BISHKEK eKyrgyzstan—Ntlawa lowu Tlakukeke wa Vaavanyisi va Huvo Leyikulu ya Kyrgyzstan wu teke xiboho lexi vaavanyisi hinkwavo va pfumelelaneke ha xona hi November 19, 2013, xa leswaku nawu wa sweswinyana wa malunghana ni mintirho yo korhokela tiko a wu fambisani ni vumbiwa naswona a wu yi xiximi mfanelo ya ntshunxeko wa vugandzeri. Huvo yi lerise mfumo leswaku wu cinca nawu wa wona leswaku wu va ni mintirho leyi hakunene yi nga ya ku korhokela tiko leyi nga endliwaka hi lava alaka ku ya evusocheni hikwalaho ka ripfalo ra vona.

Hi 2009, tiko ra Kyrgyzstan ri amukele nawu lowu xiximaka mfanelo ya munhu yo endla mintirho yin’wana yo korhokela tiko. Hambiswiritano, swi nambe swi tikomba leswaku ntirho lowu entiyisweni a wu ri ehansi ka masocha. Lava a va wu endla a va languteriwa hi vatirhi va le vusocheni naswona van’wana va lerisiwe ku hakelela swikoxo swa mintirho ya vusocha. Endzhaku ko heta ntirho wolowo, mavito ya vona a ma namba ma hoxiwa eka nxaxamelo ya masocha yo khomela. Hikwalaho ka sweswo, Timbhoni ta Yehovha ti ale ku amukela mintirho yoleyo, leswi endleke leswaku Timbhoni to hlayanyana ti voniwa nandzu wa vugevenga.

Xiboho lexi tekiweke hi November xi kombise leswaku Timbhoni ti ni swivangelo leswi twalaka swo ala ku endla ntirho wo korhokela tiko lowu ti nyikiwaka wona nileswaku a ti nga ringeti ku balekela vutihlamuleri bya tona byo ya evusocheni. Ku hambana ni sweswo, Huvo yi kume leswaku Timbhoni ti tiyimisele ku endla mintirho yo korhokela tiko leyi nga fambisaniki ni vusocha. Ku languteriwe leswaku milandzu hinkwayo ya vugevenga leyi Timbhoni ti rhwexiweke yona yi ta tlhela yi pfuriwa ivi ku tekiwa xiboho hi ku ya hi nawu lowu cinciweke.

Khamit Iskakov, muvulavuleri wa Timbhoni ta Yehovha eKyrgyzstan, u ri: “Xiboho lexi a xi nge pfuni ku ntlantlha mhaka ya vanhu lava alaka ku ya evusocheni hikwalaho ka ripfalo ra vona ntsena, kambe xi ta tlhela xi pfuna vatirhela-mfumo va le Kyrgyzstan va tiva leswaku Timbhoni ta Yehovha i vukhongeri lebyi xiximiwaka emisaveni hinkwayo.”

Media Contact(s):

International: J. R. Brown, Office of Public Information, tel. +1 718 560 5000

Kyrgyzstan: Khamit Iskakov, tel. +996 770 778 885

Afrika-Dzonga: Mzamo Goloda, +27 11-761-1000