Vanhu vo tala va tshama swin’we va nga si tekana hi nawu. Van’wana va endla tano hi xikongomelo xo lava ku vona vuswikoti bya vona naswona va tshemba leswaku sweswo swi ta va pfuna ku va va ni vukati lebyi humelelaka. Xana ku tshama swin’we mi nga se tekana hi nawu i goza ra vutlhari?

Leswi nga eka nhlokomhaka leyi

•  Xana Bibele yi ri yini?

•  Xana ku tshama swin’we swi nga mi pfuna leswaku mi lunghekela vukati?

•  Xana ku tshama swin’we swi nga mi pfuna leswaku mi hlayisa mali?

•  Xana ku tshama swin’we swi ta ku pfuna leswaku u kuma munhu loyi a faneleke wa ku tekana na yena?

•  Xana ku ni ndlela yo antswa?

•   Bibele a yi pfumeli leswaku vanhu vambirhi lava nga tekanangiki hi nawu va endla timhaka ta masangu. Hi xikombiso, yi ri: “Mi papalata ku tikhoma ko biha hi swa masangu.” (1 Vatesalonika 4:3; 1 Vakorinto 6:18) Leswi swi katsa ku endla timhaka ta masangu ka wanuna ni wansati lava va tshamaka swin’we va nga tekananga hambiloko va tiyimisele ku tekana hi ku famba ka nkarhi. a Milawu ya Bibele yi sirhelela vatekani leswaku va nga kumi khwiri emahlweni ko va va tekana, ni switandzhaku swin’wana swo biha leswi nga vaka kona hikwalaho ko tshama swin’we emahlweni ko va va tekana hi nawu.

•   Lunghiselelo ra vukati ri sungule hi Xikwembu. Loko a ri simeka u te ‘Wanuna u ta siya tata wakwe ni mana wakwe kutani a namarhela nsati wakwe naswona va ta va nyama yin’we.’ (Genesa 2:24) Loko wanuna ni wansati va tinyiketela eka vukati bya vona wolawo i masungulo lamanene ya ndyangu lowu nga ni rirhandzu ni lowu tiyeke.

 Van’wana va ehleketa tano. Va ehleketa leswaku loko va endla tano swi ta va pfuna va kuma ntokoto loko va ri karhi va endla swin’we mitirho ya le kaya naswona swi ta va pfuna va kota ku vona mahanyelo ya munghana lowun’wana kambe xihundla lexikulu xa ku endla leswaku vukati byi humelela i ku tinyiketela.

 Xana vatekani va nga swi kota njhani ku tshama swin’we loko swi famba kahle ni loko swi nga fambi kahle? A va nge pfuniwi hi ku va va tshama swin’we va nga si tekana hikuva loko va nga si tekana havumbirhi bya vona ava byi teki byi ri bya nkoka vuxaka bya vona naswona va nga byi dlaya nkarhi wun’wana ni wun’wana. Ematshan’weni ya sweswo, vuxaka byi ta humelela loko ha vambirhi va tinyiketela ni ku tirha hi matimba leswaku va lulamisa swiphiqo swin’we.

 Ntiyiso wa mhaka: Loko mi endla onge mi tekanile kambe mi nga tekananga, ematshan’weni yo tilunghiselela vukati kahlekahle mi va mi ti lunghiselela ku hambana.

 Leswi Bibele yi swi vulaka: “Xin’wana ni xin’wana lexi munhu a xi byalaka, u ta tlhela a tshovela xona.”—Vagalatiya 6:7.

 Van’wana va vula tano. Valavisisi va kume leswaku eUnited States, kwalomu ka mune eka vanhu va khume lava va sunguleke ku tshama swin’we va nga tekananga va endle tano hikwalaho ka xivangelo xa swa timali. Hambiswiritano, endzhaku ko tshama swin’we nkarhi wo karhi va xiye leswaku xiphiqo xa timali hi xona xivangelonkulu lexi endleke leswaku va nga lavi ku nghenela vukati.

