Bibele yi kombisa leswaku swi fanerile naswona swa laveka ku va munhu a tirhandza hi ndlela leyi ringaneke. Rirhandzu ro tano ri katsa ku tikhathalela, ku ti xixima ni ku titwa u ri wa risima. (Matewu 10:31) Ku ri na ku titwa u ri wa nkoka ku tlula mpimo, Bibele yi vula leswaku hi tirhandza hi ndlela leyi faneleke.

I mani loyi hi faneleke hi n’wi rhandza ku sungula?

1.   Hi fanele hi rhandza Xikwembu etimbilwini ta hina. Bibele yi hi dyondzisa leswaku xileriso xo sungula eka hinkwaswo i ku rhandza “Yehovha Xikwembu xa wena hi mbilu ya wena hinkwayo.”—Marka 12:28-30; Deteronoma 6:5.

2.   Xileriso xa vumbirhi eka hinkwaswo i ku: “Rhandza munhu-kuloni kukota loko u tirhandza.”—Marka 12:31; Levhitika 19:18.

3.   Hambileswi Bibele yi nga boxiki hi ku kongoma emhakeni ya ku tirhandza, xileriso lexi nge: “Rhandza munhu-kuloni kukota loko u tirhandza” xi kombisa leswaku ku tirhandza hi ndlela leyi ringaneke i swinene naswona swa vuyerisa.

Yesu u rhandze mani ku sungula?

 Yesu u kombise ndlela yo ringanisela loko hi rhandza Xikwembu, munhukuloni ni loko hi tirhandza naswona u lerise vadyondzisiwa va yena ku landzela xikombiso xa yena.—Yohane 13:34, 35.

1.   A a rhandza Yehovha Xikwembu ku sungula naswona a tinyiketele ku hetisisa ntirho Wakwe. U te: “Ku endlela leswaku misava yi swi tiva leswaku ndza n’wi rhandza Tatana, ndzi endla hilaha Tatana a ndzi leriseke ku endla hakona.”—Yohane 14:31.

2.   Yesu a rhandza vanhukuloni kukota loko a tirhandza, u kombise sweswo hi ku khathala hi swilaveko swa van’wana hambi ku ri hi ku nyikela hi vutomi byakwe.—Matewu 20:28.

3.   U kombise leswaku wa tirhandza hi ndlela leyi ringaneke hi ku tinyika nkarhi wo wisa, wo dya, wo tsakela xinghana ni valandzeri va yena ni lava a va tsakela rungula rakwe.—Marka 6:31, 32; Luka 5:29; Yohane 2:1, 2; 12:2.

Xana ku rhandza vanhu van’wana kukota loko u tirhandza swi endla u nga tsaki kumbe u nga xiximiwi?

 Doo! Hikuva hi vumbiwe hi xifaniso xa Xikwembu, lexi mfanelo ya xona yo sungula ku nga rirhandzu leri nga laviki leswi vuyerisaka rona ntsena. (Genesa 1:27; 1 Yohane 4:8) Leswi swi vula leswaku hi vumberiwe ku rhandza van’wana. Ku tirhandza swa laveka kambe ha tsaka swinene loko hi rhandza Xikwembu ku tlula hinkwaswo ni ku endlela van’wana leswinene. Hilaha Bibele yi vulaka hakona, “Ku nyika swi tisa ntsako lowukulu ku tlula ku amukela.”—Mintirho 20:35.

Namuntlha vanhu vo tala va vula leswaku loko munhu a lava ku tsaka, u fanele a endla leswi tsakisaka yena ku sungula. Eka vona ku “rhandza munhukuloni” ku siviwe hi ku “tirhandza.” Hambiswiritano, namuntlha ku ni swikombiso swo tala leswi kombisaka leswaku rihanyo lerinene ni ntsako swi kumiwa hi vanhu lava landzelaka marito ya le Bibeleni ya vutlhari lama nge: “Un’wana ni un’wana a a hambete a lava leswaku ku pfuneka un’wana, hayi yena n’wini.”—1 Vakorinto 10:24.