Hi tsake swinene ku va ni broxara ni buku leyintshwa yo fambisa tidyondzo ta Bibele! Hi khongela leswaku Yehovha a katekisa matshalatshala ya hina yo endla vadyondzisiwa vo tala. (Mt 28:18-20; 1Ko 3:6-9) Hi nga swi tirhisa njhani switirhisiwa leswi leswintshwa?

Leswi buku ya mudyondzi ni mudyondzisi leyi nge, Tiphine Hi Vutomi Hilaha Ku Nga Heriki! yi nga ndlela leyintshwa yo dyondzisa, tirhisa nkongomiso lowu loko u ri karhi u lunghiselela ni loko u fambisa tidyondzo ta Bibele. *

• Hlayani rungula ivi mi bula hi swivutiso

• Hlayani matsalwa lama nge “hlaya” ivi u pfuna xichudeni ku twisisa ndlela leyi ma tirhaka ha yona

• Tlanga tivhidiyo ivi mi bula ha tona mi tirhisa swivutiso leswi kombisiweke

• Ringeta ku heta dyondzo yin’we loko mi dyondza

Loko u ri ensin’wini, rhanga hi ku fambisa broxara ku vona loko munhu a tsakela ku dyondza. (Vona bokisi leri nge, “ Ndlela Yo Fambisa Broxara Leyi Nge, Tiphine Hi Vutomi Hilaha Ku Nga Heriki! Eka Riendzo Ro Sungula.”) Loko mo heta ku dyondza broxara leyi swin’we naswona xichudeni xa ha lava ku dyondza, xi nyike buku kutani mi sungula eka dyondzo 04. Loko u dyondza ni munhu buku leyi nge, Leswi Hi Nga Swi Dyondzaka kumbe leyi nge, Rirhandzu Ra Xikwembu, cincani mi ya dyondza buku leyi nge, Tiphine Hi Vutomi Hilaha Ku Nga Heriki! mi hlawula laha mi nga sungulaka kona.

HLALELANI VHIDIYO LEYI NGE, HA KU AMUKELA EKA DYONDZO YA WENA YA BIBELE KUTANI MI HLAMULA SWIVUTISO LESWI LANDZELAKA:

• I yini leswi swichudeni swi nga ta swi dyondza eka buku leyi leyintshwa?

• Hikwalahokayini u fanele u komba swichudeni leswintshwa vhidiyo leyi?

• I yini leswi nkarhi ni nkarhi u faneleke u khutaza xichudeni xa wena leswaku xi swi fikelela? Vona chati leyi nge, “ Leswi U Nga Ta Swi Dyondza Ni Leswi U Faneleke U Tiyimisela Ku Swi Endla.”