Ku rhula emisaveni a ku nge tisiwi hi matshalatshala ya vanhu kambe ku ta tisiwa hi Mfumo wa Xikwembu, lowu nga hulumendhe ya le tilweni leyi hosi ya wona ku nga Yesu Kreste. Xiya leswi Bibele yi hi dyondzisaka swona malunghana ni ntshembo lowu, lowu hlamarisaka swonghasi.

1.   Xikwembu xi ta “herisa tinyimpi ku ya fika emakumu ya misava,” xisweswo xi hetisisa xitshembiso xa xona xo tisa ‘ku rhula emisaveni eka vanhu lava xi va tsakelaka.’—Pisalema 46:9; Luka 2:14, Bibele—Mahungu lamanene.

2.   Mfumo wa Xikwembu wu ta fuma misava hinkwayo wu ri etilweni. (Daniyele 7:14) Tanihi leswi wu nga hulumendhe ya misava, wu ta herisa moya wo rhandza tiko, ku nga wona lowu kucetelaka tinyimpi to tala emisaveni.

3.   Yesu, Mufumi wa Mfumo wa Xikwembu, u vitaniwa “Hosana ya Ku Rhula” naswona u ta endla leswaku ‘ku rhula ku nga vi na makumu.’—Esaya 9:6, 7.

4.   Vanhu lava tiyimiseleke ku tshamela ku lwa a va nge pfumeleriwi ku hanya ehansi ka Mfumo wa Xikwembu, tanihi leswi ‘moya-xiviri wa Xikwembu wu n’wi vengaka un’wana ni un’wana la rhandzaka madzolonga.’—Pisalema 11:5; Swivuriso 2:22.

5.   Xikwembu xi dyondzisa lava nga ta hanya ehansi ka mfumo wa xona ndlela yo hanya hi ku rhula. Loko Bibele yi hlamusela vuyelo bya ndzetelo lowu, yi ri: “Kutani va ta fula mabanga ya vona ma va swikomu ni mafumu ya vona ma va swikhutulo. Tiko a ri nge tlakuseli tiko rin’wana banga, naswona a va nge he dyondzi nyimpi.”—Esaya 2:3, 4.

 Timbhoni ta Yehovha ta timiliyoni emisaveni hinkwayo ana se ti le ku dyondzeni eka Xikwembu ndlela yo hanya hi ku rhula. (Matewu 5:9) Hambileswi hi humaka eka tinxaka to hambana-hambana naswona hi tshamaka ematikweni lama tlulaka 230, a hi pfumeli ku ya enyimpini hi ya lwa ni vanhu-kulobye.