Bibele Yi Ri Yini Hi Ku Hanana?

TLANGA

Nhlamulo ya Bibele

Bibele yi hi byela leswaku hi hanana hi mbilu hinkwayo, naswona hi nga rindzeli ku tlheriseriwa swo karhi. Ku hanana swi vuyerisa la hananaka ni loyi a amukelaka. (Swivuriso 11:25; Luka 6:38) Yesu u te: “Ku nyika swi tisa ntsako lowukulu ku tlula ku amukela.”—Mintirho 20:35.

Xana loko munhu a hanana u vuyeriwa loko swi te yini?

Munhu wa vuyeriwa loko a hanana hi mbilu hinkwayo. Bibele yi ri: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.”—2 Vakorinto 9:7.

Ku nyika hi mbilu hinkwayo i “muxaka wa vugandzeri” lebyi tsakisaka Xikwembu. (Yakobo 1:27) Munhu la hananaka lava pfumalaka u tsakisa Xikwembu, hikuva xi teka ku hanana koloko ku fana ni ku lomba xona. (Swivuriso 19:17) Bibele yi dyondzisa leswaku Xikwembu hi xoxe xi tlherisela la nyikaka van’wana.—Luka 14:12-14.

I ku hanana ka muxaka muni loku nga xi tsakisisi Xikwembu?

Hiloko munhu a hanana a ri karhi a ehleketa hi leswi vuyerisaka yena ntsena. Swikombiso swa kona swi katsa:

Ku tsakisa vanhu.—Matewu 6:2.
Ku lava ku tlheriseriwa swo karhi.—Luka 14:12-14.
Ku humesa nhlengo leswaku u ta ponisiwa.—Pisalema 49:6, 7.

Loko nyiko ya kona yi nyikeriwa ku ya endla swilo leswi vengiwaka hi Xikwembu. Hi xikombiso, swi ta va swi bihile ku nyika munhu mali leswaku a ya gembula kumbe ku xava swidzidzirisi kumbe byala. (1 Vakorinto 6:9, 10; 2 Vakorinto 7:1) Nakambe swi hoxile ku nyika munhu la nga lolo, la nga laviki ku ya titirhela.—2 Vatesalonika 3:10.

Loko hi hanana swinene kambe hi nga va hlayisi vandyangu wa hina. Bibele yi dyondzisa leswaku tinhloko ta mindyangu ti fanele ti wundla mindyangu ya tona. (1 Timotiya 5:8.) Swi ta va swi hoxile loko nhloko ya ndyangu yi hanana vanhu van’wana kambe yi tshika vandyangu va yona va xanisaka. Hilaha ku fanaka, Yesu u tshinye lava va ala ku hlayisa vatswari va vona lava dyuhaleke, va vula leswaku mali ya vona i “nyiko leyi nyikeriweke eka Xikwembu.”—Marka 7:9-13.

Tindzimana ta Bibele lebyi vulavula hi ku hanana

Swivuriso 11:25: “Moya-xiviri lowu hananaka wu ta nonisiwa, ni loyi a cheletaka van’wana mahala na yena u ta cheletiwa mahala.”

Leswi ri vulaka swona: Ku hanana swi vuyerisa la hananaka ni la amukelaka.

Swivuriso 19:17: “Loyi a kombisaka xisiwana tintswalo u lomba Yehovha, naswona ndlela leyi a xi khomaka ha yona U ta yi tlherisela eka yena.”

Leswi ri vulaka swona: Loyi a nyikaka xisiwana, Xikwembu xi swi vona swi fana niloko a lomba xona naswona xi ta n’wi tlherisela tintswalo takwe.

Matewu 6:2: “Loko u ya humesa tinyiko ta tintswalo, u nga rhangi hi ku yimba mhalamhala, hilaha vakanganyisi va endlaka hakona . . . leswaku va ta vangamisiwa hi vanhu.”

Leswi ri vulaka swona: A hi fanelanga hi hanana ntsena leswaku hi ta voniwa hi vanhu.

Mintirho 20:35: “Ku nyika swi tisa ntsako lowukulu ku tlula ku amukela.”

Leswi ri vulaka swona: Ku nyika swi huma embilwini swa tsakisa.

2 Vakorinto 9:7: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.”

Leswi ri vulaka swona: Ku hanana swi suka embilwini hi ku tirhandzela swi tsakisa Xikwembu?