Hambileswi Bibele yi nga yi boxiki hi vuenti mhaka leyi kambe a yi swi arisi ku tola swo tisasekisa hi swona, ku ambala swin’wetsin’wetsi kumbe mixaka yin’wana ya swona. Hambiswiritano, ematshan’weni yo vulavula ngopfu hi ku tisasekisa ka le handle, Bibele yi hlohlotela ku ‘ambala swiambalo leswi nga onhakiki swa moya wo rhula ni wo olova.’—1 Petro 3:3, 4.

•   Vavasati va ripfumelo va le Bibeleni lava a va tisasekisa. Raveka loyi a tekaneke na Isaka n’wana wa Abrahama, a a ambale xingwavila xa le nhompfini xa nsuku, mabendlele ya nsuku ni swin’wetsin’wetsi swin’wana swo durha leswi a swi kumeke tanihi nyiko eka tata wa nuna wakwe. (Genesa 24:22, 30, 53) Hilaha ku fanaka, Estere u amukele “switolwa swo tisasekisa” leswaku a lunghekela ku ya va hosi ya xisati ya Mfumo Lowukulu wa Peresiya. (Estere 2:7, 9, 12) Sweswo a swi katsa ni “switola-tolani swin’wana swa vavasati” kumbe “swilo swin’wana swo tisasekisa ha swona.”—Bibele Ya Mahungu Lamanene.

•   Bibele yi tirhisa swikombiso swa swin’wetsin’wetsi loko yi lava ku hlamusela nchumu wo karhi lowunene. Hi xikombiso, munhu loyi a nyikaka xitsundzuxo lexinene u fanisiwa ni “xingwavila xa ndleve xa nsuku.” (Swivuriso 25:12) Hilaha ku fanaka Xikwembu xi fanisa ndlela leyi xi khomeke tiko ra Israyele hayona ni wanuna loyi a sasekisaka nsati wa yena hi mabendlele, vuhlalu bya le nkolweni ni swingwavila swa le tindleveni. Ku tisasekisa loku ku endle leswaku tiko ri “saseka ngopfu.”—Ezekiyele 16:11-13, nhlamuselo ya le hansi.

 Vonelo leri hoxeke: Ku va Hosi Ya Xisati yo homboloka Yezabele yi tirhise swo ‘tola matihlo’ swi kombisa leswaku ku tola swo tisasekisa swi hoxile.—2 Tihosi 9:30.

 Ntiyiso: Yezabele loyi a endla swa vuloyi ni ku va mudlayi u avanyisiwe hi ku ya hi swiendlo swakwe swo homboloka, ku nga ri hi ndlela leyi a languteka hayona.—2 Tihosi 9:7, 22, 36, 37.