Loko ku ri leswaku Xikwembu a hi xona xi vangaka ku xaniseka, i yini leswi vangaka ndlala, vusweti lebyi nga heriki, tinyimpi, mavabyi ni timhangu ta ntumbuluko? Rito ra Xikwembu, ku nga Bibele, ri hi byela hi swilo swinharhu leswikulu leswi endlaka vanhu va xaniseka:

1. Ku Ti Tsonana, Makwanga Ni Rivengo. ‘Munhu u fuma munhu un’wana ku n’wi endla swo biha.’ (Eklesiasta 8:9) Hakanyingi vanhu va xaniseka hikuva va xanisiwa hi vanhu lava nga hetisekangiki, lava tianakanyelaka kumbe lava nga ni tsonanaka.

2. Nkarhi Ni Swiendlakalo Leswi Nga Languteriwangiki. Vanhu va tala ku xaniseka hileswi ‘nkarhi ni xiendlakalo lexi nga languteriwangiki swi va welaka hinkwavo.’ (Eklesiasta 9:11) Sweswo swi vangiwa hileswi mikarhi yin’wana vanhu va tikumaka va ri endhawini leyi nga fanelangiki hi nkarhi lowu nga fanelangiki, ku humelela ka makhombo, vanhu va nga tikhomi kahle kumbe va endla swihoxo.

3. Mufumi Lowo Homboloka Wa Misava. Bibele yi xi hlamusela kahle xivangelo lexikulu lexi endlaka vanhu va xaniseka. Yi ri: “Misava hinkwayo yi le hansi ka matimba ya lowo homboloka.” (1 Yohane 5:19) “Lowo homboloka” i Sathana Diyavulosi, loyi a nga xivumbiwa xa moya lexi nga ni matimba swinene lexi eku sunguleni a xi ri ntsumi ya Xikwembu kambe “a nga yimanga a tiyile entiyisweni.” (Yohane 8:44) Swivumbiwa swin’wana swa moya swi xandzukele Xikwembu ivi swi joyina Sathana leswaku swi ta enerisa ku navela ka swona kutani swi tiendle madimona. (Genesa 6:1-5) Ku sukela loko va xandzukile, Sathana ni madimona yakwe va ve ni nkucetelo lowukulu ni ku tirhisa matimba ya vona hi ndlela ya tihanyi leswaku va hambukisa vanhu emisaveni. Leswi swa ha ri tano ni le nkarhini wa hina. Sweswi, Diyavulosi u hlundzukile swinene naswona u ‘xisa misava hinkwayo leyi akiweke,’ naswona sweswo swi endle leswaku ku va ni “khombo eka misava.” (Nhlavutelo 12:9, 12) Hambiswiritano, Sathana i mufumi wa tihanyi. Wa tsaka swinene loko a vona vanhu va xaniseka. Hikwalaho, loyi a endlaka leswaku vanhu va xaniseka i Sathana, a hi Xikwembu.

ANAKANYA HI LESWI: I munhu loyi a nga ni tihanyi ni loyi a nga ni vusathana ntsena loyi a nga endlaka leswaku vanhu lava nga riki na nandzu va xaniseka. Ku hambana ni sweswo, Bibele yi ri: “Xikwembu i rirhandzu.” (1 Yohane 4:8) Leswi xi nga ni rirhandzu, “a swi ve ekule swinene ni Xikwembu xa ntiyiso leswaku xi endla hilaha ku hombolokeke, Ni Lowa Matimba Hinkwawo ku endla hilaha ku nga lulamangiki!”—Yobo 34:10.

Hambiswiritano, u nga ha tivutisa, ‘Xana Xikwembu xa Matimba Hinkwawo xi ta n’wi pfumelela ku fikela rini Sathana leswaku a ya emahlweni a ri karhi a fuma hi ndlela ya tihanyi?’ Hilaha hi swi voneke hakona, Xikwembu xa byi nyenya vuhomboloki naswona xi twa ku vava swinene loko hi ri karhi hi xaniseka. Ku engetela kwalaho, Rito ra xona ri hi khutaza ri ku: “Lahlela[ni] ku vilela hinkwako ka n’wina eka xona, hikuva xa mi khathalela.” (1 Petro 5:7) Xikwembu xa hi rhandza naswona xi ni matimba yo herisa ku xaniseka hinkwako ni vubihi, hilaha xihloko lexi landzelaka xi nga ta hlamusela hakona. *