EMISAVENI hinkwayo, magidi ya vavanuna lava nga Timbhoni ta Yehovha va ve vakulu kumbe malandza ya vutirheli eka lembe leri nga hundza. Loko u ri un’wana wa vamakwerhu volavo lava rhandzekaka, a swi kanakanisi leswaku wa ri tsakela lunghelo ra wena lerintshwa.

Hambiswiritano, a swi hlamarisi loko u titwa u ri ni ku chavanyana. Jason nkulu loyi a ha riki muntshwa u te: “Loko ndzi va nkulu, a ndzi twa onge a ndzi nge swi koti ku hetisisa vutihlamuleri bya mina lebyintshwa.” Muxe na Yeremiya, na vona a va titwa va nga faneleki loko va kuma xiavelo lexi humaka eka Yehovha. (Eks. 4:10; Yer. 1:6) Loko u titwa hi ndlela leyi fanaka, i yini lexi nga ku pfunaka leswaku u ya emahlweni u endla nhluvuko? Xiya xikombiso xa Timotiya loyi a ri mudyondzisiwa wa Mukreste.—Mint. 16:1-3.

Kumbexana Timotiya a ri ni malembe ya kwalomu ka 20, loko muapostola Pawulo a n’wi rhamba leswaku a ya tirha na yena entirhweni wa vurhumiwa. Swi nga ha endleka leswaku tanihi leswi Timotiya a ha ri muntshwa, a nga titshembi naswona a kanakana ku amukela xiavelo xexo. (1 Tim. 4:11, 12; 2 Tim. 1:1, 2, 7) Hambiswiritano, endzhaku ka malembe ya khume, Pawulo u byele vandlha ra le Filipiya a ku: “Ndzi ni ntshembo eka Hosi Yesu leswaku ndzi ta rhuma Timotiya eka n’wina hi ku hatlisa . . . Hikuva a ndzi na un’wana la nga ni mboyamelo wo fana ni wa yena.”—Filp. 2:19, 20.

I yini lexi endleke leswaku Timotiya a va nkulu loyi a nga xikombiso lexinene? Xiya swilo swa tsevu leswi hi nga swi dyondzaka eka xikombiso xakwe.

1. A a khathala swinene hi vanhu. Pawulo u byele vamakwerhu va le Filipiya a ku: “[Timotiya u] ta swi khathalela hakunene swilo leswi khumbaka n’wina.” (Filp. 2:20) Entiyisweni, Timotiya a a khathala hi vanhu. A khathala hi vuxaka bya vona na Xikwembu naswona a tikarhatela ku va pfuna.

Papalata ku fana ni muchayeri wa bazi leri dumeke loyi a tikarhatelaka ku fika hi nkarhi eka xitichi xin’wana ni xin’wana ku tlula ku khandziyisa vanhu. William la nga ni malembe yo tlula 20 a ri nkulu u tsundzuxa lava ha ku vaka vakulu u ri: “Rhandzani vamakwerhu. Khathalani hi swilaveko swa vona ku tlula mintirho ya vandlha.”

2. A a rhangisa ntirho wo chumayela. Loko Pawulo a fanisa Timotiya ni van’wana u te: “Hinkwavo va lava leswi vuyerisaka vona ntsena, ku nga ri swa Kreste Yesu.” (Filp. 2:21) Pawulo a ri eRhoma loko a tsala marito wolawo. U xiye leswaku vamakwerhu va kwalaho a va khomeke ngopfu hi mintirho ya vona vini. Hi ndlela yo karhi a va nga tikarhati entirhweni wa Yehovha. Kambe Timotiya a nga ri tano! Loko a pfulekeriwe hi nkarhi wo yisa mahungu lamanene emahlweni, a ri ni langutelo leri fanaka ni ra Esaya loyi a nga te: “Hi mina loyi! Ndzi rhume.”—Esa. 6:8.

U nga swi kotisa ku yini ku ringanisela eka mintirho ya wena n’wini swin’we ni vutihlamuleri bya le vandlheni? Xo sungula, rhangisa swilo swa nkoka. Pawulo u khutaze a ku: “Tiyiseka hi swilo swa nkoka swinene.” (Filp. 1:10) Mikarhi hinkwayo rhangisa mintirho ya Xikwembu. Xa vumbirhi, hunguta swilo leswi nga riki swa nkoka. Tshika ku endla swilo leswi nga ku dyelaka nkarhi ni matimba. Pawulo u khutaze Timotiya a ku: “Balekela ku navela loku  fambisanaka ni vuntshwa, kambe lavisisa ku lulama, ripfumelo, rirhandzu, ku rhula.”—2 Tim. 2:22.

