Entirhweni wakwe wo chumayela Yesu a a tirhisa leswi a swi endleka hi nkarhi wolowo leswaku a dyondzisa. (Lk 13:1-5) Na wena u nga tirhisa leswi endlekaka leswaku u endla vanhu va tsakela rungula ra Mfumo. Endzhaku ko khumba ku durha ka swilo, timhangu ta ntumbuluko, mikitsikitsi, ku tirhisiwa ka swidzidziharisi kumbe swin’wana swo fana ni sweswo, vutisa xivutiso lexi tlhontlhaka mianakanyo. U nga vutisa u ku: “Xana u ehleketa leswaku swilo leswi swi ta hela?” kumbe “U ehleketa leswaku swi nga lulamisiwa njhani?” Kutani u n’wi hlayela tsalwa leri fambisanaka ni mhaka yoleyo. Loko a swi tsakela, n’wi kombe vhidiyo kumbe u n’wi nyika nkandziyiso lowu kumekaka eka Switirhisiwa Swo Pfuneta Ku Dyondzisa. Loko hi ri karhi hi tikarhatela ku fikelela timbilu ta vanhu va le nsin’wini ya ka hina, a hi ‘endleni swilo hinkwaswo hikwalaho ka mahungu lamanene.’—1Ko 9:22, 23.

Hi swihi swingheniso leswi nga kokaka rinoko ra vanhu va le nsin’wini ya ka n’wina?