VANHU va ni mavonelo lama hambaneke hi vutomi ni rifu. Van’wana va anakanya leswaku endzhaku ka rifu va ta ya emahlweni va hanya endhawini yin’wana va ri hi xivumbeko xin’wana. Kasi van’wana va anakanya leswaku va ta tlhela va velekiwa endhawini yin’wana. Hambiswiritano, van’wana va ehleketa leswaku loko munhu a file swi herile hi yena.

Ku nga va ku ri ni leswi u swi pfumelaka hi mhaka leyi, hi ku ya hi ndhavuko wa ka n’wina kumbe hi ku ya hi ndlela leyi u kurisiweke ha yona. Tanihi leswi ku nga ni mavonelo lama hambaneke swinene hi leswi endlekaka endzhaku ka rifu, xana ku ni munhu kumbe ku kona laha hi nga kumaka nhlamuselo ya ntiyiso mayelana ni mhaka leyi?

Se swi ni malembe yo tala varhangeri va vukhongeri va ri karhi va dyondzisa dyondzo ya leswaku moya wa munhu a wu fi. Vakreste, Mahindu, Vayuda, Mamoslem ni vanhu va vukhongeri byin’wana va tshemba leswaku munhu u ni moya lowu nga fiki, lowu salaka wu hanya exivandleni xa moya loko miri wu file. Hi hala tlhelo, Mabudha ma tshemba leswaku endzhaku ka loko munhu a velekiwe ko tala, moya wakwe wu ya endhawini leyi rhuleke leyi vuriwaka Nirvana.

Hikwalaho ka tidyondzo teto leti hambaneke, vanhu vo tala emisaveni hinkwayo va tshemba leswaku rifu ri endla leswaku vanhu va ya hanya kun’wana. Eka vo tala rifu i nchumu wa nkoka evuton’wini naswona va vona onge i ku rhandza ka Xikwembu. Kambe i yini leswi Bibele yi swi dyondzisaka hi mhaka leyi? Hi kombela u hlaya xihloko lexi landzelaka. Nhlamulo ya kona yi nga ku hlamarisa.