3. U tirhe hi matimba entirhweni wo kwetsima. Pawulo u tsundzuxe Vafilipiya a ku: “Ma xi tiva xitiyisekiso lexi [Timotiya] a xi nyikeleke hi yexe, leswaku ku fana ni n’wana na tatana u tirhe na mina ku yisa mahungu lamanene emahlweni.” (Filp. 2:22) Timotiya a nga ri lolo. A a tirha hi matimba loko a ri na Pawulo naswona sweswo swi endle leswaku va rhandzana swinene.

Namuntlha, ntirho wu lo vuya enhlengeletanweni ya Xikwembu. Ntirho wolowo wu tisa ntsako naswona wu nga ku endla u va ni vuxaka lebyinene ni vamakwerhu. Hikwalaho, tshama u ri ni “swo tala swo swi endla entirhweni wa Hosi.”—1 Kor. 15:58.

4. U tirhise leswi a swi dyondzeke. Pawulo u tsalele Timotiya a ku: “Wena u landzelerisise dyondzo ya mina, ndlela ya mina ya vutomi, xikongomelo xa mina, ripfumelo ra mina, ku va ni mbilu yo leha ka mina, rirhandzu ra mina, ku tiyisela ka mina.” (2 Tim. 3:10) Leswi Timotiya a tirhisa leswi a swi dyondzeke, u nyikiwe vutihlamuleri lebyi engetelekeke.—1 Kor. 4:17.

Xana u kona loyi a ku pfunaka leswaku u va ni ntokoto? Loko swi nga ri tano, kombela un’wana leswaku a ku pfuna. Tom, la nga ni malembe yo tala a ri nkulu, loko a tsundzuka u ri: “Nkulu un’wana la nga ni ntokoto a a tiyimisele ku ndzi pfuna naswona u ndzi letele hi ndlela leyinene ngopfu. A ndzi tshamela ku kombela switsundzuxo eka yena naswona a ndzi swi tirhisa. Sweswo swi ndzi pfune leswaku ndzi titshemba.”

5. U ye emahlweni a ti letela. Pawulo u khutaze Timotiya a ku: “Tiletele hi xikongomelo xa ku tinyiketela loku nga ni vukwembu.” (1 Tim. 4:7) Mutsutsumi a nga ha va a ri na muleteri kambe na yena u fanele a ti letela. Pawulo u khutaze Timotiya a ku: “Yana emahlweni u tinyiketela eku hlayeni ka le rivaleni, eku khongoteleni, eku dyondziseni. . . . Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo.”—1 Tim. 4:13-15.

Na wena u fanele u ya emahlweni u tikarhatela ku antswisa vuswikoti bya wena. Tshama u ri karhi u fambisana ni nhlengeletano ya Yehovha. Nakambe, papalata ku titshemba ngopfu lerova u anakanya leswaku u ni ntokoto wo tala lerova u nga swi kota ku tamela xiyimo xin’wana ni xin’wana handle ko endla ndzavisiso. Tekelela Timotiya hi ku “nyikela nyingiso lowu hambetaka eka wena ni le ku dyondziseni ka wena.”—1 Tim. 4:16.

6. A titshege hi moya wa Yehovha. Loko Pawulo a anakanyisisa hi vutirheli bya Timotiya, u n’wi tsundzuxe a ku: “Hlayisa swilo leswi leswinene, leswi u tamerisiweke swona hi moya lowo kwetsima lowu tshamaka eka hina.” (2 Tim. 1:14) Leswaku a hetisisa vutirheli byakwe, a fanele a titshega hi moya wa Xikwembu.

Donald, loyi a nga nkulu ku ringana malembe yo tala u ri: “Vakulu ni malandza ya vutirheli va fanele va tlangela vuxaka lebyi va nga na byona na Xikwembu. Lava va endlaka tano, ‘va ta tshama va ri ni ntamu.’ Lava khongelelaka moya wa Xikwembu ni ku hlakulela timfanelo ta wona, va ta va nkateko eka vamakwerhu.”—Ps. 84:7; 1 Pet. 4:11.

Swi tsakisa swinene ku vona lava va ha ku vaka vakulu ni malandza ya vutirheli ku fana na wena, va endla nhluvuko eka ntirho wa Yehovha. Jason, loyi a boxiweke eku sunguleni u ri: “Ku sukela loko ndzi ri nkulu, ndzi dyondze swo tala naswona ndzi dyondze ni ku titshemba. Sweswi ndzi xi rhandza swinene xiavelo xa mina naswona ndzi xi teka xi ri lunghelo lerikulu!”

Xana u ta ya emahlweni u endla nhluvuko entirhweni wa Yehovha? Tiyimisele ku dyondza eka xikombiso xa Timotiya. Kutani, na wena u ta va nkateko eka vanhu va Xikwembu.