Xana Bibele Yi Ri Yini Malunghana Ni Ntshunxeko Wo Tihlawulela? Xana Xikwembu Xi Lawula Vutomi Bya Wena?

TLANGA

Nhlamulo ya Bibele

Xikwembu xi hi nyike ntshunxeko wo tihlawulela, ku nga matimba yo tiendlela swiboho ematshan’weni yo va Xikwembu xi kunguhata ka ha ri emahlweni leswi hi faneleke hi swi endla. Xiya leswi Bibele yi swi dyondzisaka.

Xikwembu xi vumbe munhu hi xifaniso xa xona. (Genesa 1:26) Ku hambana ni swihari leswi kongomisiwaka hi ntumbuluko, hina hi fana ni Muvumbi wa hina hileswi hi nga ni vuswikoti byo kombisa timfanelo to tanihi rirhandzu ni vululami. Hi ni ntshunxeko wo tihlawulela ku fana ni Muvumbi wa hina.
Eka swilo swo tala ha swi kota ku kunguhata vumundzuku bya hina. Bibele yi hi khutaza ku “hlawula vutomi . . . hi ku yingisa rito [ra Xikwembu],” leswi vulaka ku hlawula ku yingisa milawu ya xona. (Deteronoma 30:19, 20) Ku hlawula koloko a ku nga ta hi pfuna nchumu loko a hi nga ri na wona ntshunxeko wo tihlawulela. Ematshan’weni yo va Xikwembu xi hi sindzisa ku endla leswi xi swi lavaka, xi hi kombela hi rirhandzu xi ku: “Kunene loko a wu yingise swileriso swa mina! Kutani ku rhula ka wena a ku ta fana ni nambu.”—Esaya 48:18.
Ku va swilo swi hi fambela kahle kumbe swi hi fambela ximatsi a swi titsheganga hi ku kunguhateriwa. Loko hi lava leswaku swilo swi hi fambela kahle, hi fanele hi tirha hi matimba. Bibele yi ri: “Hinkwaswo leswi voko ra wena ri swi kumaka leswaku ri swi endla, swi endle hi matimba ya wena.” (Eklesiasta 9:10) Yi tlhela yi ku: “Kunene makungu ya lava va gingiritekaka ma endla leswi pfunaka.”—Swivuriso 21:5.

Ntshunxeko wo tihlawulela i nyiko ya risima leyi humaka eka Xikwembu hikuva yi endla leswaku hi xi rhandza hi ‘timbilu ta hina hinkwato’ hileswi hi lavaka ku endla tano.—Matewu 22:37.

Xana Xikwembu a xi lawuli swilo hinkwaswo?

Bibele yi dyondzisa leswaku Xikwembu xi ni Matimba Hinkwawo nileswaku matimba ya xona a ku na munhu la nga ma sivelaka handle ka xona n’wini. (Yobo 37:23; Esaya 40:26) Hambiswiritano, a xi ma tirhisi ku lawula swilo hinkwaswo. Hi xikombiso, Bibele yi vula leswaku Xikwembu xi “hambete [xi] tikhoma” leswaku xi nga ri lovisi tiko ra khale ra Babilona, leri a ri ri nala wa vanhu va xona. (Esaya 42:14) Ninamuntlha, xi hlawula ku pfumelela vanhu lava tirhisaka ntshunxeko wo tihlawulela leswaku va twisa van’wana ku vava. Kambe Xikwembu a xi nge swi pfumeleli hilaha ku nga heriki.—Pisalema 37:10, 11.