ndzi nga ri lunghekelanga a ndzi nga ta pona.”—Crystal.

“Eku sunguleni a ndzi tsakisiwa hi vagadi lava va mune ni tihanci ta vona leti nga ni mihlovo leyi nga faniki. Endzhaku ka loko ndzi hlaye leswi xivono lexi xi vulaka swona, ndzi sungule ku swi twisisa kahle.”—Ed.

Xana wa yi twisisa ndlela leyi Crystal a titweke ha yona hi vagadi va mune va tihanci va le bukwini ya Nhlavutelo? Kumbe u titwa ku fana na Ed? Ku nga khathariseki ndlela leyi u titwaka ha yona, xivono lexi xa vagadi va mune va tihanci, i xin’wana xa swivono leswi tivekaka swinene ebukwini yo hetelela ya Bibele ya Nhlavutelo. U nga vuyeriwa swinene loko u hlaya ni ku tlhela u twisisa leswi xivono lexi xi vulaka swona. Hi ndlela yihi? Xikwembu xi tshembisa leswaku u nga kuma ntsako loko u hlaya ni ku tlhela u tirhisa leswi u swi hlayeke ebukwini leyi ya vuprofeta.—Nhlavutelo 1:1-3.

Hambileswi vanhu vo tala va chavisiwaka hi xivono lexi xa vagadi va tihanci, a xi endleriwanga ku ku chavisa. Vanhu va timiliyoni va kume leswaku xivono lexi xi va tiyisa ripfumelo ni ku va nyika ntshembo hi vumundzuku. Swi nga va tano ni le ka wena. Hlaya leswi engetelekeke hi mhaka leyi.