 Loko wanuna ni wansati va tshama swin’we va nga tekananga hi nawu ku nga va ni switandzhaku ngopfungopfu eka wa xisati. Hi xikombiso, endzhaku ka loko vuxaka bya vona byi herile mikarhi yo tala vavasati hi vona va vaka ni vutihlamuleri byo kurisa vana.

 Ntiyiso wa mhaka: Vuyelo byo biha lebyi vaka kona hileswi vanhu va tshamaka swin’we va nga tekananga hi nawu byi vava ngopfu ku tlula ku tiphina swa nkarhinyana.

 Leswi Bibele yi swi vulaka: “Mina Yehovha, ndzi Xikwembu xa wena, Loyi a ku dyondziselaka ku ku pfuna.”—Esaya 48:17.

 Van’wana va vula tano. Hambiswiritano buku leyi nge Fighting for Your Marriage yi ri, ‘‘Vanhu vo tala lava va tshamaka swin’we va nga tekananga hi nawu mikarhi yo tala ava swi xiyi leswaku swa tika ku tshikana.’’ Hikwalahokayini? Van’wana va nga kuma leswaku ku na ku hambana lokukulu exikarhi ka vona. Hambiswiritano va nga boheka ku tshama swin’we hikwalaho ka nhundzu leyi va yi xaveke swin’we kumbe hileswi va languteleke n’wana loyi a va nga n’wi kunguhatanga hilaha valavisisi va vuleke hakona. b Buku leyi nge Fighting for Your Marriage yi ya emahlweni yi hlamusela yi ku, ‘‘vanhu van’wana lava ava fanele va tshikana va vona onge swa antswa ku ya emahlweni va tshama swin’we ivi va hetelela va cata.’’

 Ntiyiso wa mhaka: Kahlekahle ku tshama swin’we swi nga endla leswaku swi tika ku dlaya vuxaka byebyo ku ri ni ku mi pfuna mi endla xiboho lexinene.

 Leswi Bibele yi swi vulaka: “Lowo tlhariha u vona khombo kutani a tumbela, Kambe loyi a nga riki na ntokoto u ya emahlweni a famba kutani a langutana ni vuyelo bya swiendlo swakwe”—Swivuriso 22:3.

 Wanuna ni wansati va nga papalata makhombo lawa ma tisiwaka hi ku tshama swin’we va nga tekananga hi nawu ivi va endla leswi va nga swi kotaka leswaku va va ni vukati lebyi humelelaka. Njhani? Hi ku tirhisa leswi Bibele yi swi vulaka hi vukati. Tinyike nkarhi wa ku n’wi tiva kahle munhu loyi u lavaka ku tekana na yena mi nga si tshama swin’we tanihi hi nuna na nsati. Swa antswa ku hlawula munhu loyi u nga ta tekana na yena hi ku ya hileswi mi nga ni vumunhu ni ripfumelo leri fanaka ku nga swona swa nkoka ku tlula ndlela leyi a langutekaka hayona.

 Bibele yi ni switsundzuxo leswi nga ku pfunaka leswaku u va ni masungulo lamanene ya vukati lebyi tsakisaka byi tlhela byi tiya. c Hi xikombiso, Bibele yi ni milawu leyi nga ku pfunaka ku . . .

•   papalata ku nga tshembeki

•   va munhu loyi a nga vaka munghana lonene wa vukati

•   xiya vumunhu lebyi nga ku tsakisiki hi munhu loyi u rhandzanaka na yena

 Leswaku u dyondza leswi engetelekeke hi ti nhlokomhaka leti, nghena eka xiyenge xa ‘‘Vukati Ni Ndyangu’’ eka jw.org.

 Leswi Bibele yi swi vulaka: “Matsalwa hinkwawo ma huhuteriwe hi Xikwembu naswona ma pfuna ku dyondzisa”—2 Timotiya 3:16.