Ndzi velekeriwe le dorobeni ra Ciudad Mante, ku nga ndhawu yo saseka exifundzheni xa Tamaulipas le Mexico. Hi ntolovelo, vanhu va doroba rolero va ni malwandla va tlhela va va ni musa. Kambe khombo ra kona, ndhawu yoleyo a yi ri ni khombo swinene hikwalaho ka mintlawa ya swigevenga leyi a yi ri kona kwalaho.

Ekaya a hi ri vafana va mune, mina a ndzi ri wa vumbirhi. Vatswari va mina va ndzi yise ndzi ya khuvuriwa eKerekeni ya Khatoliki, naswona hi ku famba ka nkarhi a ndzi yimbelela eka khwayere ya kereke ya kwalaho. A ndzi lava ku tsakisa Xikwembu hikuva a ndzi swi chava swinene ku avanyisiwa ni ku ya hisiwa hilaha ku nga heriki etiheleni.

Loko ndzi ri ni malembe ya ntlhanu, tatana u hi sukerile. Sweswo swi ndzi vangele gome lerikulu swi tlhela swi ndzi endla ndzi titwa ndzi nga ha ri na xikongomelo. A ndzi nga swi twisisi leswaku ha yini a hi sukerile kasi a hi n’wi rhandza swinene. Manana a a boheka ku tirha tiawara to tala entirhweni leswaku a ta kota ku hi khathalela hina vana vakwe va mune.

Ndzi tirhise nkarhi wolowo hi ndlela yo biha ndzi tlhela ndzi nga yi exikolweni leswaku ndzi kota ku ya hlangana ni vana lava a va ri vakulu eka mina. Va ndzi dyondzise ku rhuketela, ku dzaha, ku yiva ni ku lwa hi swibakele. Leswi a ndzi rhandza ku lawula van’wana, ndzi dyondze ku ba xibakela, ku lwa ni vanhu, karati ni ku lwa ndzi tirhisa swo lwa ha swona. Ndzi hundzuke muntshwa la rhandzaka madzolonga. Minkarhi yo tala a hi lwa ni van’wana hi swibamu naswona hakanyingi a va ndzi siya exitarateni ndzi tele hi ngati va anakanya leswaku ndzi file. A ndzi dyisa manana mbitsi loko a ndzi kuma ndzi ri exiyin’weni xolexo ivi a boheka ku ndzi rhwala a ndzi tsutsumisela exibedlhele.

Loko ndzi ri ni malembe ya 16, munghana wa hina ku sukela loko ha ha ri vatsongo la vuriwaka Jorge u hi endzerile. U hi byele leswaku yena i Mbhoni ya Yehovha naswona a a lava ku hi byela rungula ra nkoka. U sungule ku hi byela leswi a pfumelaka eka swona a tirhisa Bibele. A ndzi nga si tshama ndzi yi hlaya, naswona a ndzi tsakile ku twa vito ra Xikwembu ni swikongomelo swa xona. Jorge u kombele ku dyondza na hina Bibele. Hi pfumerile.

Ndzi te hefu, loko ndzi dyondze ntiyiso malunghana ni tihele, leswaku a hi dyondzo leyi sekeriweke eBibeleni. (Pisalema 146:4; Eklesiasta 9:5) Endzhaku ka loko ndzi dyondze mhaka yoleyo, Xikwembu a ndzi  nga ha xi chavi hi ndlela leyi nga fanelangiki. Ndzi sungule ku xi teka tanihi Tatana la nga ni rirhandzu loyi a navelelaka vana va yena swilo leswinene.

Loko ndzi ri karhi ndzi endla nhluvuko eka dyondzo ya mina ya Bibele, ndzi swi xiyile leswaku ndzi fanele ndzi cinca vumunhu bya mina. A ndzi fanele ndzi hlakulela ku titsongahata kutani ndzi tshika ku rhandza madzolonga. Xin’wana lexi ndzi pfuneke a ku ri ndzayo leyi kumekaka eka 1 Vakorinto 15:33, leyi vulaka leswaku vanghana lavo biha va “onha mikhuva leyi pfunaka” kumbe mahanyelo lamanene. Ndzi xiye leswaku loko ndzi lava ku hundzula vumunhu bya mina, a ndzi fanele ndzi tshika ku endla xinghana ni vanhu lava a va ndzi kucetela ku endla swilo swo biha. Kutani ndzi tshike ku endla xinghana ni vanghana va mina va khale ivi ndzi endla xinghana ni swirho swa vandlha ra Vakreste va ntiyiso, ku nga vanhu lava tiyimiseleke ku lunghisa timholovo hi ku tirhisa misinya ya milawu ya le Bibeleni ku nga ri swibakela kumbe madzolonga.

Tindzimana tin’wana ta le Matsalweni leti ndzi pfuneke swinene a ku ri Varhoma 12:17-19. Yi ri: “Mi nga tlheriseli swo biha hi swo biha hambi eka mani. . . . Loko swi koteka, swi titshege hi n’wina, vanani ni ku rhula ni vanhu hinkwavo. Mi nga tirihiseli, . . . hikuva ku tsariwile: ‘Ku rihisela i ka mina; hi mina ndzi nga ta tlherisela, ku vula Yehovha.’” Ndzi swi tshembile leswaku Yehovha u ta herisa vuhomboloki hi ndlela ya yena hi nkarhi wakwe. Ndzi sungule ku tshika madzolonga hakatsongotsongo.

