Hi April 16, 2012, edorobeni ra Perm’ le xivindzini xa Rhaxiya, Aleksandr Solovyov, loyi a nga Mbhoni ya Yehovha, u rihisiwe mali leyi ringanaka kwalomu ka R260 hikwalaho ko hlela ‘minhlangano ya vukhongeri leyi nga pfumeleriwangiki’ eholweni leyi hirhiweke.

Endzhaku ka loko muavanyisi wa huvo ya doroba a byi yingisele hi vurhon’wana “vumbhoni” hinkwabyo lebyi lwisanaka na Solovyov, u xi bakanyele tlhelo xiboho lexi tekiweke hi huvo ya le hansi naswona u sule ndziho lowu a a fanele a wu hakela.

Muavanyisi yoloye u hlaye xiboho ivi a languta Mbhoni leyi hluleke nandzu kutani a ku: “Ku nga khathariseki leswi vumbiwa byi cinca-cincaka nileswi vanhu van’wana va nga ni rivengo, a hi hanyi hi 1937 laha a hi namba hi honisa timhaka leti nga erivaleni. Onge vanhu va nga va ni mahanyelo lamanene hikwalaho ka ntirho lowu mi wu endlaka wo dyondzisa.”

Hi July 1937, Stalin, mufumi wa tiko ra Soviet, u humese Nawu wa 00447, lowu vangeke minkarhi ya mangava. Lava a va tekiwa va ri ni mavonelo lama lwisanaka ni swiboho leswi tekiweke hi valawuri a va hlengeletiwa kutani va tengisiwa etihubyeni, laha a va hundzuriwa swihlekiso ntsena. Tirhekodo ta mfumo ti kombisa leswaku vanhu va makume ya magidi va rhumeriwe ku ya tirha etikampeni naswona lava tlulaka 300 000 va gweveriwe rifu ivi va dlayiwa.