A ndzi nge swi rivali leswi ndzi humeleleke madyambu man’wana loko ndzi tlhelela ekaya. Ntlawa wa vantshwa lava a va ri valala va ntlawa wa swigevenga lowu a ndzi ri xirho xa wona va sungule ku ndzi hlasela, kutani murhangeri wa vona u sungule ku ndzi ba hala nhlaneni a ri karhi a huwelela a ku, “Tilwele!” Ndzi be xikhongelo xo koma ndzi xi kongomisa eka Yehovha hi nkarhi wolowo, ndzi n’wi kombela leswaku a ndzi pfuna ndzi tiyisela loko ndzi biwa. Hambileswi a ndzi titwa ndzi lava ku rihisela, ndzi swi kotile ku suka ndzi famba. Hi siku leri landzelaka ndzi hlangane ni murhangeri wa ntlawa wolowo wa swigevenga a ri yexe. Ndzi sungule ku hlundzuka swinene ndzi lava ku rihisela, kambe ndzi tlhele ndzi kombela Yehovha hi mbilu leswaku a ndzi pfuna ndzi tikhoma. Lexi ndzi hlamariseke, muntshwa yoloye u tile a ndzi kongomile a fika a ku: “Ndzi khomele hi leswi humeleleke tolo nivusiku. Entiyisweni, ndza swi lava ku fana na wena. Ndzi lava ku dyondza Bibele.” Ndzi tsakile swinene hi leswi ndzi koteke ku tikhoma. Hikwalaho ka sweswo hi sungule ku dyondza Bibele swin’we.

Khombo ra kona, ndyangu wa ka hina hinkwawo a wu yanga emahlweni wu dyondza Bibele hi nkarhi wolowo. Hambiswiritano, ndzi endle xiboho lexi tiyeke xo ya emahlweni ndzi dyondza naswona ndzi nga pfumeleli munhu kumbe nchumu wu ndzi sivela. A ndzi swi tiva leswaku loko ndzi tshama ndzi ri ni vanhu va Xikwembu a swi ta endla leswaku ndzi hola emintlhavekweni naswona a ndzi ta va ni ndyangu lowu a ndzi lava ku va na wona. Ndzi ye emahlweni ndzi endla nhluvuko, naswona hi 1991, ndzi khuvuriwile ndzi va Mbhoni ya Yehovha.

A ndzi tshama ndzi karhatekile embilwini, ndzi rhandza ku lawula naswona ndzi ri ni madzolonga. Kambe Rito ra Xikwembu ri ndzi hundzurile hi ku helela. Sweswi ndzi byela munhu un’wana ni un’wana la ndzi yingiselaka rungula ra le Bibeleni ra ku rhula. Ndzi ve ni lunghelo ro va mutirheli wa nkarhi hinkwawo malembe ya 23 lama hundzeke.

Ndzi tirhe nkarhinyana ehofisini ya rhavi ya Timbhoni ta Yehovha eMexico. Loko ndza ha tirha kwalaho, ndzi hlangane na Claudia, wanhwana wa migingiriko la nga Mukreste, kutani hi tekane hi 1999. Ndza n’wi khensa swinene Yehovha leswi a ndzi katekiseke hi munghana loyi wo tshembeka!

Hi tirhe swin’we evandlheni leri tirhisaka Ririmi ra Mavoko ra le Mexico, hi pfuna vanhu lava feke tindleve leswaku va dyondza hi Yehovha. Hi ku famba ka nkarhi, hi komberiwe ku rhurhela eBelize leswaku hi ya dyondzisa vanhu va le tikweni rero Bibele. Hambileswi hi hanyaka vutomi byo olova swinene, hi na swona hinkwaswo leswi hi swi lavaka leswaku hi tsaka. A hi nge swi cinci leswaku hi kuma swin’wana.

Hi ku famba ka nkarhi, manana u tlhele a sungula ku dyondzo Bibele kutani a khuvuriwa. Nakambe buti wa mina, nsati wakwe ni vana va vona i Timbhoni ta Yehovha. Van’wana va lava tshameke va va vanghana va mina lava ndzi tshameke ndzi va byela rungula ra Mfumo se va tirhela Yehovha na vona.

Lexi twisaka ku vava, swirho swin’wana swa ndyangu wa mina swi file hikwalaho ka leswi swi nga tshikangiki ku rhandza ku lwa. Loko a ndzi nga wu tshikangi mukhuva wolowo, kumbexana na mina a ndzi ta va ndzi fana na vona ndzi file. Ndza n’wi khensa swinene Yehovha leswi a ndzi kokeleke eka yena ni le ka vagandzeri vakwe, naswona va ndzi lehiseleke mbilu va tlhela va va ni musa loko va ndzi dyondzisa ku tirhisa misinya ya milawu ya Bibele evuton’wini bya mina.